Leweenaꞌo 25 - Kafa Linguistics Project

Showoo Kasheebeeti Nato

¹ Siini guudi toommoochaa Doono Yeeri Muusich ishichiye:

² “Israꞌeeleenaꞌoyich ishichibe: ‘Ittoshich ta immaabeeti showooch ittoshi giyigaata, shabaatti shabaattinnee natooch showoon goyaanoon qayona Doono Yeeri taan oogiibote.

³ Shiritte naton goyee goyon, shiritte naton woyinoon qephoon, bi aafoonoo macoon hakkihine.

⁴ Tunebaani shabaattinnee nato showoo ciroona gocheyaanoon bi kashemmi nato tunebe. Ebiyoo Doono Yeeri taach yaafeeti kashee nato tunebe. Ne budooch maayoon shookkaahine. Woyinoonoo qephiyaahine.

⁵ Gocheyaanoon, ne budooch bi aalla shaggiti maayoon qeccaahine. Qepheyaanoon aafeti ne woyinee aafoon maciyaahine. Are nato showoyich yaafeeti kashee nato tunebe.

⁶ Showoo ebi kashee natooba bi aafeebeeti aafo bulli neech, ne guunonaa ne gonneenoyich, gijjoona ne kiraayiti ne shuunechoyich, neenna tookkii koteti shiqqoyich,

⁷ ne gijjeenaꞌonaa ne showooch beeti kubbi cooxinaꞌonoyich maayoon tunemmone. Bi aafeti aafo bulli manjeyemmone.

Yobeelee Nato

⁸ “ ‘Shabaatte kaallee shabaatte naton, ebiyoo aabbaa yiixiye naton haddibe.

⁹ Aroochee shabaattinnee agenee aashirinnee qemooba, tiroon hukkiibe. Axaaxoo Maariyee Aabooba, ittoshi showoo bulliich tiroon hukkiibote.

¹⁰ Ebina aachinnee naton yaafibote. Ebi showoo bulliich beeti asheenaꞌo guuchittinoochee boonoshi keyi awaajjoon awaajjibote. Ebi Yobeelee natooba kecheti showoo bulli kemmiti ashoyich woyee bi shiijjeroyich wottebe; guuno tunee kechetoo bi kechi asheenaꞌo waan wottebe.

¹¹ Ebi aachinnee nato ittoshich Yobeelee nato tunebe. Ebi natooba maayoon shookkaahote. Gocheyaanoon budooch bi aalla shaggiti maayoon qeccaahote. Qepheyaanoon aafeti woyinee aafoon maciyaahote.

¹² Yobeelee nato bi tunetoyich, ittoshich yaafeeti naton tunebe. Bi aalla budooch shaggiti maayoon mamote.

¹³ “ ‘Ebi Yobeelee natooba kecheti showoo bulli kemmiti ashoyich wottebe.

¹⁴ “ ‘Ne manoo tuneti Israꞌeelee ashoyich showoon ne kemigaata woyee bi waanee ne kemegaata, ikkoo baroon dachaaye.

¹⁵ Showoon ne manoo tuneti Israꞌeelee asho waanee ne kemaa beegaata, Yobeelee natoyich echeti naton gaboona tunebe; biyoo neech bi kemmii beegaata, ambiche yarimmoo echeto gaata gabibee kembe.

¹⁶ Echeti nato meeto bi tunegaata, gatiyoon tiijjemmo neene; giishecho bi tunegaata gatiyoon kindiyemmo neene. Ebiyoo kecheebeeto echeti nati daggooch beeti yarimmoo bi tunetoyichiye.

¹⁷ Ittoshinaa ittoshina ikkoo baroon dachaaye. Ne Nuggishoon shate. Ta, ittoshi Nuggishoo Doono Yeeri taane.

Yeeri Shabaattinnee Natoobich Maayoon Immemmo Tuno

¹⁸ “ ‘Ta qociiti qociyoonaa ta dojjiti doyoonon manjiiree quyebote. Ebin ittoshi tuniigaata are showooch keqqaalloon diggoona beeyemmo ittoshine.

¹⁹ Showoo maayoon shakkiyemmone. Ittoshiyoo maaree michemmo ittoshine; aroochoo keqqaalloon diggoona beeyemmo ittoshine.

²⁰ Ittoshiyoo “Maayoon shoohaanoon, macaanoo giijjaanoon, ebi shabaattinnee natooba amooniye no maayemmo?” getiree gabemmo ittoshine.

²¹ Tunebaani shirittinnee natooba showoon ta diiraa, gutte natoyich beddemmi maayoon shakkiyemmone.

²² Shimittinnee natooba maayoon shoohibee shirittinnee natooba ittoshi gochiton maayemmo ittoshine. Ebi shimittinnee natooba ittoshi shookkiti maayo maceemmii wottoon, ebi aroo ciireyaachemmone.

Kecheti Showoon Wochiyoo

²³ “ ‘Showoo taacho bi tunetoyich, kemetoyich bi hajjoo tuniitaa kechaaye. Ittoshiyoo iibboommonaa shiqqoommona ittoshine.

²⁴ Ittoshi hajjoon tuniiꞌi ittoshi yechiti showoo bulliich, kecheti showoo wocheyemmoyich doyoon kotiibote.

²⁵ “ ‘Israꞌeelo tuneti ikke ne manoo gireꞌi bi showoon bi kemigaata, bi katini xiboo tuneti asho ebi bi xiboo showoon wochiibe.

²⁶ Tunebaani bi showoon wochiyemmi xiboo aalli uro beemooch gaanneꞌi bi showoon bi wochiyemmi gijjoon bi danegaata,

²⁷ showoon bi kemmiti aaboochee tiijjiree Yobeelee natooch beddaahaa beeti naton haddiree, echeti natichi gijjoon kemeti uroyich wochibe. Showoo bi doonoyich wottebe.

²⁸ Tunebaani bi showoon wochiyoon bi mawiigaata, Yobeelee nati wottoon ebi showoo kemeti uroochi kishooch beebe; Yobeelee natooba showoo bi doonoyich wottemmone.

²⁹ “ ‘Ikke asho xaqqee uxerechi katemooch beeti bi kexon bi kemigaata, bi kemmiti aaboochee tiijjiꞌi beeti ikke nati daggooch wochiyoon hakkiye. Wochiyoon bi hakkemmo, ikke nati daggooch baachiye.

³⁰ Ikke nati daggooch wochiyoon bi mawiigaata, xaqqee uxerechi katemooch beeti kexo are kemeti uroonaa bi shiijjeroonochi hajjoo tunemmone. Yobeelee natooba kemmiti uroyich wotteyaachemmone.

³¹ Tunebaani xaqqee uxeraalli gafeenaꞌooch beeti kexinaꞌo goyee budochoommon ciichebeete. Ebi kexinaꞌon bi doono wochiyoon hakkiye; woyee Yobeelee natooba biich wottebe.

³² “ ‘Tunebaani Leweenaꞌo boonoshich icheti katemooch beeti boonoshi kexon boonoshi shunniti aabooba wochiyoon hakkiyeete.

³³ Leweenaꞌo boonoshi katemooch beeti boonoshi kexon kemmiichii, wochiyoon boonoshi mawiigaata, Yobeelee natooba wottebe. Leweenaꞌochi katemooch beeti kexinaꞌo bare Israꞌeeleenaꞌo daggooch boonoshi hajjeenaꞌone.

³⁴ Tunebaani boonoshi katemee guudoona beeti, gogoo tuneti miinji gaddo kechaaye. Ebi aroo bulli aaboon boonoshi hajjoone.

Girechon Ciinnii Beetona Icheti Sheeroo

³⁵ “ ‘Israꞌeelee asho tuneti ikke ne manoo gireꞌi bi qelloon hakkoo bi qayigaata, ne daggooch beeti iibboon woyee shiqqoon ne gaachoommon biin ne gaachetaa ne katinooch beebe;

³⁶ bi waanee shimon woyee daakkoon qaawiyaahine. Ne Nuggishoon shate. Ne katinooch bi beeyemmoyich tuniibe.

³⁷ Shimona biich gijjoon erettiyaahine. Woyee biich maayoon shimona kemmaahine.

³⁸ Kanaanee showoon neech imma, neechoo Nuggishoo tuneya Gibitsee neen kichaa deebeti, ne Nuggishoo Doono Yeeri taane.

Guunon Gawukkii Daachiyoo

³⁹ “ ‘Israꞌeelee asho tuneti ne giyoo gireꞌi, guuno tunii bi qelloon neech bi yittiigaata, guunochoommon neech bi maddemmoyich tuniyaahine.

⁴⁰ Biyoo gijjoona kiraayeeti shuunechoommon woyee ne showooch beeti shiqqoommon tuneree ne waan beebe. Yobeelee natooch beddaahaa neech maddebe.

⁴¹ Arooba biinnaa bi bushiishoona gawukkaa hambeete. Bi xibeenaꞌo waan, bi qaabbechinaꞌo showooch wottebe.

⁴² Israꞌeeleenaꞌo, Gibitsee kichaa ta deebeti ta guuninaꞌo boonoshi tunetoyich, guunochoommon kemmeyaayeete.

⁴³ Boonoshin neexi hajjiyaahine. Ne Nuggishoo taan shate.

⁴⁴ “ ‘Guunonaa gonneenna ittoshich bi qaawiigaata, ittoshi guudoona beeti aageteenaꞌo daggoochee kemoon hakkiyote.

⁴⁵ Wotta ittoshi showooch koteti shiqqeenaꞌonaa boonoshi bushiisheenaꞌonochi daggoochee guunon kemoon hakkiyote; eboshin ittoshi hajjoon tuniyoon hakkiyote.

⁴⁶ Bulli yemeenoon boonoshi hajjemmoyich, ittoshi bushiisheenaꞌoyich woraashiyoon hakkiyote. Tunebaani Israꞌeelo tuneti ittoshi manoon ciroona neexi hajjiyaahote.

⁴⁷ “ ‘Iibboo woyee ittoshi showooch koteti shiqqoo gaannetaa, bi giyooch beeti Israꞌeelee asho tuneti ittoshi manoo gireꞌi ebi iibboyich woyee shiqqoyich woyee iibboochi kechi ashoyich guuno tunoyich bi qelloon bi kemigaata,

⁴⁸ bi kechetoyee gubb biisheeyoon hakkiye. Bi maneenaꞌoochee ikkoo,

⁴⁹ woyee bi niheeshoo woyee bi niheeshoochi bushoo woyee bi katini xiboo tuneti asho koniyoona biin biishoon hakkiye; woyee bi qelloona bi gaannegaata, bi qelloon biishoon hakkiye.

⁵⁰ Biyoo biin kemetona tookki koteree bi qelloon guuno tuniiꞌi bi kemmiti natoochee tiijjiree, Yobeelee natooch beddaahaa beeti naton haddibe. Guuchittinoochee bi kechemmi gijjoo aroobee yemeenooch ikke shuunechoyich qocheebeeti gijjee tatoona tacheebe.

⁵¹ Meeti nato echeto bi tunegaata, ebi echeti natona tacheetaa, bi qelloon biishoyich echeti gijjoon qoce.

⁵² Tunebaani Yobeelee natooch beddaahaa echeto giisheche nato bi tunegaatoo, echeti natona tacheetaa, bi qelloon biishoyich echeti gijjoon qoce.

⁵³ Bi doono uro biinna tookkii bi beemmi aabo bullin natooch qocheebeeti gijjoona kiraayeeti shuunechon shaahiiree ciinani, biin neexi hajjaaye.

⁵⁴ “ ‘Eboshiichee ikke gommona guuchittinoochee keyo bi qayigaata, biinnaa bi bushiishoona waabeeti Yobeelee natooch keyeete.

⁵⁵ Israꞌeeleenaꞌo ta guuninaꞌone; Gibitsee kichaa ta deebeti ta hajjee guuninaꞌone. Tawoo ittoshi Nuggishoo Doono Yeeri taane.