Luqaasi 14 - Kafa Linguistics Project

Biiyechi Uroon Yesuusi Wodiyoo

¹ Shambetooba Yesuusi Fariseenaꞌochi ukkireenaꞌo daggoochee ikkoochi kexooch maayoon maaya giyiye; arooch beetinaꞌo biin manjiiꞌi quyee beeheete.

² Areegaata, bi ashittino bulli nafiti uro bi aafooch beehe.

³ Yesuusiyoo tiyiꞌi Muusichi Sheeree dojjechinaꞌonaa Fariseenaꞌonon “Shambetooba biiyeton wodiyoon Muusichi Sheeroo daaggitee daaggaache?” iꞌi echehe.

⁴ Tunebaani boonoshi cikkii qajjiyeete. Ebich Yesuusi hini are biiyechon yechii bi biiyoochee wodiiꞌi daachiihe.

⁵ Arooch beetinaꞌonoo “Bi bushoo woyee bi gattoo aachi oppooch bi dihigaata, shambetoo bi tunetaanoona, bekkech are oppoochee geechi kichaachemmo ittoshi daggoochee konine?” iꞌi echehe.

⁶ Ebi echoon biich wochemmon mawiiheete.

Qellee Giishiyeechonaa Iibbee Iibbiyeechonon Yesuusi Dojjoo

⁷ Yesuusi gifirooch ataalleeti asheenaꞌo oogee xaaꞌoon boonoshi heppii yeshon beeggiꞌi ishichii shaahiyoon gettiye:

⁸ “Koniyoona gaaree maayoon mamoyich neen bi ataalli gaata, hamiree kotee xaaꞌoon heppiree oogee xaaꞌooch koteyaahine; diqqich neyee beshe oogoo ataalleeto tunemmone

⁹ Ittoshi guttin ataallito are kexooch giyiꞌi, ‘Ebi oogee xaaꞌoon hini uroyich gawukkibe’ bi getigaata, arooba yeellebee tiyi desh qach kotemmo neene.

¹⁰ Ebich asho neen gifirooch bi ataalli gaata, hini are neen ataalliti uro waaꞌi, ‘Ta xiboocho; damba ebiich hami kotebe’ getiree bi ataallemmoyich hami desh qach kotebe. Arooba neenna tookkii kotetinaꞌo bulli aafoochaa oogemmo neene.

¹¹ Illa bi qelloon oogiibeeto bulli giishemmone; bi qelloon giishiibeeto wotta oogemmone” iye.

¹² Aree hillooch Yesuusi gifiroon ataalliti uroon wotta ishichiye: “Areddoonoo tuneba xumoon, gifiree maayoon ne qanniihooba, boonoshi wotta diqqich ataalliree keroon neech boonoshi wochaachemmoyich, ne shunechinaꞌonaa ne maneenaꞌonon, ne xibeenaꞌonaa gaannechi ne giyeenaꞌonon ataalliyaahine.

¹³ Tunebaani gifiree maayoon ne qanniihooba, girechinaꞌon, kisha kuxeenaꞌonaa baata kuxeenaꞌonon, baata yesheenaꞌonaa aaf doogeenaꞌonon ataallibe.

¹⁴ Eboshi aree keroon wochoo hakkaaneenaꞌo boonoshi tunetoyich, Yeeri neen diiremmone; wotta cadiqeenaꞌo qitoochee boonoshi tiyiyooba, Yeeri neech ebichi keroon wochemmone” iye.

Ooge Gifiree Maayee Shaahiyoo

¹⁵ Arooba arooch Yesuusina tookkii kotetinaꞌo daggoochee ikkoo bi gettiton waayeꞌi, “Yeerichi taatittineech giyiree gifiroon maayemmo diireetone” iye.

¹⁶ Tunebaani Yesuusi ishichiꞌi wochiye: “Ikke uro oogeti gifiree maayoon qanniiꞌi meeti asheenaꞌon ataalliye.

¹⁷ Gifiree maayo manjeyemmi saatooch bi wochee bushoon ‘Ataalleeti asheenaꞌo waan hamiree, “Gifiree maayo qannitone; wobote” gete’ iꞌi wochehe.

¹⁸ “Tunebaani hini are wochee bushoo hammiꞌi bi gettitaa, boonoshi bulli qayi echeya maroon halliyeete. Batti batt ataalleeti uro ‘Showoon kemeto taane; are ta kemeti showoon beegoyich hammaabeeto taane; ebich taan maaribe’ iye.

¹⁹ “Bi hilleexi ataalleeto wotta ‘Uuche kashee gatteenaꞌon kemeto taane; xandiree beegga daammaabeeto taane; ebich taan maaribe’ iye.

²⁰ “Baroo wotta ‘Mecheen shaaggeto taane; woꞌee ikkeetin duppaachaa hamon hakkaache’ iye.

²¹ “Ebich are wochee bushoo kexooch wottee hammiꞌi ebi bullin bi doonoyich gettiye. Arooba kechi doono kaareꞌi tiyii, wochee bushoon ‘Wochinnoon kaateree katemee daggeexi keejje kaattoonaa gommo bullinooch keyiree girechinaꞌon, kisha kuxeenaꞌonaa baata kuxeenaꞌonon, aaf doogeenaꞌonaa baata yesheenaꞌonon ataalliree hach deebe’ iꞌi daachiihe.

²² “Are wochee bushoo bi wocheetooch hammii shaggii wotteꞌi, ‘Ta doonocho, ne wocho bullin ceechito taane; tunebaani batt kexooch ceenaan beetinaꞌone’ iye.

²³ “Ebich doono bi wochee bushoon ‘Ta kexooch asho ceennemmoyich hini katemoochee maach keyiree gommonaa uxeree gashoonoochee qaawi manjii getiree deebe.

²⁴ Ittoshich gettoye: Batti batt ataalleeti asheenaꞌoochee ikkolla ta gifiree maayoochee mamo qayaa, nappheree beegaachemmone’ iꞌi gettiye” iye.

Yesuusin Dabboyich Ashi Waanee Qochemmi Gatiyoo

²⁵ Dofee asheenaꞌo Yesuusina tookkii hammii boonoshi beetaa, Yesuusi boonoshi waan guuddii wotteꞌi ishichiye:

²⁶ “Ta waan woyemmo koniyoona bi beegaata, bi nihoonaa bi indeenoyee, bi mecheenaa bi bushiisheenaꞌonoyee, bi anaami maneenaꞌonaa bi maache maneenaꞌonoyee, bi hajjee kashoyeenolla beshiiꞌi taan shuno bi qayigaata, taan dabboon hakkaache.

²⁷ Bi masqaloon shaaggiꞌi taan dabbaani asho koniyoona ta dabboo tunoon hakkaache.

²⁸ “Ittoshi daggoochee konine ooge xaqqee kexon hagga gabiꞌi are shuunoon shuune bi ciichemmi gijjee beemonaa aalloonon xiishoyich shiichii koteꞌi gabaano?

^29-30 Baashiichii haggii ciichoo biin bi mawigaata, ebin beeggimmo bulli ‘Hini uro hagga baashiichii ciichoo mawiihe’ getiree coonemmone.

³¹ “Wotta ‘Bare taatoona koyebona’ iꞌi hiye hume ginechon yechiꞌi waabeeti taatoon aashire hume ginechona kechii koyeꞌi wochoyich, shiichi koteree bi giidoon qoppaachemmi taatoo konine?

³² Bi hakkaachemmo tunegaata, batt wohooch bi beetaa, geenoon wocheꞌi shunoon qollehe.

³³ Illa ebiyoommon ittoshi daggoochee koniyoona biich beeto bullin bi qayaan gaata, taan dabboon hakkaache” iye.

Noocaani Kiiho

³⁴ “Kiiho gaawetone; tunebaani kiiho noocon bi qayigaata, are kiihon amoona noociiyehote?

³⁵ Are kiiho guudoona tookkii duppeꞌinoo showoon yeeꞌiyaache; iboona tookkii duppiteenoo showoon qeechiyaache; ebich maaxoochiye kichiree ittoshi duppemmo. “Illa waayeebeeti waajjecho waayebe” iye.