Leweenaꞌo 5 - Kafa Linguistics Project

Axaaxee Deejjoo Giddeebeeti Naboo

¹ “ ‘Ikke asho miixoyich nallee gabberooch ceegaa hammiꞌi, bi beeggiti woyee bi waayeti mooyon geto bi qayigaata, bi shuuneti axaaxoyich echeyemmone.

² “ ‘Ikke asho eeꞌe mooyon diqqoona bi yeshigaata, ebi eeꞌe mooyo kubbi coochi meeshoo woyee gijjeenaꞌochi meeshoo woyee showoona yuummiibeeti eeꞌe cooxinaꞌochi meeshoo bi tunegaata, ebi mooyo biich arichehooba, xuꞌecho tunemmone.

³ “ ‘Ebiyoommon wotta ikke asho ashi achoochee ufeebeeti eeꞌe mooyo amoonolla diqqoona bi yeshigaata, ebi mooyo biich arichehooba, xuꞌecho tunemmone.

⁴ “ ‘Wotta ikke asho gondoyich tuneba deꞌoyich, amee mooyoyichona gabaanoon diqqoona bi wogegaata, ebi bi wogeti mooyo biich bi arichehooba, xuꞌecho tunemmone.

⁵ “ ‘Ikke asho ebiyoommi mooyon shuunoona xuꞌecho bi tunegaata, ebi bi shuuneti axaaxoon aannibe.

⁶ Bi shuuneti axaaxoyich xuꞌee deejjoon bi gijjoochee bageen woyee emmisheen Doono Yeeri taach deebe. Qeeshoo ebi deejjoon bi giddiitaa, uro bi axaaxoyich maaroon danemmone.

⁷ “ ‘Tunebaani uro bagoon woyee emmishoon giddiyoyich bi hakkoo guutigaata, gutte daabbichoon woyee gutte uggee cobbelloon, ikkoon axaaxee deejjoyich, wotta ohe ikkoon micciibeeti deejjoyich Doono Yeeri taach bi xuꞌee deejjoyich giddiibe.

⁸ Eboshin qeeshoo waan bi deebaa, biyoo shiichiree ikkoon axaaxee deejjoyich giddiibe. Ebi daabbichoochi woyee uggoochi qettimixon wuuqqiree tiishe. Tunebaani bi qelloon kuxi bajjaaye.

⁹ Ebi aroochi damoochee qaton deejjee gudee naabooch wucibe. Echeti damoo wotta deejjee gudee baatooch cote. Ebiyoo axaaxee deejjoone.

¹⁰ Aroochee ohe baroon icheti doyoommon micciibeeti deejjoyich giddiiree deejjibe. Ebiyoommi gommona qeeshoo uroochi axaaxoyich deejjoon bi giddiitaa, uro bi axaaxoyich maaroon danemmone.

¹¹ “ ‘Tunebaani gutte daabbichoon woyee gutte uggee cobbelloon giddiyoon bi mawiigaata, bi shuuneti axaaxoyich gutte kobbaye qacini buddinoon axaaxee deejjoyich giddiibe. Axaaxee deejjoo bi tunetoyich, arooch zayitoon geddaaye; wotta ixaanoonoo geddaaye.

¹² Ebin qeeshoyich giddiibe; qeeshoo shalligichoyich bi tunemmoyich ikke ushon tiijjibe. Ebin qaaqqooch michaa Doono Yeeri taach giddeebeeti deejjee toommooch gedi deejjee gudoochaa michibe. Ebiyoo axaaxee deejjoone.

¹³ Qeeshoo ebin tuniyoona, uro shuuneti axaaxoo aabichona maaroon bi danemmoyich tuniyemmone. Uroo maareyemmone. Echeti maayo maayi deejjoochoommon qeeshoyich tunemmone’ gete” iye.

Xuꞌee Deejjoon Giddiyoo

¹⁴ Doono Yeeri Muusich ishichiye:

¹⁵ “Ikke asho Doono Yeeri taach yaafeeti mooyoyich gibeneyaano tuneꞌi diqqoona axaaxoon bi shuunegaata, bi gijjoochee bachaalli bagee baaddoon xuꞌee deejjoyich Doono Yeeri taach giddiibe. Ebi bagee baaddoochi gatiyoo yaafee kechi machoona qocaa xure birewoona ichebe. Ebiyoo xuꞌee deejjoone.

¹⁶ Ebiyeenoo wotta imaanoon bi qajjiti yaafeeti mooyon, ebi aree toommoochoo uuche kishoochee ikkoon daakkiree qeeshoyich imbe. Biyoo uroochi xuꞌoyich bagee baaddee deejjoon bi giddiitaa, bi xuꞌoyich maaroon danemmone.

¹⁷ “Ikke asho diqqoona axaaxoon bi shuunegaata, Doono Yeeri ta, tuniyaahote iti mooyo amoonolla bi tuniigaata, xuqqitone; bi shuuneti axaaxoyichoo echeyemmone.

¹⁸ Biyoo bi gijjoochee bachaalli bagee baaddoon qeeshoyich deebe; bi gatiyoo machoona qoccetoommon tunebe; qeeshoo diqqoona bi shuuneti muricoyich deejjoon bi giddiitaa, uro bi xuꞌoyich maaroon danemmone.

¹⁹ Ebiyoo xuꞌee deejjoone; biyoo Doono Yeeri ta aafoochaa gondeto bi tunetoyich xuqqitone” iye.