Leweenaꞌo 4 - Kafa Linguistics Project

Diqqoona Shuuneeti Axaaxoyich Giddemmi Deejjoo

¹ Doono Yeeri Muusich ishichiye:

² “Israꞌeeleenaꞌoyich ishichi gete. ‘Asho koniyoona Doono Yeeri ta getteti getoochee aabinona shaaddeꞌi diqqoona axaaxoon bi shuunegaata, ebin tuniibe:

³ “ ‘Qeeshee guudo axaaxoon shuuneꞌi, asheenaꞌo toommooch axaaxoo haddeyemmoyich bi tuniigaata, ebi bi shuuneti axaaxoyich bachaalli wuron axaaxee deejjoon tuniiree Doono Yeeri taach deejjibe.

⁴ Wuron danee duukkaanee kellooch, Doono Yeeri ta aafooch deebe. Bi kishoon ebi wurochi qellooch kotiibe. Doono Yeeri ta aafoochaa guuribe.

⁵ Biyoo ebi wurochi damoochee giishechoon danee duukkaanooch deebe.

⁶ Bi kishee yapheroon damooch haciree, Doono Yeeri ta aafooch, Yaafe Xaaꞌeexi Yaafee maccillaatee maachi ciinooch shabaatte wottoon wucibe.

⁷ Wotta are damoochee daamiree danee duukkaanee daggooch, Doono Yeeri ta aafooch beeti, gaawe cinnechi ixaano geddeebeeti deejjee gudee qareenaꞌon huute. Echeti damoon micciibeeti deejjoo giddeebeeti, danee duukkaanee kellooch beeti deejjee gudee xepphooch ukkibe.

⁸ Axaaxee deejjoyich giddeti ebi wurochi awuyo bullin, ebiyoo maacee meechi toommooch beeti awuyo bullin,

⁹ gutte yeyitoon bi toommooch beeti shimeteexi awuyona tookki, qamee deshi qati kuxon yeyitoona tookki maaci kichibe.

¹⁰ Ebiyoo ikkittinee deejjoyich giddeti wurochee maacaa kechitoommoniye. Are qeeshee guudo ebi bullin micciibeeti deejjoo giddeebeeti deejjee gudee toommoochaa michibe.

¹¹ Tunebaani are wurochi gooqqoonaa bi meeno bullinon, bi qelloonaa bi baatoonon, bi maacee meenon haamboona tookki,

¹² wurochi meeno bullin kaamboochee bi kechemmoyich tuniiree, tulloo duppeebeeti baashooch beeti yaafe xaaꞌooch daami, mixon gedi qaaqqoona goge. Ebi tulloo duppeebeeti baashoochaa gokkebe.

¹³ “ ‘Israꞌeeleenaꞌo bulli Doono Yeeri ta, boonoshi tuniyaachemmoyich ta getteti getoochee aabinona shaaddeꞌi diqqoona axaaxoon boonoshi shuunetaa, ebi boonoshi shuuneti axaaxoo boonoshich aricho bi qajjitaanona, ebina xuꞌechinaꞌo boonoshi tunegaata,

¹⁴ boonoshi shuuneti axaaxoo xalla bi arichehooba, asheenaꞌo axaaxee deejjoyich tunemmi wuron danee duukkaanee aafooch deebeete.

¹⁵ Asheenaꞌo daggoochee geeneenaꞌo Doono Yeeri ta aafoochaa ebi wurochi qellooch boonoshi kishoon kotiichaa, wuro Doono Yeeri ta aafoochaa guureebe.

¹⁶ Aroochee qeeshee guudo ebi wurochi damoochee giishechoon danee duukkaanooch deebe.

¹⁷ Bi kishee yapheroon damooch haciree, Doono Yeeri ta aafooch, Yaafe Xaaꞌeexi Yaafee maccillaatee maachi ciinooch shabaatte wottoon wucibe.

¹⁸ Wotta are damoochee daamiree, danee duukkaanee daggooch, Doono Yeeri ta aafooch beeti, deejjee gudee qareenaꞌon huute. Echeti damoon micciibeeti deejjoo giddeebeeti, danee duukkaanee kellooch beeti deejjee gudee xepphooch ukkibe.

¹⁹ Ebi wurochi awuyo bullin maaci kichiree deejjee gudee toommoochaa michibe.

²⁰ Axaaxoyich giddeti wuro toommooch bi tuniitoommon, hinichi toommoochoo tuniibe. Ebiyoommi gommona qeeshoo asheenaꞌochi axaaxoyich deejjoon bi giddiitaa, boonoshi axaaxoyich maaroon danemminaꞌone.

²¹ Wurochi meeshoo kaamboochee bi kechemmoyich tuniiree, bi axaaxoyich bi michiti wuron bi gogoommon hininoo goge. Ebiyoo asheenaꞌo bullichi axaaxoyich tunemmi deejjoone.

²² “ ‘Iraashoo, bi tuniyaachemmoyich bi Nuggishoo Doono Yeeri ta getteti getoochee aabinona shaaddee diqqoona axaaxoon shuuneꞌi, xuꞌecho bi tunegaata,

²³ bi shuuneti axaaxoo biich bi arichegaata, bachaalli emmishee baaddoon axaaxee deejjoyich deebe.

²⁴ Biyoo ebi emmishoochi qellooch bi kishoon kotiichi, micciibeeti deejjoyich giddeti gijjoo guureeti xaaꞌoochaa, Doono Yeeri ta aafoochaa guuribe. Ebiyoo axaaxee deejjoone;

²⁵ qeeshoo ebi axaaxee deejjoyich giddeti gijjoochi damooch bi kishee yapheroon haciree daami, micciibeeti deejjoo giddeebeeti deejjee gudee qareenaꞌooch huute. Echeti damoon ebi are deejjee gudee xepphooch ukkibe.

²⁶ Ebi emmishoochi awuyo bullin, ikkittinee deejjoyich giddeti gijjoochi awuyon bi michoommon, deejjee gudoochaa michibe. Ebiyoommi gommona qeeshoo uroochi axaaxoyich deejjoon bi giddiitaa, bi axaaxoyich maaroon danemmone.

²⁷ “ ‘Asheenaꞌo daggoochee ikkoo Doono Yeeri ta, bi tuniyaachemmoyich ta getteti getoochee aabinona shaaddee diqqoona axaaxoon shuuneꞌi, xuꞌecho bi tunegaata,

²⁸ bi shuuneti axaaxoo biich bi arichegaata, bachaalli emmisheen bi axaaxee deejjoyich deebe.

²⁹ Biyoo ebi emmisheechi qellooch bi kishoon kotiichi, micciibeeti deejjoyich giddeti gijjoo guureeti xaaꞌoochaa, ebi axaaxee deejjoon guuribe;

³⁰ qeeshoo ebi deejjoyich giddeti emmishee damooch bi kishee yapheroon haciree daami micciibeeti deejjoo giddeebeeti deejjee gudee qareenaꞌooch huute. Echeti damoon ebi are deejjee gudee xepphooch ukkibe.

³¹ Uro bi awuyo bullin ikkittinee deejjoyich giddeti gijjoochi awuyo maacaa keyoommon maaci kichibe. Qeeshoo Doono Yeeri taach gaawe cinnechi deejjoon tuniiree deejjee gudoochaa deejjibe. Ebiyoommi gommona qeeshoo uroochi axaaxoyich deejjoon bi giddiitaa, uro bi axaaxoyich maaroon danemmone.

³² “ ‘Ebi uro bagoon bi axaaxee deejjoyich bi giddiigaata, bachaalli bageen giddiibe.

³³ Biyoo ebi bagee qellooch bi kishoon kotiichi, micciibeeti deejjoyich giddeti gijjoo guureebeeti xaaꞌoochaa, ebi axaaxee deejjoon guuribe;

³⁴ qeeshoo ebi axaaxee deejjoyich giddeti bagee damooch bi kishee yapheroon haciree daami micciibeeti deejjoo giddeebeeti deejjee gudee qareenaꞌooch huute. Echeti damoon ebi are deejjee gudee xepphooch ukkibe;

³⁵ uro awuyo bullin ikkittinee deejjoyich giddeti bagee baaddoochi awuyo maacaa keyoommon, maaci kichibe. Qeeshoo, Doono Yeeri taach micciibeeti deejjee toommooch gediree, deejjee gudoochaa michibe. Ebiyoommi gommona qeeshoo uroochi axaaxoyich deejjoon bi giddiitaa, uro bi axaaxoyich maaroon danemmone.