Leweenaꞌo 8 - Kafa Linguistics Project

Harooninaa Bi Bushiisheenaꞌona Qeesheenaꞌo Tuneꞌi Ukkiro

¹ Doono Yeeri Muusich ishichiye:

² “Haroonin, bi anaami bushiishoon, qeesheenaꞌochi tahoon, huutee zayitoon, axaaxee deejjoyich tunemmi wuron, gutte bagee baaddoonaa shittoo giyaanoon kachiti, ikke gemee koshonon, eboshi bullin deebe.

³ Israꞌeeleenaꞌo bullinoo danee duukkaanee kellooch ceege” iye.

⁴ Muusiyoo Doono Yeeri gettitoommon tuniihe; Israꞌeeleenaꞌo bullin danee duukkaanee kellooch kiciye.

⁵ Biyoo asheenaꞌoyich “Ebi ta tuniiya ii beeto, bi tunemmoyich Doono Yeeri gettiti mooyone” iye.

⁶ Aroochee Muusi Harooninaa bi anaami bushiishoonon deebiꞌi, aacon boonoshi machemmoyich tuniihe.

⁷ Haroonich kittoon tajjiye; buroon cuchiye; qamisoonoo tajjiye; efoodoon bi toommooch geddiꞌi, malletiitaa shippeti bi buroona bi shimetooch cuchiye.

⁸ Geteexi kiisoon bi toommooch geddiye. Ebi geteexi kiisooch Uriimoonaa Tumiimoonon geddiye.

⁹ Qelli caacoon bi qellooch caacciye. Ebi qelli caacee aafaa Harooni Doono Yeerich barito bi tunoon bekkiibeeti, aachoochee shuuneeti gubbichoon geddiye. Ebi bullin Doono Yeeri biich gettitoommon tuniiꞌi shuunehe.

¹⁰ Muusiyoo huutee zayitoon deebiꞌi danee duukkaanoonaa bi daggooch beeti qiico bullinon huuttii yaafiye.

¹¹ Ebi zayitoon deejjee gudee toommooch shabaatte wottoon wuciye. Ebi qiiceenaꞌo yaafeyemmoyich, deejjee gudoonaa bi qiico bullinooch, aaco macheebeeti gafetoonaa bi kotoonooch zayitoon huuttiye.

¹² Ebi huutee zayitoochee Haroonichi shimbooch ukkiye; biin huuttiꞌi yaafiye.

¹³ Aroochee Haroonichi anaami bushiishoon aaf beshiiꞌi kittoon tajjiye; buroon boonoshi shimetooch cuchiye; ukoon boonoshi qellooch ukiihe. Ebi bullin Doono Yeeri biich gettitoommon tuniiꞌi shuunehe.

¹⁴ Aroyee gubb, axaaxee deejjoyich tunemmi wuron deebiye. Harooninaa bi anaami bushiisheenaꞌona axaaxee deejjoyich giddeti ebi wurochi qellooch boonoshi kishoon kotiiheete.

¹⁵ Muusiyoo ebi wuron guuriye. Damoochee daammii, bi yapheroona deejjee gudee guuxxi guuxxooch beeti qareenaꞌooch huuttiꞌi deejjee gudoon xalliihe. Echeti damoon deejjee gudee baatooch ukkiye. Deejjee gudoon eechii xalliiꞌi yaafiye.

¹⁶ Aroochee maacee meechi toommooch beeti awuyo bullin, qamee deshi qati kuxonaa gutte yeyitoonon, bi guudoona beeti awuyona tookkii daammiꞌi, deejjee gudee toommoochaa michiye.

¹⁷ Wurochee echeti mooyon, ebiyoo bi gooqqoon, bi meenonaa haamboonon kaamboyee maach kichii goggiye. Ebi bullin Doono Yeeri biich gettitoommon tuniiꞌi shuunehe.

¹⁸ Aroochee micciibeeti deejjoyich tunemmi bagee baaddoon deebiye. Harooninaa bi anaami bushiisheenaꞌona boonoshi kishoon ebi bagee qellooch kotiiheete.

¹⁹ Muusiyoo bagee baaddoon guuriꞌi damoon deejjee gudee awudde naabooch tibiye.

²⁰ Bagee baaddoochi meenon quumi quumoona bashii kichiye. Qelloon, meechi quumeenaꞌonaa awuyonon michiye.

²¹ Maacee meenonaa baateenaꞌonon machiye. Qaaqqooch michaa Doono Yeerich giddeebeeti, gaawe cinnechi, micciibeeti deejjoon tuniiꞌi bagee baaddoon bulla ikkot deejjee gudee toommoochaa goggiye. Ebi bullin Doono Yeeri biich gettitoommon tuniiꞌi shuunehe.

²² Muusiyoo qeesheenaꞌon ukkiriyee bare bagee baaddoon deebiye. Harooninaa bi anaami bushiishoona boonoshi kishoon bi qellooch kotiiheete.

²³ Muusiyoo ebi bagee baaddoon guuriye. Damoochee giishechoon daammiꞌi, Haroonichi qanne waajji dechi caappooch, bi qanne kishee indechoonaa bi qanne baatee indechoonooch huuttiye.

²⁴ Haroonichi anaami bushiishoon aaf beshii, damoochee giishechoon daammiꞌi boonoshi qanne waajji dechi caappooch, boonoshi qanne kishee indechoonaa boonoshi qanne baatee indechoonooch huuttiye. Aroochee echeti damoon deejjee gudee awudde naabooch tibiye.

²⁵ Awuyon, naatoon, maacee meechi toommooch beeti awuyo bullin, qamee deshi qati kuxon, gutte yeyitoon bi toommooch beeti awuyona tookkii, gubbi qanne baatee galloonoo deebiye.

²⁶ Shittoo giyaanoon kachiti, Doono Yeeri aafooch gemoona beeti koshoochee, shittoo giyaani koshoochee ikkoon, zayitoona xiriꞌaa kachiti koshoochee ikkoonaa shishiitaa kachiti koshoochee ikkoonon tiijjii daammiꞌi awuyonaa gubbi qanne baatee galloonochi toommooch kotiihe.

²⁷ Eboshi bullin Harooninaa bi anaami bushiishoonochi kishooch geddiye. Boonoshiyoo Doono Yeeri aafooch kaama tiijjaa giddeebeeti deejjoon tuniiree boonoshi giddiyemmoyich tuniihe.

²⁸ Muusiyoo eboshin boonoshi kishoochee deqqiꞌi, qaaqqooch michaa Doono Yeerich giddeebeeti, gaawe cinnechi, qeesheenaꞌon ukkiriyee deejjoon tuniiꞌi deejjee gudooch micciibeeti deejjee toommoochaa goggiye.

²⁹ Muusiyoo Doono Yeeri biich gettitoommon, gaggimatoon deebii, Doono Yeeri aafooch kaama tiijjaa giddeebeeti deejjoon tuniiꞌi giddiihe. Ebiyoo ebi qeesheenaꞌon ukkiriyee baaree bagee baaddoochee bi qoodoone.

³⁰ Aroochee Muusi huutee zayitoonaa deejjee gudee toommooch beeti, echeti damoonoochee giishechoon daammiꞌi Harooninaa bi tahoonooch, ebiyoommon bi anaami bushiishoonaa boonoshi tahoonooch wuciye. Ebina Harooninaa bi tahoonon, wotta bi anaami bushiishoonaa boonoshi tahoonon yaafiye.

³¹ Aroochee Muusi Harooninaa bi anaami bushiishoonoyich ishichiye: “Meenon danee duukkaanee kelloochaa kiiyote; ‘Harooninaa bi anaami bushiishoona mameete’ iꞌi Doono Yeeri gettitoommon, qeesheenaꞌon bariyee deejjee kosho giddeebeeti gemooch beeti koshona tookki mamote.

³² Echeti meenonaa koshonon qaaqqooch gogote.

³³ Ittoshi qeeshittinee baaroo ciiremmi shabaatte qemi wottoon, danee duukkaanee kelloochee shuuriyaahote.

³⁴ Ebi and hanaach no tuniito ittoshi axaaxoon maariyoyich, no tuniyemmoyich Doono Yeeri gettitone.

³⁵ Shabaatte qemi wottoon xumoonaa areddoonon Doono Yeeri gettiton tuniibee, danee duukkaanee kellooch beebote. Ebi tuno qayigaata, qitemmo ittoshine. Doono Yeeri taach gettito ebine” iye.

³⁶ Doono Yeeri Muusina gettiti mooyo bullin Harooninaa bi anaami bushiisheenaꞌona tuniiheete.