Luqaasi 1 - Kafa Linguistics Project

Hini Mishiraachoon Luqaasi Kooriti Naboo

^1-2 Iraano Teefilooso, batti batt boonoshi hajjee aafoona hini mooyinaꞌon beeggiꞌi mishiraachee qaaroon gettechinaꞌo nooch boonoshi arichiitoommon, ebiyee aaf no daggooch tuneti mooyon meetinaꞌo yaari yaaroona koorooch giyitinaꞌone.

^3-4 Ebich ta wotta ne doyiti mooyinaꞌo, gibeneetinaꞌo boonoshi tunoon ne ariyemmoyich, hini mooyinaꞌo bullin xepphoochee tiijjii xiishoona boshaa ta beeggetoyee gubb, yaariꞌi neech kooroo gaaweto shaahiꞌi taach bekkehe.

Aacona Afaallechi Yowannisi Shiijjemmo Shiichiꞌi Getteyoo

⁵ Yihudee taatoo Heroodisi taatee beehooba, Yeerich maddeebeeti Abiyi guuphi daggooch Zakaariyaasi getteebeeti ikke qeeshoo beehe; bi mechee Haroonichi yareene; bi shigoo Elsabeexi getteehe.

⁶ Gutteenaꞌoo Doonochi getoonaa qociyonoochee ikkoonolla shappayaanoon ceechii beetinaꞌone; Yeeri aafoochoo cadiqeenaꞌone.

⁷ Elsabeexi shiyaani xaafee bi tunetoyich, bushaalleenaꞌone; ebiyeenoo geenetinaꞌone.

⁸ Ikke areddoon Zakaariyaasi beeti guuphoyich Yeerich maddee kaallo shagaa, Zakaariyaasi Yeerich maddee bi beetaa,

⁹ qeesheenaꞌochi doyoommon Doonochi yaafee kexooch giyiꞌi ixaanee shookki ixoo biin yechiye.

¹⁰ Ixaano shookkeebeeti saatooch dofee asheenaꞌo bulli maaxooch neexeꞌi corootii beeheete.

¹¹ Arooba Doonochi maraakoo ixaanee deejjee gudoochaa qanne badd neexeꞌi biich bekkehe.

¹² Zakaariyaasiyoo beeggiꞌi keqqiye; oogeti shato biin yechiye.

¹³ Tunebaani are maraakoo ishichiye: “Zakaariyaaso, shattaahine; Yeeri ne corootiti corootoon waayetone. Ne mechee Elsabeexi anaami bushoon neech shiyemmine; bi shigoonoo Yowannisi getiree shigiyemmo neene.

¹⁴ Biinna emiroo, emiroona wucwucoo neech tunemmone; oogeti emiroon danemmo neene; bi shiijjo meetinaꞌon oogichi emirikkemmone.

¹⁵ Biyoo Doonochi aafooch oogemmone; wotta woyinee uyoonaa mashiibeeti bare uyo bullinon uyaachemmone; shiijjeyaanoon bi indee maacooch beebee, Yaafe Ayaanoona ceennemmone.

¹⁶ Israꞌeelee yoodoochee meetinaꞌon boonoshi Doono waan wochemmone.

¹⁷ Biyoo ‘Doono Yeerich maddeya beddimmi aagetoon qanniibona’ getiree niheenaꞌo mulloon bushiisheenaꞌo waan, Yeerich deꞌa getaaneenaꞌonoo cadiqeenaꞌochi shalligoo waan wochoyich, Eliyaasi toommeexi ayaanoonaa giidoona bi toommooch kindaa, Doono aafooch shiichemmone” iye.

¹⁸ Zakaariyaasiyoo are maraakoyich “Ebin amoona ariyehote? Ta gaata geeneto taane; ta mecheyoo geenetine” iye.

¹⁹ Maraakoo wochiꞌi, “Ta Yeeri aafooch neexaabeeti Gabreeli taane; neech ta gettemmoyich, hini mishiraachoonoo neech ta bechemmoyich Yeeri taan ne waan wochetone.

²⁰ Tunebaani ne, ebi aabo ceenaa Yeeri ceechemmi, ta getteti qaaroon iberiyaache ne itoyich, hini mooyo ceennimmi aabee wottoon yibbaateyaani miimeto tunemmo neene; yibbaatoonoo hakkaachemmo neene” iye.

²¹ Ebi bulli tunemmi wottoon asheenaꞌo Zakaariyaasin quyee beeheete; “Yaafee kechi maacooch amoyich yagiye?” iꞌi shaammiyeete.

²² Aroochee kechiꞌi boonoshich yibbaatemmon mawiihe. Ebich yaafee kexoochaa yaaꞌoon beeggito bi tunoon ariiheete. Biyoo bi kishoona malletee bekkii beehe; miimeton tuneꞌi beehe.

²³ Yeerich bi maddeebeeti aaboon ciichiꞌi bi kexooch wottehe.

^24-25 Ebiyee gubb, Zakaariyaasi mechee Elsabeexi yeqqefehan; areyoo “Yeerine ebin taach tuniito; ashi aafooch ta yeellaabeeti yeelloon beeggiꞌi ta achoochee shoottitone” iyaꞌa uuche agenee wottoon maach kechaa ashoona daneyaanoon kexooch kotahan.

Yesuusi Shiijjo Shiichiꞌi Getteyoo

²⁶ Ebiyee gubb, Elsabeexi yeqqefeti shirittinnee agenooba Yeeri bi maraakoo Gabreelin Galiilee showooch beeti Naazireeti katemooch,

²⁷ Daawiti yaroochee tuneti Yooseefi getteebeeti uro shaagga bi maakkiiti ikke gidiidee waan wochehe; gidiideechi shigoo Maariyami getteehe.

²⁸ Are maraakoo bi waan waaꞌi, “Doono Yeeri gaawe aafoona ciinnitine! Diggoo neech tunebe! Doono neenna tookkii beetone. [Ne, maacheenaꞌo daggoochee diireeti neene]” iye.

²⁹ Maariyamiyoo are maraakoo gettiton waayaꞌa keqqiyan. “Ebi amee diggiyoone?” iyaꞌa bi mulloona kichii kindiiꞌa gabiyan.

³⁰ Maraakoo biich ishichiye: “Maariyame, shattaahine! Yeeri gaawe aafoona neen ciinnitone.

³¹ Yeqqeferee anaami bushoon shiyemmi neene; bi shigoonoo Yesuusi getiree shigiyemmi neene.

³² Biyoo oogoo tunemmone; Beshoo Yeerichi Bushoo getteyemmone; bi qaabbechi taatoo Daawitichi taatee qeenonoo Nuggishoo Doono Yeeri biich immemmone.

³³ Biyoo bulli yemeenoon Yaaqobichi yaroo toommooch taatemmone; bi taatittinoyich ciiro aalloone” iye.

³⁴ Maariyamiyoo are maraakoon, “Anaamona danaa ariyaache; ebi aabichiree tunehe?” iyaꞌa echahan.

³⁵ Wotta hini are maraakoo wochiꞌi ishichiye: “Yaafe Ayaano ne toommooch woyemmone; Beshoo Yeerichi giidoo ne toommooch yiiremmone; ebich wotta ne shiyemmi bushoo yaafoo getteyemmone; ‘Yeerichi Bushoo’ getteyemmone.

³⁶ Ebiyoommon ne xibee Elsabeexiyolla wotta geenoochaa anaami bushoon yeqqefetine; xaafee getteeti and bi yeqqefeto shirittinnee agen bedditone.

³⁷ Yeerin mawemmi mooyo amolla aalloone” iye.

³⁸ Maariyamiyoo wochaꞌa, “Ne getteto tunebe; tawoo Yeerichi gonnee taane” iyan. Hini are maraakoo bi waanee wotteꞌi hammiye.

Elsabeexin Beegga Maariyami Hamo

³⁹ Arooba Maariyami tiyaa Yihudee showeexi geppechi katemooch kaataꞌa hammahan.

⁴⁰ Zakaariyaasi kexooch giyaꞌa Elsabeexin diggiihan.

⁴¹ Elsabeexiyoo Maariyamichi diggiyee qaaroon bi waayemmona, yeqqefoo bi maacoochaa tuguceeꞌi capphiye. Bekkech Elsabeexi Yaafe Ayaanoona ceennaꞌa,

^42-43 bi qaaroon oogichaꞌa ishichiyan: “Haane, ta Doonochi indeene, aabichaꞌa ta waan waanne? Maacheenaꞌo bulli daggoochee Yeeri neen diiritone; ne shiyemmi bushoonoo diiritone.

⁴⁴ Ne diggiyee qaaroon bekkech ta waayemmona, yeqqefoo ta maacoochaa emiroona capphitone.

⁴⁵ Doono bi gettiti qaaroon ceechemmo bi tunoon ne iberiitoyich diiriti neene” iyan.

Doono Yeerin Maariyami Galleto

⁴⁶ Arooba Maariyami ishichiyan: “Ta kashoona Yeerin oogiihoye;

^47-49 taan wodiyechi Yeeri hoxeeti bi gonnee taan ciinniꞌi ta ayaanoon oogichiꞌi emirikkitone. Ooge Giidecho ta toommooch worganikkiti shuunoon tuniitone; bi shigoo yaafoone. Ebich hanaachina ikka getiree shiijjeroo bulli taan, ‘Yeeri diiritine’ gettemmone.

⁵⁰ Shiijjeroochee shiijjerooch beddaahaa Yeerichi ariqqo biin shattii beetinaꞌoyich beeyemmone.

⁵¹ Bi kishoona giidechi shuunoon shuunetone; geecechinaꞌon boonoshi mullee gaboona shaccitone;

⁵² giidechi taateenaꞌon boonoshi taatee qeenoochee kindiitone; boonoshi qelloon giishii beetinaꞌonoo oogiitone.

⁵³ Shaacetinaꞌonoo deꞌe mooyona michiitone; gaannechinaꞌonoo shokke kishoon echiitone.

^54-55 Wonna no qaabbechinaꞌoyich bi gettitoommon, ‘Abrahaminaa bi yareenaꞌonoyich bulli yemeenooch ariqqemmo taane’ ii Yeeri bi gibenikkiti gibenoon gabiꞌi biich maddeebeeti Israꞌeelee yaroo noon gaachetone” iyan.

⁵⁶ Aroochee Maariyami keejje agen bedoon Elsabeex waan bi kotetoyee gubb, bi kexooch wottahan.

Aacona Afaallechi Yowannisi Shiijjo

⁵⁷ Elsabeexiyoo bi shiyemmi aabo shagaa, anaami bushoon shiyahan.

⁵⁸ Bi giyeenaꞌonaa bi xibeenaꞌona Doono biich wojjiti ooge ariqqoon waayeꞌi waa biinna tookkii emiriyeete.

⁵⁹ Boonoshiyoo bi shiijjeti shimitte qemooba bushoon dokiriyoyich waaheete; bi nihoochi shigoona Zakaariyaasi iꞌi shigiyoon shunniyeete.

⁶⁰ Tunebaani bushoochi indee tiyaꞌa, “Tuneyaache; Yowannisi getaa shigebe” iyan.

⁶¹ Boonoshiyoo “Ne xiboochee koniyoona hini shigoon shigeto aalloone” iyeete.

⁶² Bushoochi nihoo Zakaariyaasinoo “Bushoon koni getiree shigiyoon shunnaa beetine?” iꞌi malletoona echeheete.

⁶³ Bi kooremmi kooree qiicoon boonoshi immemmoyich echeꞌi “Bi shigo Yowannisine” ii kooriye. Ebich boonoshi bulli worganeheete.

⁶⁴ Areegaata bekkech bi noonoo qecheehe; tippeti bi heciyoo biichehe; Yeerinoo galleteebee yibbaatehe.

⁶⁵ Ebich boonoshi giyeenaꞌo bulli oogichiꞌi shattiyeete. Ebi mooyo bulli Yihudee showeexi geppechi katemoo bulliich waayeehe.

⁶⁶ Ebin waayetinaꞌo bulli “Ishigaata, hini bushoo gubb amoon tunehe?” iibee hini mooyon boonoshi mullooch kotiiheete; ebiyoo Doonochi giidoo biin gaachee bi beetoyichiye.

Zakaariyaasi Keemmiti Keemo

⁶⁷ Arooba bushoochi nihoo Zakaariyaasiyoo Yaafe Ayaanoona ceenniꞌi ishichii keemoon keemmiye:

^68-70 “Israꞌeelee Nuggishoo Doono Yeeri galleteebe! Wonna yaafeeti keemechinaꞌochi noonoona bi gettitoommon, bi aagetoon wodiyoyich waaꞌi boonoshi qoodoon qocciichii biishetone; biich maddeebeeti Daawiti yaroochee giidechi wodiyechon nooch tiijjitone.

⁷¹ Ebin bi shuuneto, noon shixxii beetinaꞌonaa noonna koyee beetinaꞌo bullinochi kishoochee noon bi wodiyemmoyichiye;

^72-73 no asheenaꞌoyich bi ariqqemmoyich, no qaabbechi Abrahamich bi giyiti wogoon, ebiyoo bi yaafe wogoon gabiree bi ceechemmoyichiye.

^74-75 Wotta noon shixxii beetinaꞌo kishoochee noon wodiiree, no beemi yemeeno bulliich shataanoon yaafoonaa cadiqoona tuneree beebee, biich no maddemmon bi hakkiyemmoyichiye.

⁷⁶ “Wotta hini gaggeroocho, Doonochi gommon qaxxeya bi aafooch shiichemmo ne tunetoyich, Beshoo Yeerichi keemecho getteyemmo neene;

⁷⁷ Yeeri boonoshi axaaxoon bi maaroona boonoshin bi wodiyoon bi aagetoyich arichiyemmo neene.

⁷⁸ No Nuggishoo maaco shaacaani ariqqechone; ebich maaddee aabo keyoommon damba shimaayoochee keyiree no waan woyemmone.

⁷⁹ No waan bi woyemmo, manderoonaa qitee yiiroonooch kotaabeeti nooch bekkiiya, diggee gommoochoo noon yaabiyane” iye.

⁸⁰ Ebina are bushoo dicciye; ayaanoona kupphehe. Israꞌeelee ashi aafooch xalla bi kechemmi aabo beddimmi wottoon barahooch beehe.