Luqaasi 18 - Kafa Linguistics Project

Ikke Xuume Ureenaa Ikke Nallechonochi Shaahiyoo

¹ Ebiyee gubb, taahaanoon bulli aaboon corooteechon Yesuusi ishichiꞌi bi dabbeenaꞌoyich hini shaahiyoona gettiye:

² “Ikke katemooch Yeerin shataani, asho konichona yeelleyaani ikke nallechi uro beehe.

³ Wotta are katemooch ikke xuume ure beehan; are nallechi uro waan bulli aaboon hammaꞌa, ‘Taannaa ta taggechonochi daggeexi mooyon beegiree taach nallibe’ ii beehan.

⁴ “Tunetaa hini are nallechi uro meeti aaboon deꞌa gettemmon qajjiye. Tunebaani ciiroochaa bi mulloona ‘Yeerin shatonaa ashich yeelloonon ta qajjetaanona,

⁵ hini xuumee taan bi iritii beetoyich, biich nallehe; nallaa ta kuxo qayigaata, bulli aaboon wochi wochi waabee taan shuuꞌiiree maraatiyemmine’ iye” iꞌi gettiye.

⁶ Daakkiꞌi Doono Yesuusi ishichiye: “Are nallecho tuneti xumme uro gettiton waayebote.

⁷ Illa Yeeri areddoonaa xumoonon biin qolleebee cookiibeeti bi kaacciti bi aagetoyich nallaachehe? Boonoshin gaacheyaanoon yagehe?

⁸ Ittoshich gettoye: Boonoshich kaateree nallemmone. Tunebaani Ashi Bushoo waahooba, showee toommoochee boonoshi mulloon bi toommooch tooꞌiiꞌi biin quyee beetinaꞌon danehe?” iye.

Ikke Farisoonaa Ikke Gabiyee Guudoonochi Shaahiyoo

⁹ Wotta daakkiꞌi Yesuusi “Cadiqo noone” iꞌi boonoshi qelloon gibeneechii bareenaꞌon hoxee beetinaꞌoyich ishichiꞌi hini shaahiyoon gettiye:

¹⁰ “Gutte asheenaꞌo corootiya yaafee kexooch hammiyeete; boonoshiyoo ikkoo Farisoo, ikkoo gabiyee guudoone.

¹¹ Hini are Farisoo yaafee kexooch neexeechii ishichiꞌi bi mulloona corootiye: ‘Yeero, bare asho bullichoommon, boggecho, xumme moochechonaa shunimaayoona woyee hini gabiyee guudoommonolla tuno ta qajjetoyich, neen galletehoye.

¹² Shabaattee daggooch gutte wottoon coomaabeeto taane; ta danaabeeto bulliichee asraatoon neech kichaabeeto taane’ iꞌi corootiye.

¹³ “Wotta hini are gabiyee guudo yaafee kexooch neexee beetinaꞌoyee wohooch neexeechii bi aafoon kaama tiijjiꞌi shimaajj ciinonolla shunaanoone; tunebaani bi getoon qicciibee, ‘Yeero, axaaxechi taan maaribe’ iibee Yeerin qollehe.

¹⁴ “Ittoshich gettoye: Farisoyee hini gabiyee guudo Yeeri aafoochaa cadiqo tuneꞌi bi kexooch wottehe. Bi qelloon oogiibeeto bulli giishemmone; bi qelloon giishiibeeto bulli oogemmone” iye.

Gishiishi Bushiisheenaꞌon Yesuusi Diiroo

¹⁵ Arooba ikkikke asheenaꞌo “Yesuusi bi kishoon boonoshi toommooch kotiibe” iꞌi gaggere bushiisheenaꞌon bi waan deebiyeete. Bi dabbeenaꞌo ebin beeggiꞌi bushiisheenaꞌon deebiti asheenaꞌon noggeheete.

¹⁶ Tunebaani Yesuusi bushiisheenaꞌon bi waan ceeggiꞌi, bi dabbeenaꞌon “Qayote! Yeerichi taatittine eboshiyoomminaꞌochine; ebich gishiishi bushiisheenaꞌo ta waan wobeete; bajjaahote.

¹⁷ Iberoon ittoshich gettoye: Yeerichi taatittinoon giisheche bushoochoommon deꞌaano arooch cir giyaachemmone” iye.

Gaannechon Iritiibeeti Mooyo

¹⁸ Ebiyee gubb, Ayihudee ukkireenaꞌo daggoochee ikkoo tiyiꞌi Yesuusin “Deꞌe Dojjechocho, bulli yemeenee kashoon ta danemmoyich amoon hallibote?” iꞌi echehe.

¹⁹ Yesuusi wochiꞌi, “Amoyich taan deꞌo ii beetine? Ikke Yeeriyee damba deꞌo koniyoona aalloone.

²⁰ Muusichi Sheeroon ariibeeto neene; aroo ‘Shunoon maayaahine; ashoon wuxiyaahine; gaajjaahine; asho koni toommoochona kootoon miixeyaahine; ne nihoonaa ne indeenon oogiibe’ ii beetone” iye.

²¹ Uroo wochiꞌi, “Ta bushittinoochee tiijjaꞌa ebiich ta beddemmi wottoon ebi bullin ceechito taane” iye.

²² Yesuusi ebin waayeꞌi, “Batt ikke mooyo neech shappitone: Hamiree neech beeto bullin kemiree iriteetinaꞌoyich imbe. Neech shimaajji kexooch kiceeree beeyemmone. Aroyee gubb waaree taan dabbibe” iye.

²³ Tunebaani hini are uro oogeti gaannecho bi tunetoyich, ebin waayeꞌi oogichii ayiniye.

²⁴ Yesuusiyoo oogichii bi ayinoon beeggiꞌi, “Gaannechinaꞌoyich Yeerichi taatittineech gimo am shaahe maggoone!

²⁵ Gaaleyich nappee aahoona besho maggoone; tunebaani gaannechi uroyich Yeerichi taatittineech gimo ebiyee beshoon maggoone” iye.

²⁶ Ishin waayetinaꞌoo “Ishigaata, wodoon hakkemmo konine?” iyeete.

²⁷ Yesuusi wochiꞌi, “Ashich mawiton Yeeri tuniyoyich hakkechone” iye.

²⁸ Arooba Pheexiroosi tiyiꞌi, “Ebiyoche, bullin qajjaꞌa neen dabbito noone” iye.

²⁹ Yesuusiyoo boonoshich wochiꞌi ishichiye, “Iberoon ittoshich gettoye: Yeerichi taatittineyicha iꞌi bi kexon woyee bi mecheen woyee bi maneenaꞌon woyee bi nihoonaa bi indeenon woyee bi bushiishoon qajjito koniyoona, beshoon danemmone;

³⁰ hini yemeenooch beshaa beshoon daakkaa danemmone; wotta woyemmi yemeenoochoo bulli yemeenee kashoon danemmone” iye.

Bi Qitemmon Keejjinnoon Yesuusi Geto

³¹ Yesuusi aaraa gutte bi dabbeenaꞌon bi waan kiciꞌi ishichiye: “Ebiyoche, and Yerusaalem hammaabeeto noone; aroochaa keemechinaꞌo kooriti Ashi Bushoo mooyo bulli ceennemmone.

³² Aageteenaꞌoyich beshiiree immemminaꞌone; boonoshiyoo coonemminaꞌone; naaggemminaꞌone; bi toommooch cuddemminaꞌone;

³³ arengoona xoobbemminaꞌone; aroyee gubb wuxemminaꞌone; tunebaani keejje qemooba qitoochee tiyemmone” iye.

³⁴ Arooba ebi bi gettiti mooyoochee amolla boonoshi mullooch giyaanoone; bi gettiti moochi aafo boonoshich bi aacheetoyich, ebi ama geto gaata ariyaaneenaꞌone.

Qolleebeeti Aaf Doogoon Yesuusi Wodiyoo

³⁵ Yesuusi Yaariki katemooch katinniye; areegaata ikke aaf doogo gijjoon qolleebee gommi gashooch kotee beehe.

³⁶ Are uroo dofee asheenaꞌochi beshoon waayeꞌi, “Ishi amoone?” iꞌi echehe.

³⁷ Asheenaꞌoo “Naazireetechi Yesuusine beshee hammiibeeto” iꞌi biich gettiyeete.

³⁸ Aaf doogoo “Daawiti Bushoo Yesuuso, taach ariqqebe!” iꞌi cookiye.

³⁹ Arooba aaf shiichiꞌi hammii beetinaꞌo are aaf doogoon cikkibe iꞌi noggeheete. Tunebaani aaf doogo “Daawiti Bushoochoo, taach ariqqebe!” iibee beshoon cookiye.

⁴⁰ Areegaata Yesuusi neexeechii asheenaꞌon “Ebi uroon taach deebote” iꞌi gettiye. Yesuus waan bi waammona,

⁴¹ Yesuusi are uroon “Amoon neech ta tuniyemmoyichiye ne qaawaabeeto?” iꞌi echehe. Aaf doogoo wochiꞌi, “Ta Doonocho, ta aafoon ne ciichiyemmoyichiye” iye.

⁴² Yesuusiyoo “Ne aafo ciine! Ta toommooch mulloon ne tooꞌiyoo neen wodiitone” iye.

⁴³ Hini are aaf doogo bekkech ciinniye; aroochee Yeerin galleteebee Yesuusin dabbiye. Asheenaꞌo bulliyoo ebin beeggiꞌi Yeerin galleteheete.