Leweenaꞌo 27 - Kafa Linguistics Project

Mookkeeti Mooyon Gatiyoon Qocciꞌi Wochiyoo

¹ Doono Yeeri Muusich ishichiye:

² “Israꞌeeleenaꞌoyich ishichi gete: ‘Ikke asho ashoon Doono Yeeri taach imma bi mookkegaata, are uroochi qoodoon tate gatiyoon qoce.

³ Hiye natoochee shiche natooch beddaahaa beeti anaamochi gatiyoo yaafee kechi machoona qocaa, aache sheqeelee xure birewoo tunebe.

⁴ Maachee bi tunegaata, bi gatiyoo shaashe sheqeelee xure birewoo tunebe.

⁵ Uuche natoochee hiye natooch beddaahaa beeti ashi qoodoon ichemmi gatiyoo, anaamoyich hiye sheqeelee xure birewoo, maacheyich aashire sheqeelee xure birewoo tunebe.

⁶ Ikke agenoochee uuche natooch beddaahaa beeti bushiishoochi qoodoo ichemmi gatiyoo, anaamoyich uuche sheqeelee xure birewoo, maacheyich keejje sheqeelee xure birewoo tunebe.

⁷ Shiche natonaa aroyee damboona tuneti ashi qoodoon ichemmi gatiyoo, anaamoyich aaraa uuche sheqeelee xure birewoo, maacheyich aashire sheqeelee xure birewoo tunebe.

⁸ “ ‘Mookketi uro girecho tuneꞌi ebi gatiyoon qoccemmon bi mawiigaata, are bi mookketi ashoon qeeshoo waan deebe. Qeeshoo uro qocon bi hakkemmon tuniiree gatiyoon kindiibe.

⁹ “ ‘Uro mookketo deejjoo tuniitaa, Doono Yeeri taach gidd bede gijjoon bi tunegaata, asho Doono Yeeri taach giddiibeeti ebiyoommi gijjoo yaafoo tunemmone.

¹⁰ Ebi are uro gaawe gijjoon gondoona woyee gondoon gaawe gijjoona shaddaaye; woyee are gijjee qoodoon baroon keraaye. Ebin bi tuniigaata, boonoshi guttiyona Doono Yeeri taach baritinaꞌo tunemminaꞌone.

¹¹ Uro giddiiti gijjoo Doono Yeeri taach deejjoo gidd bedaani, xalloo tuneyaani gijjoo bi tunegaata, are gijjoon qeeshoo aafooch giddiibe.

¹² Are gijjoo gondo tuneba deꞌo, qeeshoo bi gatiyoon gete. Ebi bi gettii kuxxiti gatiyoona taccebe.

¹³ Tunebaani uro wochii deꞌon bi qaawigaata, bi gatiyee toommooch uuche kishoochee ikkoon daakkibe.

¹⁴ “ ‘Ikke asho bi kexon Doono Yeeri taach kechiton tuniiꞌi bi imigaata, kexo gondo tuneba deꞌo, qeeshoo bi gatiyoon gete. Ebi bi gettii kuxxiti gatiyoo ciiro tunebe.

¹⁵ Are uro bi kexon wochii deꞌon bi qaawigaata, bi gatiyee toommooch uuche kishoochee ikkoon daakkiree qoce; kexo biicho tunemmone.

¹⁶ “ ‘Ikke asho bi qaabbechinaꞌo waanee bi woraashiti showee qaton Doono Yeeri taach bi kichigaata, are showooch shookkeebeeti yaroon ciinaa, bi gatiyoo maaccebe. Ebiyoo ikke xaanee sheqoyich aache sheqeelee xure birewoo tunebe.

¹⁷ Uro bi showoon bi kichito Yobeelee natooba bi tunegaata, ceeni gatiyoo tunebe.

¹⁸ Tunebaani uro bi showoon bi kichito, Yobeelee nato beshetoyee gubb bi tunegaata, qeeshoo waabeeti Yobeelee natooch beddaahaa beeti naton haddoona gijjoon tachiree are gijjoochee kindiibe.

¹⁹ Bi showoon kichiti uro wochii deꞌon bi qaawigaata, bi gatiyee toommooch uuche kishoochee ikkoon daakkiree qoce; showoo biicho tunemmone.

²⁰ Are showoon wochii deꞌon bi qayigaata woyee bare ashich bi kemigaata, aroyee gubb wochii deꞌon hakkaache.

²¹ Tunebaani showoo Yobeelee natooba bi gawukkeehooba, Doono Yeeri taach yaafeebe; taachoo gawukkeebe; qeesheenaꞌo showoo tunebe.

²² “ ‘Ikke asho bi woraashiti showoon tuneyaanoon bi kemeti showoon Doono Yeeri taach bi kichigaata,

²³ qeeshoo waabeeti Yobeelee natooch beddaahaa beeti naton gabiree bi gatiyoon tachibe. Uro ebi getteeti gatiyoon Doono Yeeri taach kechiti gijjoon tuniiree ebi arooba imbe.

²⁴ Yobeelee natooba showoo kemmiti uroyich wottebe.

²⁵ Gatiyoo bulli yaafee kechi machoona qocceeto tunebe; ikke sheqeelo aaraa gutte giraam bedoone.

²⁶ “ ‘Shiichii shiijjeti gijjoo Doono Yeeri taacho bi tunetoyich, koniyoona taach kichaaye. Gattoo tuneba bago woyee emmisho taachone.

²⁷ Xalloo tuneyaani gijjoo bi tunegaata, bi gatiyoona wochi deꞌe; aree toommooch uuche kishoochee ikkoon daakkibe. Wochii deꞌon bi qayigaata getteeti gatiyoona kechebe.

²⁸ “ ‘Tunebaani wottaaye, getaa mookkeeꞌi taach kechiti mooyo amolla, asho tuneba gijjoo woyee woraasheeti showoo tuneba kecheyaachemmone; wochenoo deqqeyaachemmone; Doono Yeeri taach kechiti mooyo bulli oogeti yaafoone.

²⁹ “ ‘Qitibe, getteeti asho koniyoona biisheyaachemmone; wuxaa aallebe.

³⁰ “ ‘Showooch shaggiibeeti maayoochee tuneba michi aafoochee asraato taachone; Doono Yeeri taach yaafeetone.

³¹ Ikke asho asraato bi immiti mooyon wochii deꞌon bi qaawigaata, bi gatiyee toommooch gatiyee uuche kishoochee ikkoon daakkoo biich qaawiihe.

³² Ittoshi miimon, bagoonaa emmishoonon ittoshi haddimmona aashiri aashireexi ikkoo Doono Yeeri taach kechito tunebe.

³³ Ebi gijjee doono deꞌoonaa gondoonon barbariyaaye; woyee shaddaaye. Ebin bi tuniigaata, are gijjoonaa shaddoyich giddetona boonoshi guttiyona Doono Yeeri taach kechitinaꞌo tunemminaꞌone. Ebich ebi gijjoo wochaa deqqeyaachemmone’ itone gete” iye.

³⁴ Doono Yeeri Siini guudi toommoochaa Muusina Israꞌeeleenaꞌoyich bi gettiti geto ebine.