Leweenaꞌo 3 - Kafa Linguistics Project

Ikkittinee Deejjoon Giddiyoo

¹ “ ‘Asho koniyoona bi giddiibeeti deejjoo miimoochee giddeebeeti ikkittinee deejjoo bi tunegaata, bachaalli gattoon woyee miimin Doono Yeeri taach giddiibe.

² Biyoo deejjoyich bi giddiiti gijjoochi qellooch bi kishoon kotiibe. Ebi aroonoo danee duukkaanee kelloochaa guuribe. Qeesheenaꞌo tuneti Harooni anaami bushiisheenaꞌo damoon deejjee gudee awudde naabooch tibibeete.

³ Uro ebi ikkittinee deejjoochee, qaaqqooch michaa giddeebeeti deejjoon tuniiree Doono Yeeri taach giddiibe. Biyoo maacee meechi toommooch beeti awuyo bullin,

⁴ gutte yeyitoon bi toommooch beeti shimeteexi awuyona tookki, qamee deshi qati kuxon yeyitoona tookki maaci kichiree giddiibe.

⁵ Aroochee Harooni anaami bushiisheenaꞌo ebi bullin micciibeeti deejjoona tookki deejjee gudoochaa deejjibeete. Ebiyoo Doono Yeeri taach qaaqqooch michaa giddeebeeti, gaawe cinnechi deejjoo tunemmone.

⁶ “ ‘Ikkittinee deejjoyich Doono Yeeri taach giddeebeeto, bago woyee emmisho bi tunegaata, bachaalli gideree woyee baaddoo tunebe.

⁷ Deejjoyich bi giddiibeeto, bagoon bi tunegaata, Doono Yeeri ta aafooch deebi,

⁸ bi kishoon ebi bagoochi qellooch kotiichi danee duukkaanee kelloochaa guuribe. Harooni anaami bushiisheenaꞌo bi damoon deejjee gudee awudde naabooch tibibeete.

⁹ Uro ebi ikkittinee deejjoochee, qaaqqooch michaa giddeebeeti deejjoon tuniiree taach giddiibe. Biyoo awuyon, ceeree duchoochaa ikkot kucheti naatoon, maacee meechi toommooch beeti awuyo bullin,

¹⁰ gutte yeyitoon bi toommooch beeti shimeteexi awuyona tookki, qamee deshi qati kuxon yeyitoona tookki maaci kichiree giddiibe.

¹¹ Qeeshoo eboshi bullin taach giddeebeeti maayi deejjoon tuniiree deejjee gudoochaa michibe.

¹² “ ‘Deejjoyich bi giddiibeeto emmishoon bi tunegaata, Doono Yeeri ta aafooch deebi,

¹³ bi kishoon ebi emmishoochi qellooch kotiichi, danee duukkaanee kelloochaa guuribe. Harooni anaami bushiisheenaꞌo bi damoon deejjee gudee awudde naabooch tibibeete.

¹⁴ Uro ebi ikkittinee deejjoochee qaaqqooch michaa giddeebeeti deejjoon tuniiree taach giddiibe. Biyoo maacee meechi toommooch beeti awuyo bullin,

¹⁵ gutte yeyitoon bi toommooch beeti shimeteexi awuyona tookki, qamee deshi qati kuxon yeyitoona tookki maaci kichiree giddiibe.

¹⁶ Qeeshoo eboshi bullin qaaqqooch michaa taach giddeebeeti, gaawe cinnechi maayi deejjoon tuniiree deejjee gudoochaa michibe. Deejjeyoyich giddeti gijjoochi awuyo bulli taachone.

¹⁷ “ ‘Ittoshi kotemmi xaaꞌoo aabiichaanona, awuyon woyee damoon maayaahote. Ebiyoo gubbi ittoshi shiijjeroo bulliich beddaahaa, kuxeyaanoon beeyemmi qociyoone’ gete” iye.