Luqaasi 13 - Kafa Linguistics Project

Yeer Waan Wotteyaani Asheenaꞌo Qitoo

¹ Arooba asheenaꞌo Yesuus waan waaꞌi, “Galiilee asheenaꞌo daggoochee ikkikkeenaꞌo deejjoon boonoshi deejjii beetaa, Phelaaxoosi boonoshin wuxiꞌi boonoshi damoon deejjoona baccitone” iꞌi gettiyeete.

² Yesuusiyoo wochiꞌi boonoshich ishichiye: “Hini are Galiilee asheenaꞌo ebiyoommona boonoshi qititoyich, bare Galiilee asheenaꞌo bulliyee beshe axaaxechinaꞌo ittoshich shaahii beeteete?

³ Ittoshich gettoye: Ebi toonoone! Tunebaani axaaxee gommoochee Yeer waan wottoo ittoshi qayigaata, ittoshi bulli ebiyoommon aallemmo ittoshine.

⁴ Wotta Silohami kote aachi gaꞌooch hakketi ooge xaqqee dilaaloo shekireꞌi wuxiti aaraa shimitte asheenaꞌo Yerusaalem beeti bare asheenaꞌo bulliyee beshe gondoon shuunetinaꞌo ittoshich shaahii beeteete?

⁵ Ittoshich gettoye: Ebi toonoone! Tunebaani axaaxee gommoochee Yeer waan ittoshi wottoo qayigaata, ittoshi bulli ebiyoommon aallemmo ittoshine” iye.

Aafeyaani Balaasee Michi Shaahiyoo

⁶ Yesuusi ebi shaahiyoon ishichiꞌi gettiye: “Ikke uroyich bi bechiti meeti woyinee goyee daggooch becheeti ikke balaasee mixi beehan. ‘Are balaaseech aafo beeyemmone’ ii hammiꞌi amoonolla muccehe.

⁷ Biyoo woyinee goyee quyechon ‘Hini balaasee mixiichee aafoon daneya besheti keejje naton bi aafemmi goorooch shaꞌaabee amoonolla daneyaano taane. Kuxiree baye; amee naboyichiye gamini xaaꞌoon baad yechaa bi duubiibeeto?’ iye.

⁸ “Tunebaani woyinee goyee quyecho wochiꞌi, ‘Doonocho, bi guudoon goyiree iboon ta tiqqiitaa, eke bekkebuye. Hini naton wotta haaꞌiibe.

⁹ Gubbich bi aafegaata, beebuye. Qajjaa bi mawigaata, arooba kuchebuye’ iꞌi gettiye” iye.

Goobeti Ureen Yesuusi Wodiyoo

¹⁰ Shambetooba Ayihudeenaꞌo kiceebeeti kexinaꞌoochee ikkoochaa Yesuusi boonoshich dojjii beehe.

¹¹ Arooba maachi biiyoona yechaꞌa aaraa shimitta natteti ure are ashi daggooch beehan; ureyoo are biiyee naboona goobetine; kaamaꞌa neexoonoo hakkaaneene.

¹² Yesuusiyoo hini are ureen ciinniꞌi, “Haane, ta waan wobe” iye. Bi waammona, “Ne biiyoochee wodibe” iye.

¹³ Bi kishoonoo ure toommooch bi kotiitaa, kaamaꞌa neexahan; aroochee Yeerin galletahan.

¹⁴ Tunebaani Ayihudeenaꞌo kiceebeeti kechi ukkiroo, Yesuusi shambetooba ureen bi wodiitoyich ippeꞌi tiyii arooch beeti dofee asheenaꞌon “Muusichi Sheeroo ikke shabaattee daggooch shiritte qemon no shuunemmoyich daaggitone; ebi are shiritte areddee daggooch waaree ittoshi biiyoochee wodibotalli, shambetooba tuneyaachemmone” iye.

¹⁵ Arooba Doono Yesuusi tiyiꞌi, “Hini ittoshi maacoon xalloo shaahiibeeti asheenaꞌote! Ittoshi daggoochee shambetooba bi gattoon woyee bi kuroon bi tippetoochee biichiꞌi aaco uchiya daamaano konine?

¹⁶ Aaraa shimitte nati wottoon Sheexaanoo cuchiti hini Abrahami yareexi ureen shambetooba ebi bi cuchetoochee biich bedaachote?” iye.

¹⁷ Ebin Yesuusi yibbaatee bi beetaa, bi shuunoon bayoyich qiiccetinaꞌo bulli yeelleheete; tunebaani ebi shaahe worganikkiti mooyo bullin bi shuunetoyich, asheenaꞌo bulli emiriyeete.

Shanaafee Aafee Shaahiyoo

¹⁸ Ebiyee gubb, Yesuusi ishichiye: “Yeerichi taatittine am shaaheene getote? Woyee amee shaahiyoona shaahiibote?

¹⁹ Asho daammii bi daaddooch shookkiti shanaafee aafeeniye bi shaahaabeeto. Collaꞌa bi diccehooba mixochoommon gafgappahan; shimaajji kafeenaꞌo waaꞌi bi atooch koteheete” iye.

Bukee Shittee Shaahiyoo

²⁰ Wotta Yesuusi “Yeerichi taatittine am shaaheene getote?

²¹ Ikke ure bukoo tiyimmi wottoon daammaꞌa keejje qunnee buddinoona tookkaa xiriqqaꞌa bi kotiiti bukee shittoommine” iye.

Xebbe Kello

²² Ebiyee gubb, Yesuusi Yerusaalem hammiibee, katemeenaꞌonaa gafeenaꞌonooch beetinaꞌoyich dojjiibee beshehe.

²³ Arooba ikke uro Yesuusin “Doonocho, wodemminaꞌo giishecheenaꞌone?” iꞌi echehe. Yesuusiyoo wochiꞌi arooch beeti asheenaꞌoyich ishichiye:

²⁴ “Xebbe kelloona gimoyich qiiccebote. Ittoshich gettoye: Meetinaꞌo gimoyich qaawemminaꞌone; tunebaani hakkaacheete.

²⁵ Kechi doono kotoochee tiyii kelloon bi tuggemmona, ittoshi maaxooch neexeechi, ‘Doonocho, nooch qechibe’ getiree kelloon qoppemmo ittoshine. “Biyoo ittoshich wochiree, ‘Koni ittoshi gaata, amoochee ittoshi waato gaatoo, ariyaano taane’ gettemmone.

²⁶ “Arooba ‘Neenna tookkaa maato noone; ucheto noone; no addibaaboochaa nooch dojjito neene’ getooch giyemmo ittoshine.

²⁷ “Biyoo ‘Ittoshich gettoye: Koni ittoshi gaata, amoochee ittoshi waato gaatoo ariyaano taane; hini hukkechinaꞌote, ittoshi bulli ta waanee wohote’ gettemmone.

²⁸ “Abrahaminaa Yisaaqina, Yaaqobinaa keemechinaꞌo bullina Yeerichi taatittineech giyii boonoshi kotoon ittoshi beegiyooba, ittoshiyoo maaxooch dupperee echeechi, aroochaa eefonaa gashee qaayona ittoshich tunemmone.

²⁹ Wotta asheenaꞌo aabi-keyonaa aabi-gimonoochee, deshi-waaninaa dambi-waaninoochee woyemminaꞌone; Yeerichi taatittineech giyiree gifiree maayoon maaya kotemminaꞌone.

³⁰ Illa ebiyoche, gubbetinaꞌo getteetinaꞌoochee ikkikkeenaꞌo shiichemminaꞌone; shiichitinaꞌo getteetinaꞌoochee ikkikkeenaꞌo gubbemminaꞌone” iye.

Yerusaalemi Asheenaꞌon Yesuusi Shuno

³¹ Arooba Fariseenaꞌo daggoochee ikkikkeenaꞌo Yesuus waan giddeꞌi, “Heroodisi neen wuxiya qaawii beetone. Ebich hiniichee tiyiree hambe” iyeete.

³² Boonoshichoo ishichiye: “Hamiree okk ebi boqqelloyich, ‘ “Hanaachinaa yaachinon asheenaꞌo toommoochee yinneenaꞌon yookkemmo taane; biiyetinaꞌonoo wodiyemmo taane; sharittane hini shuunoon ta ciichemmo” itone’ getote.

³³ Tunebaani keemecho Yerusaalemaanalli maachaa qitaachemmone; ebich hanaachinaa yaachina, sharittoo ta gommon qaxiremmo taane.

³⁴ “Keemechinaꞌon wuxiibeeti hini Yerusaalemi asheenaꞌote! Ittoshi waan wocheetinaꞌon xaqqoona yexxii wuxii beetinaꞌote! Baakkee bi bushiishoon bi qoshee daggooch bi guufoommon, tawoo ittoshin kicoyich ambiche wottoon shunnetote! Tunetaa ittoshi qaawaano ittoshine.

³⁵ Ebiyoche, ittoshi kexo onoo tuneree echemmone. Ittoshich gettoye: ‘Doono Yeerichi shigoona waabeeto diireebe!’ ittoshi immi wottoon taan cir beegaachemmo ittoshine” iye.