Leweenaꞌo 26 - Kafa Linguistics Project

Yeerich Deꞌa Getona Daneebeeti Diiroo

¹ “ ‘Ta, ittoshi Nuggishoo Doono Yeeri ta tunetoyich, shahalloon ittoshich shuuneyaahote. Xareeti xaqqoon woyee goyinnee xaqqee giimboon ittoshi showooch xogiree, ebi aroyich goyinneyaahote.

² “ ‘Ta shambetoon quyebote. Ta goyinneebeeti xaaꞌoonoo oogiibote. Ta, Doono Yeeri taane.

³ “ ‘Ta qociiti qociyoona ittoshi beegaata, ta geteenaꞌonoo manjii ittoshi quyegaata,

⁴ amiyon bi goori gooroona ittoshich dichemmo taane. Showoo maayoon shakkiyemmone; mixinaꞌoo aafoon aafemminaꞌone.

⁵ Ittoshi maayo woddoochee tiyitona, maayoon ittoshi bushi beetaa, woyinee aafoon ittoshi macemmii gooroo shaggemmone; wotta woyinee aafoon ittoshi maci beetaa maayoon ittoshi shookkemmi yarimmoo shaggemmone. Maayoon miyiree maayemmo ittoshine. Ittoshi showoochoo keqqaalloon diggoona beeyemmo ittoshine.

⁶ “ ‘Ittoshi showoon diggoo tuniyemmo taane. Amoyichona keqqaanoon tokkete qeyemmo ittoshine. Gonde cooxinaꞌon ittoshi showoochee aalliyemmo taane. Ittoshi showoon koniyoona koyaachemmone.

⁷ Ittoshi etteenaꞌon koyi wochemmo ittoshine. Meetinaꞌon koyi wuxemmo ittoshine.

⁸ Ittoshi daggoochee uuchoo balloon, balloo aashire humoon koyi wochemmone. Ittoshi etteenaꞌon koyi wuxemmo ittoshine.

⁹ “ ‘Ittoshin gaawe aafoona ciinnemmo taane. Shiyi shiijjereree ittoshi meettemmoyich tuniyemmo taane; ta wogoonoo ittoshich manjiyemmo taane.

¹⁰ Ittoshi maayo woddoochee tiyitona, natoon ittoshi maa beetaa andire maayo giyaa, ebi are andiroon giijjoyich natoon kichi duppemmo ittoshine.

¹¹ Ta beeyi xaaꞌoon ittoshi daggooch tuniyemmo taane; tawoo ittoshin tiyaareyaachemmo taane.

¹² Ittoshi daggooch beeyemmo taane; ittoshichoo Nuggishoo tunemmo taane; ittoshiyoo ta asho tunemmo ittoshine.

¹³ Gibitseenaꞌoyich guuno ittoshi tuneyaachemmoyich, Gibitsee ittoshin kichaa deebeti ittoshi Nuggishoo Doono Yeeri taane. Guuchittinee waanjoon tiichaꞌa, kaama qaalliree ittoshi hammemmoyich tuniito taane.

Yeerich Deꞌa Getti Qayona Woyemmi Naxo

¹⁴ “ ‘Tunebaani ta qaaroon waayo ittoshi qayigaata, ta getteti hini geteenaꞌonoo tuniyoo ittoshi qayigaata, naxeyemmo ittoshine.

¹⁵ Ta qociiti qociyoon, ta dojjiti doyoonoo qajjiꞌi ittoshi tiyaaregaata, ittoshina tookkaa ta giyeti wogoon biishona ta getteti getoon ittoshi qayigaata,

¹⁶ naxoon, maajjiibeeti biiyoon, aafoon yaamiibeeti, dallii muujjiibeeti qeddee gaamoon ittoshi toommooch deebemmo taane. Maayoon shookkemmo ittoshine; tunebaani ittoshi etteenaꞌo bogi maayemminaꞌo tunetoyich ittoshich amoonolla gaacaachemmone.

¹⁷ Tawoo ittoshich etto tunemmo taane; ittoshi etteenaꞌo ittoshin koyi wochemminaꞌone; ittoshin shixxii beetinaꞌo ittoshin hajjemminaꞌone; ittoshiyoo koniyoona ittoshin yoohaanoon woci aallemmo ittoshine.

¹⁸ Ebi bulli mooyo ittoshi toommooch bi tunetoyee gubb, andoo ta qaaroon waayo ittoshi qayigaata, ittoshi axaaxoyich shabaatte kishoon maggiiree ittoshin naxemmo taane.

¹⁹ Ittoshi geeciibeeti ooge geecoon aalliyemmo taane. Ittoshiyee damba beeti shimaayoochee amiyo aalletaa, ittoshi showoo gooshoo wogoommon wogemmone.

²⁰ Aajjii ittoshi shuunetaa amoonolla ittoshich gaacaachemmone. Ittoshi showoo maayoon shakkiyaachemmone; ittoshi showee toommooch beeti mixinaꞌoo aafoon aafeyaachemminaꞌone.

²¹ “ ‘Taan shixxii, ta qaaroon waayoon ittoshi qayigaata, ittoshi axaaxee naboona shabaatte kishoon maggeti naxoon ittoshi toommooch deebemmo taane.

²² Kubbi cooxon ta deejjaa, ittoshin bushaallo tuniyemmone; ittoshi gijjoonoo aalliyemmone. Haddoona ittoshi giishoona, ittoshi gommoo aqqemmone.

²³ “ ‘Ebi bulli naxo ittoshi toommooch shaggitaanona ta waan wottoon qajjiꞌi, andoo taan shixxiibeeto ittoshi tunegaata,

²⁴ tawoo ittoshin shixxemmo taane; ittoshi axaaxoyich shabaatte kishoon maggiiree ittoshin naxemmo taane.

²⁵ Ta wogoon ittoshi happitoyich, ginoon ittoshi toommooch deejjiree nichoon kichemmo taane. Ittoshi qelloon wodiyoyich ittoshi katemeenaꞌooch ittoshi kiceetaanona, kupphe biiyoon ittoshi daggooch giijjemmo taane; ittoshi etteenaꞌo kishooch beshiitaa ichemmo ittoshine.

²⁶ Maayoon ittoshi danemmi gommon ta kuxxetoyee gubb, aashire genneenaꞌo ikke midaadooch koshon kachiyemminaꞌone. Ebi aroon ittoshich tiishi boonoshi qoodaa maayemmo ittoshine; tunebaani miyaachemmo ittoshine.

²⁷ “ ‘Ebi bulli mooyo ittoshi toommooch tunetoyee gubb, andoo ta qaaroon waayoon qajjiꞌi taan shixxiibeeto ittoshi tunegaata,

²⁸ tawoo ittoshin kaareree shixxemmo taane; ittoshi axaaxoyich shabaatte kishoon maggiiree ittoshin naxemmo taane.

²⁹ Shaacoochee tiyitona, ittoshi anaami bushiishoonaa maache bushiishoonochi meenon maayemmo ittoshine.

³⁰ Guudi toommeexi ittoshi goyinnee xaaꞌoon happemmo taane; ixaanoon ittoshi giddiibeeti deejjee gudoon happi bajjemmo taane; ittoshi dubenoonoo dubenoochoommon dihiti ittoshi shahalleenaꞌo toommooch duppemmo taane; tawoo ittoshin tiyaaremmo taane.

³¹ Ittoshi katemeenaꞌon happemmo taane; ittoshi goyinnee xaaꞌoonoo happi bajjemmo taane; gaawe cinnechi ittoshi deejjoonoo deꞌaachemmo taane.

³² Ittoshi showoon ciroona aalliiree, are ittoshi showoon yechiti etteenaꞌo worganemmoyich tuniyemmo taane.

³³ Ginoon ittoshi toommooch deebiree, aagetee showooch ittoshin shaccemmo taane; ittoshi showoo ashaalli xafo tunemmone; ittoshi katemoo happaa aallemmone.

³⁴ Aroochee ittoshi etteenaꞌo showooch ittoshi tunehoobinaa showoo ashaalli xafoon bi tunehoobina, ebiyooba showoo shambetee kashee natooba kashemmone.

³⁵ Showoo arooch ittoshi beehooba bi mucceti shambetee kashoon, ashaalli xafoon bi tunehooba danemmone.

³⁶ “ ‘Ittoshi daggoochee kashoona echetinaꞌo boonoshi etteenaꞌo showooch boonoshi beetaa, boonoshin keqqichemmo taane. Yongo shuurikkiibeeti michi waamona boonoshin betiyemmone; ginoochee muricciꞌi woccii beetochoommon, woci aallemminaꞌone; boonoshin yookkito aalloon dihemminaꞌone.

³⁷ Koniyoona boonoshin yoohaanoon, ginoochee muriccii beetochoommon, wocibee boonoshinaa boonoshina tepheeree dihemminaꞌone. Ittoshi etteenaꞌona tookki koyoon hakkaachemmo ittoshine.

³⁸ Aageteenaꞌo showoochaa qiti ciiremmo ittoshine. Ittoshi etteenaꞌo showoo ittoshin qooxxemmone.

³⁹ Ittoshi daggoochee echetinaꞌo boonoshi axaaxoonaa boonoshi qaabbechinaꞌochi axaaxoonoochee tiyitona, boonoshi etteenaꞌo showoochaa gitteree ciiremminaꞌone.

⁴⁰ “ ‘Tunebaani boonoshi xuꞌoon boonoshi aannigaata, boonoshi qaabbechinaꞌo taach gibeneyoon qajjii taan shixxiꞌi, boonoshi shuuneti xuꞌoonoo boonoshi aannigaata,

⁴¹ ebiyoo boonoshin ta shixxemmoyich tuniiti, wotta boonoshi etteenaꞌo showooch kecaa boonoshi hammemmoyich tuniiti boonoshi xuꞌoon aanniꞌi, getaa giyaani boonoshi mulloon kaachiꞌi, boonoshi xuꞌoyich bede sheeroon boonoshi deꞌigaata,

⁴² ebiyooba Yaaqobina tookkaa, Yisaaqinaa Abrahamina tookkaa ta giyeti ta wogoon shalligemmo taane; showoonoo shalligemmo taane.

⁴³ Boonoshi gawukkii hammiti showoo ashaalli xafo tunemmone. Boonoshi aalletaa xafo bi tunemmi yemeenooba, bi mucceti shambetee kashee naton dane kashemmone. Ta dojjiti doyoon boonoshi qallayitoyich, ta qociiti qociyoonoo boonoshi tiyaaretoyich, boonoshi xuꞌoyich bede sheeroon deqqemminaꞌone.

⁴⁴ Tunebaani ebi bulli bi tunetaanoona, boonoshi etteenaꞌo showooch boonoshi beetaa, boonoshina tookkaa ta giyeti wogoon biishona, boonoshin ta aalliimmi wottoon, boonoshin dufaachemmo taane; boonoshinoo tiyaareyaachemmo taane. Ebiyoo ta, boonoshi Nuggishoo Doono Yeeri ta tunetoyichiye.

⁴⁵ Aagetee asheenaꞌo ciinnii beetaa, boonoshi Nuggishoo tunoyich Gibitsee kichaa ta deebeti boonoshi qaabbechinaꞌona tookkaa ta giyeti wogoon shalligemmo taane. Ta, Doono Yeeri taane itone’ gete” iye.

⁴⁶ Doono Yeeri Israꞌeeleenaꞌonaa biinnochi daggooch bi beeyemmoyich Siini guudi toommoochaa Muusina bi immiti qociyoo, doyoonaa sheeroona ebine.