Luqaasi 19 - Kafa Linguistics Project

Zakiyoosi Kexooch Yesuusi Gimo

¹ Ebiyee gubb, Yesuusi Yaarika giyiꞌi aroona beshee beehe.

² Arooch Zakiyoosi getteebeeti gabiyee guudeenaꞌochi ukkiroo beehe; biyoo gaannechone.

³ Aroo dofee ashi daggoochee Yesuusin aabi gaata beegga qaawiye; tunebaani bi neexo qaminnitoyich, xiishoon hakkaanoone.

⁴ Ebich Yesuusi hammemmo caaree michi baateexi gommona bi tunetoyich, biin beegoyich ashoyee aaf shiichiꞌi woccii hammii are caaree michi toommooch kechiye.

⁵ Bi kechitoyee gubb Yesuusi are caaree michi gaꞌooch shaggiichii kaama ciinniꞌi, “Zakiyooso, kaateree kindibe. Hanaach ne kexooch taan heechiyemmi mooyo beetone” iye.

⁶ Ebich Zakiyoosi kaatee kindiꞌi emiriibee Yesuusin bi kexooch daammiꞌi iibbiihe.

⁷ Arooba are asheenaꞌo bulli beeggiꞌi, “Axaaxecho kexooch iibbiitaa giyitone” iꞌi guruuxiyeete.

⁸ Tunebaani Zakiyoosi bulli aafooch neexeꞌi Doono Yesuusin “Ta Doonocho, taach beeto bulliichee qaton girechoyich wojjemmo taane; koninolla kootoon taggaꞌa ta deqqeto beegaata, awudde kishoon tuniiree wochemmo taane” iye.

⁹ Yesuusiyoo biich ishichiye: “Hini uro Abrahamichi bushoo bi tunetoyich, hanaach hini kexooch wodoo tunetone.

¹⁰ Ashi Bushoo bi waato, aalleton qaawoonaa wodiyoonoyichiye” iye.

Aashire Wochee Bushiisheenaꞌochi Shaahiyoo

¹¹ Ebichi hillooch are dofee asheenaꞌo Yesuusichi yibbaatoon waayeebee, gommon biinna tookkii hammii beeheete; Yesuusi Yerusaalem bi katinnitoyich, wotta “Yeeri bi taatittinoon and kaate neechiree bekkiyemmone” iꞌi boonoshi gabitoyich, ebi shaahiyoon daakkiꞌi boonoshich gettiye.

¹² Ishichiinoo iye: “Taatee yaroo tuneti ikke uro bi showee toommooch taatittinoon deꞌiree wotteya iꞌi wohi showooch hamma tiyiye.

¹³ Bi wochee bushiisheenaꞌoochee aashireenaꞌon ceeggii balli balle xure birewoon boonoshich immiꞌi, ‘Wottaa ta waammi wottoon ebina giixeree shiijji beebote’ iye.

¹⁴ “Tunebaani are showee asheenaꞌo biin boonoshi shixxitoyich, ‘Hini uro no toommooch bi taatoon shunnaachone’ iꞌi bi hillooch biin taatiyemmo waan wochoon daachiiheete.

¹⁵ “Tunetaa taatoo biin taatiitaa, aroochee taatittinoon deqqiꞌi wottee waahe. Ebichi hillooch balli balle xure birewoon bi immiti bi wochee bushiisheenaꞌo giixeꞌi ambichoon boonoshi shiijjito gaata ariiya iꞌi ceekkiihe.

¹⁶ “Shiichiꞌi shaggito ‘Ta doonocho, ne balle xure birewoo humoon shiyitone’ iye.

¹⁷ “Doono tiyiꞌi, ‘Gaawiye; hini deꞌe ta wochee bushoocho! Giishechoona ne gibeneetoyich, aashire katemeenaꞌo toommooch neen ukkiriito taane’ iye.

¹⁸ “Guttinnee wochee bushoo wotta waaꞌi, ‘Ta doonocho, ne balle xure birewoo uuche balloon shiyitone’ iye.

¹⁹ “Hini wochee bushoonoo ‘Neenoo wotta ebiyoommon uuche katemeenaꞌo toommooch ukkiriito taane’ iye.

^20-21 “Aree hillooch bare wochee bushoo wotta waaꞌi, ‘Ta doonocho, maacmanje asho neene; ne shoohaanoochee qeccaabeeto, ne bushaanoochee shafiraabeeto ne tunetoyich, shattaꞌa qoreddee buroona kaappaꞌa ta quyeti balle xure birewoo hiniyoche’ iye.

²² “Arooba doono tiyiꞌi, ‘Hini gonde wochee bushoocho! Ta shoohaanoochee qeccaabeeti, ta bushaanoochee shafiraabeeti, maacmanje asho ta tunoon ariitine? Ishigaata, ne getteti ne noonoo ne toommooch nallitone.

²³ Ta gijjoon giixemminaꞌoyich amoyich imaachine? Tawoo waaree ta gijjoon shimona tookkiree deqqesho ta toone?’ iye.

²⁴ “Arooba arooch neexee beetinaꞌon ‘Andoo hini balle xure birewoon bi kishoochee tiijjiree humechoyich imbote’ iye.

²⁵ “Boonoshiyoo worganeꞌi, ‘Doonocho, biich humo beetoche!’ iyeete.

²⁶ “Tunebaani doono boonoshich ishichiꞌi wochiye, ‘Ittoshich gettoye: Beetoyich daakkaa ichemmone. Tunetaa amolla aallo waanee biich beeti giishechewolla tiijjeyemmine.

²⁷ Wotta boonoshi toommooch ta taatemmoyich shunaani ta shixechinaꞌon yeshiree taach hach deebote. Ta aafoochaanoo boonoshin guuribote’ iye” iꞌi gettiye.

Yesuusi Oogoona Yerusaalem Gimo

²⁸ Yesuusi ebin bi gettiti hillooch tiyii, Yerusaalem hammiibee biinna tookkii hammiibeeti asheenaꞌoyee aaf aaf shiichiꞌi hammiye.

²⁹ Zayitee Michi guudooch beeti Beetifaaginaa Bitaaniyinooch katinniichii, bi dabbeenaꞌoochee gutteenaꞌon ishichiꞌi wochehe:

³⁰ “Ittoshiyee aaf beeti gafooch hambote; hami shagiree, koniyoona yebbeyaani kuree bushoo tippeeꞌi beeton danemmo ittoshine; aroon biishiree deebote.

³¹ Asho koniyoona tiyiꞌi ittoshin ‘Amoyichiye ittoshi biichii beeto?’ iꞌi bi echagaata, ‘Doonoyich bi qaaweetoyichiye’ getote” iye.

³² Wocheetinaꞌo hammiꞌi Yesuusi gettitoommon daneheete.

³³ Boonoshiyoo kuree bushoon biichii boonoshi beetaa, kuree dooninaꞌo “Kuree bushoon amoyichiye ittoshi biichii beeto?” iꞌi echeheete.

³⁴ Boonoshiyoo wochiꞌi, “No Doonoyich bi qaaweetoyichiye” iyeete.

³⁵ Boonoshiyoo kuree bushoon yaabiꞌi Yesuus waan deebiyeete. Aroochee are kuree bushoo toommooch boonoshi tahoon yaggiꞌi Yesuusin yebbiiheete.

³⁶ Yesuusi hammii bi beetaa, asheenaꞌo bi hammiibeeti gommooch boonoshi tahoon yaggiyeete.

³⁷ Yesuusinaa dofee asheenaꞌona Yerusaalem katinniꞌi Zayitee Michi guudi dugilloon boonoshi wottemmona, biin dabbii beetinaꞌo bulli emiriꞌi boonoshi beeggiti gaakkechi shuunoo bullich boonoshi qaaroon oogichiꞌi ishichiibee Yeerin galleteheete:

³⁸ “Doono Yeerichi shigoona waabeeti taatoo diireebe! Shimaayooch diggoo, shimaajji shimaayooch beeti Yeerich oogee yiiroo, tunebe!” ii beeheete.

³⁹ Arooba dofee ashi daggooch beeti Fariseenaꞌo daggoochee ikkikkeenaꞌo tiyiꞌi, “Dojjechocho, neen dabbii beetinaꞌon qayote gete” iyeete.

⁴⁰ Yesuusi wochiꞌi “Ittoshich gettoye: Hinoshi cikkii qayigaata, xaqqeenaꞌolla cookemminaꞌone” iye.

Yerusaalemich Yesuusi Eefo

⁴¹ Yesuusi Yerusaalem shagg beddiꞌi katemoon ciinniichii eeppiibee ishichiye:

⁴² “Diggoo daneebeeti gommon hanaachi ittoshi shalligito gaata, gaawetone; tunebaani bi aricheyaachemmoyich ittoshich aacheetone.

⁴³ Gonde moochechi aabo ittoshi toommooch woyemmone; ittoshi etteenaꞌo ittoshin kocha getiree ittoshi katemee guudoon iicheti showee gutoona uxereechi ittoshin kaappemminaꞌone; ittoshi guudoona guudiree bulli gommon hiccemminaꞌone.

⁴⁴ Hini katemeexi asho ittoshinoo, ittoshi bushiishoonoo showoo maanjjemminaꞌone; xaqqo xaqqee toommooch keddeeree bi echemmoyich tuniyachemminaꞌone. Ebiyoo, Yeeri ittoshin wodiiya bi waati aaboon shalligoo ittoshi qajjitoyichiye” iye.

Giixechinaꞌon Yaafee Kexoochee Yesuusi Kichoo

⁴⁵ Aroyee gubb Yesuusi Yeerichi yaafee kexooch giyiye. Giyiꞌi arooch gabiyoo geddiꞌi kemmiibeeti giixechinaꞌo bullin gashee kichiye.

⁴⁶ “Yeeri ‘Ta kexo corootee kexo tunemmone’ iꞌi bi gettito Yaafe Macaafooch kooreetone; tunebaani ittoshi bokkeenaꞌochi gofoon tuniito ittoshine” iye.

⁴⁷ Ebiyee gubb, qemi qemona asheenaꞌoyich yaafee kexoochaa dojjii beehe; tunebaani qeeshee ukkireenaꞌo, Muusichi Sheeree dojjechinaꞌonaa Ayihudee ukkireenaꞌona Yesuusin wuxiya qaawii beeheete.

⁴⁸ Tunetaa dofee asho bulli ottiꞌi bi gettiibeeti mooyon boonoshi ellee beetoyich, boonoshi hallemmi mooyon mucceheete.