Leweenaꞌo 7 - Kafa Linguistics Project

Xuꞌoon Maariyoyich Giddeebeeti Deejjoo

¹ “ ‘Xuꞌoyich giddeebeeti deejjoon giddiyee qocoo ebine: Ebiyoo oogeti yaafoone.

² Micciibeeti deejjoo guureebeeti xaaꞌoochaa xuꞌoyich giddeebeeti deejjoo guureebe. Bi damoo deejjee gudee awudde naabooch tibeebe.

³ Bi achooch beeti awuyo bulli deejjee gudoochaa deejjeebe. Naato, maacee meechi toommooch beeti awuyo bulli,

⁴ gutte yeyitoo bi toommooch beeti, shimeteexi awuyona tookki, qamee deshi qati kuxo yeyitoona tookki maacaa keye.

⁵ Qeeshoo ebin Doono Yeeri taach qaaqqoona micciibeeti deejjoon tuniiree deejjee gudoochaa michibe. Ebiyoo xuꞌee deejjoone.

⁶ Qeesheenaꞌochi yaroochee tuneti anaamo bulli aroochee maayemmone. Yaafoo tuneti xaaꞌoochaa mameete. Ebiyoo oogeti yaafoone.

⁷ “ ‘Axaaxee deejjoonaa xuꞌee deejjoonoyich beeti qocoo ikkoone. Ebiyoo deejjoon giddiiti qeeshoyich are meeno icheyoone.

⁸ Asho koniyoona giddiiti, qeeshoo deejjiti gijjoochi gooqqo are deejjiti qeeshoochone.

⁹ Ebiyoommon wotta gudoochaa, shexxoonaa midaadoonoochaa kachiti maayi buuro bulli ebi maayoon deejjoo giddiiti qeeshoochone.

¹⁰ Tunebaani zayitoona xirikketo tuneba zayitaalloon giddeti kashaani maayo bulli Haroonichi anaami bushiishoyich tunebe. Boonoshichoo tatoon qoodeebe.

Ikkittinee Deejjoon Giddiyoo

¹¹ “ ‘Ikke asho ikkittinee deejjoon Doono Yeeri taach bi giddii beegaata, bi tuniyemmi qocoo ebine.

¹² “ ‘Deejjoon bi giddiibeeto galletoon bechoyich bi tunegaata, galletee deejjoona tookki shittoo giyaani, zayito giyiti qacini buddinoochee kachiti tagge koshon, shittoo giyaani, zayito huutteꞌi shishiitaa kachiti koshonaa zayito geddeti qacini buddinoonoochee kachiti tagge koshonon giddiibe.

¹³ Galletoon bechoyich bi giddiibeeti ikkittinee deejjoona tookki shittoo gedaa kachiti koshon giddiibe.

¹⁴ Ebi koshon bi ikkikkoochee ikkikkoon tiijjiree, Doono Yeeri taach bariti deejjoon tuniiree giddiibe. Ebiyoo ikkittinee deejjee damoon deejjee gudee awudde naabooch tibiibeeti qeeshoyich tunebe.

¹⁵ Galletoon bechoyich giddeebeeti ikkittinee deejjee gijjoochi meeno ebi deejjoo giddehooba maataa ciireballi, amolla echeree qeyaaye.

¹⁶ “ ‘Ebi deejjoo tiikkeshoo woyee mullee daaggoona giddeebeeto bi tunegaata, deejjoo giddehooba manjebe; echeto bi beegaata, bi dechara manjebe.

¹⁷ Ebi deejjee meenoochee bi sharittich qeyito bi beegaata qaaqqooch gokkebe.

¹⁸ Ikkittinee deejjoochee bi sharittich qeyito bi manjegaata, Doono Yeeri ta ebi deejjoon deꞌaachemmo taane. Eeꞌo bi tunetoyich deejjoon giddiiti ashich amoonolla gaacaachemmone. Ebi aroochee maati asho bi shuuneti axaaxoyich echeyemmone.

¹⁹ Ebi meeno eeꞌe mooyona tookkii daneto bi tunegaata, qaaqqooch gokkebani manjeyaaye. “ ‘Xalloo tuneti asho bulli ebi deejjee meenon mamon hakkiye.

²⁰ Tunebaani xalloo tuneyaani asho koniyoona Doono Yeeri taach giddeti ikkittinee deejjee meenon bi maagaata, bi asheenaꞌo daggoochee kichaa yookkebe.

²¹ Asho koniyoona ashi achoochee ufeebeeti eeꞌe mooyon woyee eeꞌe gijjoon woyee eeꞌe mooyo amoonolla yechiichii, Doono Yeeri taach giddeti ikkittinee deejjee meenoochee bi maagaata, bi asheenaꞌo daggoochee kichaa yookkebe’ gete” iye.

²² Doono Yeeri Muusich ishichiye:

²³ “Israꞌeeleenaꞌoyich ishichi gete: ‘Gattee woyee bagee woyee emmishee awuyon ciroona maayaahote.

²⁴ Qititi gijjoochi awuyon woyee cooxo yeshaa qititi gijjoochi awuyon bare shuunoyich tuniyoon hakkiyote; tunebaani ciroona maayaahote.

²⁵ Qaaqqooch michaa Doono Yeeri taach giddeebeeti deejjee gijjee awuyon maabeeto koniyoona bi asheenaꞌo daggoochee kichaa yookkebe.

²⁶ Ittoshi koteti amee showoochaanolla kafee yareenaꞌochi damoon woyee gijjeenaꞌonaa cooxinaꞌonochi damoon maayaahote.

²⁷ Damoon maabeeti asho koniyoona bi asheenaꞌo daggoochee kichaa yookkebe’ gete” iye.

²⁸ Doono Yeeri Muusich ishichiye:

²⁹ “Israꞌeeleenaꞌoyich ishichi gete: ‘Doono Yeeri taach ikkittinee deejjoon giddiibeeti asho ebi aroochee qoodi, bariti wojjoon tuniiree Doono Yeeri taach deebe.

³⁰ Ebi michaa giddeebeeti deejjoon bi hajjee kishoona Doono Yeeri taach deebe. Awuyon gaggimatoona tookki giddiibe. Gaggimatoon bariti deejjoo tuniiree Doono Yeeri taach kaama tiijjibe.

³¹ Qeeshoo awuyon deejjee gudoochaa michibe. Gaggimatoo Harooninaa bi anaami bushiishoonoyich ichebe.

³² Ittoshi ikkittinee deejjoochee qanne baatee galloon qeeshoyich bariti wojjoon tuniiree imbote.

³³ Ebi ikkittinee deejjee damoonaa awuyonon giddiibeeti Harooni anaami bushoyich qanne baatee gallo bi qoodoon tuniitaa ichebe.

³⁴ Israꞌeeleenaꞌochi ikkittinee deejjoochee kaama tiijjeebeeti gaggimatoonaa giddeebeeti qanne baatee galloonon deqqaꞌa qeeshoo tuneti Harooninaa bi anaami bushiishoonoyich, immeto taane. Ebiyoo Israꞌeeleenaꞌo waanee shiijjeroochee shiijjerooch beddaahaa boonoshi danemmi boonoshi qoodoone.

³⁵ “ ‘Doono Yeeri taach maddeya qeesheenaꞌo tuneꞌi boonoshi ukkireti aaboochee tiijjiree, qaaqqooch michaa Doono Yeeri taach giddeebeeti deejjoochee Harooninaa bi anaami bushiisheenaꞌonoyich icheti boonoshi qoodoo ebine.

³⁶ Zayito boonoshi shimbooch huuttehooba, Israꞌeeleenaꞌo boonoshi qoodoon tuniiree shiijjeroochee shiijjerooch beddaahaa boonoshich boonoshi immemmoyich, Doono Yeeri ta getteto taane itone’ gete” iye.

³⁷ Illa micciibeeti deejjeechi, maayi buureechi, axaaxee deejjeechi, xuꞌee deejjeechi, yaafee kexooch shuunoyich bareechi deejjoonaa ikkittinee deejjoonochi qocoo ebine.

³⁸ Doono Yeeri Siini barahoochaa deejjoon biich boonoshi giddiyemmoyich Israꞌeeleenaꞌoyich bi gettiyooba, Siini guudi toommoochaa Muusich bi gettiti geto ebine.