Luqaasi 11 - Kafa Linguistics Project

Corootoon Yesuusi Dojjoo

¹ Ikke areddoon Yesuusi ikke xaaꞌooch corootii beehe. Corootoon bi ciichitoyee gubb, bi dabbeenaꞌoochee ikkoo tiyiꞌi, “Doonocho, Yowannisi bi dabbeenaꞌon bi dojjitoommon ama getiree no corootemmo gaata noon dojjibe” iye.

² Ebich Yesuusi boonoshich ishichiye: “Ittoshi ishichi corootibote: ‘[Shimaayooch beeti] no Nihoocho! Yaafe ne shigo oogebe! Ne taatittino bulli toommooch bede!

³ Heeyi koshon qemi qemona nooch imbe!

⁴ No wotta noon xuqqitinaꞌo bullin no maarii beetoyich, no gondoon nooch maaribe! Gondoochi nihoo dachooch noon geddaahine’ ” iꞌi gettiye.

⁵ Ishichiinoo iye: “Ittoshi daggoochee shunecho biich beeti ikke asho, xumee gutte qellimooch are bi shunecho waan hammiꞌi, ‘Ta manoocho, keejje koshon taach erettiibe!

⁶ Ikke ta shunecho gommoochee ta waan bi waataa, ta immemmo amolla aallehe’ bi getaa,

⁷ aroo kechi maac beechi ‘Taan iritiyaaye; and kelloon tuggeto taane; tawoo, ta bushiisheenaꞌoo tokketeto noone; tiyaꞌa neech imon hakkaache’ gettehe?

⁸ Ittoshich gettoye: Shunecho bi tunetoyich tiyii imo bi qayi gaatoona, wochii wochii bi cookoyicha geti tiyiree bi echeto bullin immemmone.

^9-10 “Tawoo ittoshich gettoye: Yeerin qollebote; ittoshich immemmone. Yeer waanee qaawibote; danemmo ittoshine. Bi kelloonoo qofote; ittoshich qechemmone. Yeeri biin qolleebeeto bullich immemmone; qaawiibeeto bulliyoo Yeer waanee danemmone; bi kelloon qoppiibeeto bullichoo qechemmone.

¹¹ “Ittoshi daggoochee nihoo tuneti asho bi bushoo haashoon maaya bi qolletaa, haashee qoodoon dingeroon immehe?

¹² Woyee gabexoon maaya bi qolletaa, barahee machoon immehe?

¹³ Gondo ittoshi tunetaanoona, ittoshi bushiisheenaꞌoyich deꞌe mooyon imon ariibeeto ittoshine. Illa shimaayooch beeti ittoshi Nihoo Yeeri biin qollee beetinaꞌoyich Yaafe Ayaanoon am shaahoon beshaa beshiiree immehe!” iye.

Yesuusinaa Beelzebulina

¹⁴ Ikke areddoon, Yesuusi miime yinnoon ikke uro toommoochee yookkiye. Bi yookkitoyee gubb noona miime uro yibbaatehe; dofee asheenaꞌoo worganeheete.

¹⁵ Tunetaa boonoshi daggoochee ikkikkeenaꞌo “Yinnee taatoo Beelzebulichi giidoonane yinnoon asheenaꞌo toommoochee bi yookkiibeeto” iyeete.

¹⁶ Bareenaꞌoo wotta biin muriciiya iꞌi, “Shimaayoochee malletoon nooch bekkiibe” ii echeheete.

¹⁷ Tunetaa Yesuusi boonoshi gaboon ariiꞌi boonoshich ishichiye: “Ikke taatittineech beeti asheenaꞌo boonoshinaa boonoshina shacegaata, are taatittine aallemmine; wotta ikke kexooch beeti asheenaꞌo boonoshinaa boonoshina shacegaata, are kexo dihishiye bi gettemmo.

¹⁸ Taanoo ‘Beelzebulichi giidoona yinnoon asheenaꞌo toommoochee yookkehine’ iyote; illa Sheexaanee naayinaꞌo wotta boonoshinaa boonoshina shacegaata, bi taatittine aabichiree neexehane?

¹⁹ Tawoo Beelzebulichi giidoona yinnoon asheenaꞌo toommoochee yookkaabeeto ta tunegaata, ittoshi bushiisheenaꞌochi konichi giidoonane boonoshi yookkiibeeto? Ebich boonoshine ittoshi toommooch nallemminaꞌo.

²⁰ Tunebaani ta Yeerichi giidoona yinnoon yookkaabeeto ta tunegaata, illa Yeerichi taatittine ittoshi waan shaggetine.

²¹ “Ikke giidechi uro gaachoonaa ginoonon yechiꞌi bi kexon bi quyegaata, bi gijjoo gaacheyaache.

²² Tunebaani biyee beshe giidecho waa biin kochiꞌi bi yeshigaata, bi gibeneti gaachoonaa ginoonon boggemmone; bi gijjoonoo keciree daami bi guuphinaꞌoyich qoodemmone.

²³ “Taanna tookkii neexeyaano taan shixxii beetone; taanna tookkiinoo kicaano shaccii beetone” iye.

Bi Kechiti Kexooch Yinno Wotteꞌi Gimo

²⁴ Yesuusi daakkiꞌi ishichiye: “Yinno ashi toommoochee bi tiyitoyee gubb, bi kashemmi xaaꞌoon qaawiibee aachaalli showoona guuddiye; guuddii mucceꞌi, ‘Ta kecheti kexooch wotteree hami gibona’ ii

²⁵ wottee bi waahaa, are bi kechiti kexo hidaa qanniꞌi beeton beeggiye.

²⁶ Aroyee gubb hammiꞌi biyee gonde shabaatte bare yinneenaꞌon kicii dabbii deebiye; boonoshiyoo biinna tookkii arooch giyiꞌi koteheete; are uroyichoo aafichoyee andi beemo biich beshoon gondehe” iye.

Ibere Diiroo

²⁷ Yesuusi ebin gettii bi beetaa, dofee ashi daggoochee ikke ure bi qaaroon oogichaꞌa biich “Neen shiyeti maacechi, neen xaachiti xachechi diireetine” iyan.

²⁸ Tunebaani Yesuusi “Beshoon diireetinaꞌo Yeerichi qaaroon waayeꞌi ceechii beetinaꞌone” iye.

Malletee Bekkiyoon Yesuusi Qayo

²⁹ Dofee asheenaꞌo bi waan kicee waa beetaa, Yesuusi ishichooch giyiye: “Hini shiijjeroo gonde shiijjeroone; malletoon beegoyich qaawii beetone; tunetaa Yoonaasichi malletoyee besh bare malletoo biich icheyaachemmone.

³⁰ Yoonaasi Nanawi katemeexi asheenaꞌoyich malletoo bi tunoommon, ebiyoommon Ashi Bushoo wotta hini yemeenee ashich malletoo tunemmone.

³¹ Deshi-waanee waati taatee nallaa gallooba neexeree hini yemeeneexi asheenaꞌon taggemmine; ebiyoo Solomooni gettiibeeti shalligoon waayoyich showee tuggoochee bi waatoyichiye. Ebiyoche, Solomooniyee besho hiniich beetone.

³² Nanawi katemeexi asheenaꞌo nallaa gallooba neexeree hini yemeeneexi asheenaꞌon taggemminaꞌone; ebiyoo Yoonaasi Yeerichi wochoon getaa waayeꞌi, axaaxee gommoochee Yeer waan boonoshi wottetoyichiye. Ebiyoche, Yoonaasiyee besho hiniich beetone” iye.

Ashittinee Ceecheechon Yesuusi Dojjoo

³³ “Koniyoona ceechoon bi ceechigaata, kexooch giyii beetinaꞌoyich bi bekkemmoyich xallooch kotiihalli, aashooch kotiyaache; woyee bi toommooch gafetoon guufaache.

³⁴ Ashittinee ceechoo geto aafoone. Illa ne aafo iiwoo bi tunegaata, ne ashittino bulli wotta biremmone; tunetaa ne aafo biiyecho bi tunegaata, ne ashittino wotta manderemmone.

³⁵ Illa ne waan beeti ashittinee ceechoo bi tahaachemmoyich, ne qelloon quyebe!

³⁶ Illa ne ashittinee daggooch beeti bekkoon yiiree manderiibeeti deebo aallegaata, ne ashittinoo biroo bi tunegaata, ceechoo aaxxeꞌi bi bekkoommon bulli ne ashittino bekkemmone” iye.

Sheeree Dojjechinaꞌonaa Fariseenaꞌonochon Yesuusi Geto

³⁷ Yesuusi yibbaatee toommooch bi beetaa, Fariseenaꞌo daggoochee ikkoo bi kexooch hamiree maayoon bi maayemmoyich Yesuusin ataalliye. Ebich uroo kexooch hammii giyiꞌi biinna tookkii kotehe.

³⁸ Yesuusi maayoon maataan beechii, Ayihudeenaꞌochi doyoochoommon machee bi qayon are Farisoo beeggiꞌi worganehe.

³⁹ Tunebaani Doono Yesuusi biich ishichiye: “Farisoo tuneti asho ittoshi bulli xoofoonaa shaatoonochi qeddoon machiyote; tunebaani ittoshi maacooch bogoonaa gonde gaboona ceennitone.

⁴⁰ Hini mullaalleenaꞌote, maachi achoon hallito maacichon wotta hallaache?

⁴¹ Ittoshi xoofoonaa shaatoonooch beeton amolla aalloyich wojjibote; arooba bulli mooyo ittoshich xallemmone.

⁴² “Tunebaani hini Fariseenaꞌote, kefoonaa caddiraammoonoochee, daaddeexi cinnechi bechoo bulliichee asraatoon Yeerich kichiyote; tunebaani tachiꞌi nalloonaa Yeerin shunonon qajjitote; are Yeerich ittoshi kichii beeton qayaanoon, eboshinoo wotta tuniiya bedo ittoshine. Ebich ittoshich woowo!

^43-44 “Hini Fariseenaꞌote, Ayihudeenaꞌo kiceebeeti kexoochaa genje gabberoon, wotta gabiyee godoochaa ‘Showooch qebona’ ii beeti diggiyoon ittoshi shunnii beetoyich ittoshich woowo! Asho ariyaanoon bi toommona shaꞌeebeeti, uxeraalli maashoon ittoshi shaahii beetoyich, ittoshich woowo!” iye.

⁴⁵ Muusichi Sheeree dojjechinaꞌo daggoochee ikkoo wochiꞌi, “Dojjechocho, ishichoo wotta noon naagone” iye.

⁴⁶ Yesuusiyoo ishichiꞌi wochiye: “Ittoshi wotta hini Muusichi Sheeree dojjechinaꞌote, beshe magge shaagoon ashi toommooch minjiyote; ittoshi ikke yaphereenolla are shaagoon yeshachote. Ebich ittoshich woowo!

⁴⁷ “Ittoshi qaabbechinaꞌo wuxiti keemechinaꞌo duukketi maashee toommooch kexon haggiyote. Ebich ittoshich woowo!

⁴⁸ Illa ittoshi qaabbechinaꞌo wuxiti keemechinaꞌo maashooch kexon hagona, boonoshi gonde shuunoon xiishiibeeti miixoo ittoshine.

⁴⁹ Ebich Yeerichi shalligoo ishichiye: ‘Boonoshi waan keemechinaꞌonaa mishiraachechinaꞌonon daachiyemmo taane; boonoshi daggoochee ikkikkeenaꞌon wuxemminaꞌone; ikkikkeenaꞌon duꞌiyemminaꞌone’ itone.

^50-51 Yeeri alemoon bi halliti aaboochee tiijjiꞌi ufeti keemechinaꞌo bulli damoon Abeelichi damoochee tiijjiꞌi, deejjee gudoonaa yaafee kechi gutte daggoonoochaa boonoshi wuxiti Zakaariyaasichi damooch beddaahaa, ufeti damoon Yeeri hini yemeenee asheenaꞌo waanee echemmone. Andoo ittoshich gettoye: Hini yemeenee asheenaꞌo waanee echemmone.

⁵² “Hini Muusichi Sheeree dojjechinaꞌote, ariyee kelloon qechiibeeti qulfoon ashich aachito ittoshine; ittoshiyoo giyaano ittoshine; giya qaawii beetinaꞌoyichoo bajjito ittoshine. Ebich ittoshich woowo!” iye.

^53-54 Aroochee Yesuusi tiyiꞌi bi hammii beetaa, Muusichi Sheeree dojjechinaꞌonaa Fariseenaꞌona ippeꞌi echoona biin iritiiheete; bi noonoochee mooyon daneya ottiibee, diqqoona biin battiiree yibbaatiiya qiicceheete.