Leweenaꞌo 6 - Kafa Linguistics Project

¹ Doono Yeeri Muusich ishichiye:

² “Ikke asho bi waan koteti aderoon mamona woyee biich yechiyoo icheti qiicoon nookkeꞌi biinoommi bi manoon dawushoona Doono Yeeri ta toommooch axaaxoon bi shuunegaata woyee biinoommi bi manoon bi bogigaata woyee bi dawushigaata,

³ woyee aalleti qiicoon danee aachiichii kootoon bi wogegaata, asheenaꞌo tuniibeeti mooyoochee ikkoon tuniyoona bi xuꞌigaata,

⁴ axaaxoon shuunoona xuꞌecho bi tunegaata, boggii bi deqqiton, dawushii bi deqqiton woyee adero bi maaton, aalletaa bi daneti qiicoon,

⁵ woyee kootoon wogeꞌi bi deqqiti qiico aabinona wochibe. Xuꞌee deejjoon bi giddiihooba, ebi qiico bullin, wotta bi toommooch qiicee uuche kishoochee ikkoon daakkiree, qiicee doonoyich wochibe.

⁶ Bi gijjoochee bachaalli bagee baaddoon xuꞌee deejjoon tunii Doono Yeeri taach imiree, qeeshoo waan deebe; bi gatiyoo machoona qoccetoommon tunebe.

⁷ Qeeshoo Doono Yeeri ta aafooch deejjoon bi giddiitaa, uro bi xuqqiti xuꞌo amoyichona maaroon danemmone” iye.

Micciibeeti Deejjoon Giddiyoo

⁸ Doono Yeeri Muusich ishichiye:

⁹ “Harooninaa bi anaami bushiishoonoyich ishichi gete: ‘Micciibeeti deejjoon giddiyee qocoo ebine: Micciibeeti deejjoo xumo bullin harimmi wottoon, deejjee gudee toommooch beeti gudee xaaꞌooch beebe. Qaaqqoo deejjee gudee toommooch tahaanoon aaxxebe.

¹⁰ Qeeshoo muttee tuppoochee shippeti qamisoonaa shuroonon tahe eddebe. Aroochee ebi deejjee gudee toommoochaa qaaqqooch gokketi deejjeechi tulloon ushiree deejjee gudee gaꞌooch gede.

¹¹ Ebi bi taheti tahoon shootiree bare tahoon tahebe. Tulloon shaagi kaamboochee kichiree yaafe xaaꞌooch daambe.

¹² Deejjee gudee toommooch beeti qaaqqoo kuxeyaanoon aaxxe beebe; ciroona tahaaye. Qeeshoo maaddi maaddoona mixon are qaaqqooch shoohe; ebi qaaqqee toommooch micciibeeti deejjoon qanniibe; ikkittinee deejjee awuyon ebi aroochaa goge.

¹³ Qaaqqoo kuxeyaanoon deejjee gudee toommooch aaxxe beebe; ciroona tahaaye.

Maayi Buuroon Giddiyoo

¹⁴ “ ‘Maayi buuroon giddiyee qocoo ebine: Harooni anaami bushiisheenaꞌo maayi buuroon deejjee gudee ciinooch, Doono Yeeri ta aafooch giddiibeete.

¹⁵ Qeeshoo qacini buddinoonaa zayitoonoochee ixaano bullina tookki ikke ushon tiijjibe; Doono Yeeri taach gaawe cinnoon cinneebeeti deejjoon tuniiree shalligichoyich deejjee gudee toommoochaa michibe.

¹⁶ Echeton Harooninaa bi anaami bushiishoona mameete; shittoo giyaanoon kachiti koshon yaafoo tuneti xaaꞌoochaa, danee duukkaanee addibaaboochaa mameete.

¹⁷ Ebi kosho shittoo gedaa kachaaye; tawoo ebin qaaqqooch michaa taach giddeebeeti buuroochee boonoshi qoodoo tuniyaꞌa immeto taane. Ebiyoo axaaxee deejjoonaa xuꞌee deejjoonochoommon oogeti yaafeeti mooyone.

¹⁸ Doono Yeeri taach qaaqqoona micciibeeti buuroochee, gubbi boonoshi shiijjeroo bullich icheti qoodoo bi tunetoyich, Harooni yaroochee shiijjeti anaamo bulli ebi aroochee mame. Ebi buuro yaafoo bi tunoochee tiyitona bi achooch shaggimmo bi toommooch magge mooyo kindemmone’ gete” iye.

¹⁹ Doono Yeeri Muusich ishichiye:

²⁰ “Harooni tuneba bi anaami bushiishoochee ikkoo zayito bi shimbooch ukkeehooba, Doono Yeeri taach bi giddiyemmo ebiniye: Bulli aaboon giddeebeeti maayi buuroyich giddee beetoommon tuniiree, gutte kobbaye qacini buddinoon, qaton maaddoona, wotta qaton womikka giddiibe.

²¹ Zayitoona xiriꞌaa midaadooch kachito tunebe. Ebi maayi buuro buricaa Doono Yeeri taach gaawe cinnechi deejjoon tuniitaa giddebe.

²² Harooni anaami bushiisheenaꞌo daggoochee qeeshoo tuneree biin keriya huutteto ebin giddiibe. Ebiyoo bulli yemeenoon Doono Yeeri taach doyoon tuneree bi beeyemmoyich bullin michibe.

²³ Qeeshoo giddiibeeti maayi buuro bulla ikkot micishalli bi gettemmo, aroochee ciroona manjeyaachemmone” iye.

Axaaxoyich Giddeebeeti Deejjoo

²⁴ Doono Yeeri Muusich ishichiye:

²⁵ “Harooninaa bi anaami bushiishoonoyich ishichi gete: ‘Axaaxee deejjoon giddiyee qocoo ebine: Micciibeeti deejjoyich giddeebeeti gijjoo guureebeeti xaaꞌoochaa axaaxee deejjoyich giddeebeeti gijjoo Doono Yeeri ta aafooch aroochaa guureebe. Ebi deejjoo oogeti yaafoone.

²⁶ Ebi deejjoon giddiibeeti qeeshoo deejjeeti gijjoochi meenon maayemmone. Yaafoo tuneti xaaꞌoochaa, danee duukkaanee addibaaboochaa manjebe.

²⁷ Ebi meechi achooch shaggimmi asho tuneba amee mooyolla bi toommooch magge mooyo kindemmone. Bi damoo tahooch bi wucee gaata, yaafoo tuneti xaaꞌooch daamaa machebe.

²⁸ Meeno kiicheti qondoo tiichebe. Xuuroochee shuuneeti qiico bi tunegaata gaawichi mayaa aacona qeqqicheebe.

²⁹ Qeesheenaꞌo yaroochee tuneti anaamo bulli aroochee maayemmone; ebiyoo oogeti yaafoone.

³⁰ Tunebaani axaaxoon maariyoyicha getaa, danee duukkaanooch beeti Yaafe Xaaꞌooch bi damoo giyiti, axaaxoyich deejjeeti gijjee meeno qaaqqooch gokkeshalli bi gettemmo, ciroona manjeyaachemmone.