Leweenaꞌo 9 - Kafa Linguistics Project

Harooninaa Bi Bushiisheenaꞌona Deejjiti Batti Batti Deejjoo

¹ Shimittinnee qemooba Muusi Haroonin, bi anaami bushiisheenaꞌonaa Israꞌeelee geeneenaꞌonon ceeggiye.

² Haroonichoo ishichiye: “Axaaxee deejjoyich tunemmi ikke maamon, wotta micciibeeti deejjoyich tunemmi ikke bagee baaddoon daamiree Doono Yeeri aafooch deejjibe. Eboshiyoo bachaalleenaꞌo tunebeete.

³ Israꞌeeleenaꞌoyichoo ishichibe: ‘Axaaxee deejjoyich ikke emmishee baaddoon, micciibeeti deejjoyich bachaalli, ikke nati maamonaa bagee baaddoonon,

⁴ ikkittinee deejjoyich ikke gattoonaa ikke bagee baaddoonon zayitoona xirikketi maayoona tookki Doono Yeeri aafooch giddiibote. Ebiyoo Doono Yeeri hanaach ittoshich bekkemmo bi tunetoyichiye’ gete” iye.

⁵ Asheenaꞌoo Muusi boonoshich gettito bullin danee duukkaanee kellooch deebiyeete. Boonoshi bulliyoo giddeꞌi Doono Yeeri aafooch neexeheete.

⁶ Muusiyoo “Doono Yeeri ittoshi tuniyemmoyich bi gettiti mooyo ebine; ebiyoo bi oogee yiiroo ittoshich bi bekkemmoyichiye” iye.

⁷ Aroochee Muusi Haroonich ishichiye: “Deejjee gudo beetooch gidderee, ne axaaxoonaa asheenaꞌochi axaaxoonon maariyoyich axaaxee deejjoonaa micciibeeti deejjoonon deejjibe. Doono Yeeri gettitoommon, asheenaꞌochi deejjoon deejjiree boonoshi axaaxoon maariibe” iye.

⁸ Ebina Harooni deejjee gudooch giddeꞌi, bi axaaxoyich deejjeebeeti maamon guuriye.

⁹ Bi anaami bushiisheenaꞌo damoon biich boonoshi giddiitaa, bi yapheroon damooch hacciꞌi, deejjee gudee qarooch huuttiye. Echeton deejjee gudee xepphooch ukkiye.

¹⁰ Ebi axaaxee deejjee gijjoochi awuyon, yeyitoonaa qamee deshi qati kuxonon deejjee gudoochaa michiye. Ebi bullin Doono Yeeri Muusich gettitoommon tuniiꞌi shuunehe.

¹¹ Meenonaa gooqqoonon kaamboyee maach kichiꞌi michiye.

¹² Aroochee Harooni micciibeeti deejjoyich giddeti gijjoon guuriye. Bi anaami bushiisheenaꞌo damoon biich giddiiheete. Biyoo deejjee gudee awudde naabooch tibiye.

¹³ Bi bushiisheenaꞌo quumoon bi ikkikkoona qelloona tookkii deebii biich immiyeete. Eboshin deejjee gudoochaa michiye.

¹⁴ Maacee meenonaa baatoonon machiꞌi, deejjee gudee toommoochaa micciibeeti deejjoona tookkii michiye.

¹⁵ Aroochee Harooni asheenaꞌochi deejjoon giddiihe. Asheenaꞌochi axaaxoyich deejjeya giddeti emmishoon daammiꞌi guuriye. Shiichiꞌi bi giddiiti axaaxee deejjoochoommon, hininoo deejjiye.

¹⁶ Eechiꞌi micciibeeti deejjoon icheti qociyoommon deejjiye.

¹⁷ Maaddi maaddoona giddeebeeti, micciibeeti deejjoyee bare maayi deejjoon deebiye; ikke ushon aroochee tiijjiꞌi, deejjee gudee toommoochaa deejjiye.

¹⁸ Harooni asheenaꞌochi ikkittinee deejjoyich giddeti wuronaa bagee baaddoonon guuriye. Bi anaami bushiisheenaꞌo damoon giddiitaa deejjee gudee awudde naabooch tibiye.

¹⁹ Ebi wuronaa bagoonochi achooch beeti awuyo bullin, naatoon, maacee meechi toommooch beeti awuyon, yeyitoonaa qamee deshi qati kuxonon,

²⁰ eboshi bullin deebiꞌi gaggimateenaꞌo toommooch kotiiheete. Biyoo awuyon deejjee gudee toommoochaa michiye.

²¹ Muusi biich gettitoommon, gaggimateenaꞌonaa qanne baatee galloonon Doono Yeeri aafooch kaama tiijjaa giddeebeeti deejjoon tuniiꞌi giddiihe.

²² Harooni ebi deejjoo bullin giddii bi ciichitoyee gubb, asheenaꞌo waan bi kishoon yaggiꞌi boonoshin diiriye. Aroochee deejjee gudee toommoochee kindiye.

²³ Aroyee gubb, Muusinaa Haroonina danee duukkaanooch giyiyeete. Ebi aroochee kechiꞌi asheenaꞌon diiriyeete. Doono Yeerichi oogee yiiroo asheenaꞌo bullich bekkehe.

²⁴ Qaaqqoo Doono Yeeri aafoochee kindiꞌi, deejjee gudee toommooch beeti deejjoonaa awuyonon michii aalliihe. Asheenaꞌo bulli ebin beeggiꞌi ililiyeete; baroonoo showooch guufeheete.