Leweenaꞌo 24 - Kafa Linguistics Project

Yaafe Xaaꞌooch Ceecheyemmi Ceechoo

¹ Doono Yeeri Muusich ishichiye:

² “Ceechoo kuxeyaanoon bi aaxxemmoyich, zayitee michi aafoochee koyaa hiicheti gare ceechee zayitoon boonoshi deebemmoyich Israꞌeeleenaꞌoyich gete.

³ Danee duukkaanee daggooch, taabootoon bariibeeti maccillaatoyee maach, Harooni Doono Yeeri ta aafooch ceechoo kuxeyaanoon xumoochee harooch beddaahaa bi aaxxemmoyich tuniiree quyebe. Ebiyoo gubbi ittoshi shiijjeroo bulliich beddaahaa, bulli yemeenee qociyoon tunebe.

⁴ Harooni xalle aachoochee shuuneeti maqirajjee toommooch beeti ceecheenaꞌo kuxeyaanoon Doono Yeeri ta aafooch boonoshi aaxxemmoyich quyebe.

Doono Yeerich Giddemmi Yaaree Kosho

⁵ “Qacini buddinoon daamiree aaraa gutte xekee koshon kachiibe. Ikke xekee kosho bi kachemmo awudde kobbaye buddinoochee tunebe.

⁶ Eboshin shiritti shirittoon ikke yaaroona gediree, Doono Yeeri ta aafooch beeti, xalle aachoochee shuuneeti madellooch qeene.

⁷ Koshona tookki shalligichee qoodoyich tuneree, Doono Yeeri taach qaaqqooch michaa giddeebeeti deejjoon bi tunemmoyich, xalle ixaanoon yaari yaarooch gede.

⁸ Ebi kosho Israꞌeeleenaꞌo keroon shambeti shambetooba kuxeyaanoon Doono Yeeri ta aafooch qeechebe. Ebiyoo Israꞌeeleenaꞌoyich ta waanaa bulli yemeenee wogoone.

⁹ Ebi kosho Haroonich, bi shiijjeroyichoo tunemmone. Qaaqqooch michaa, Doono Yeeri taach giddeebeeti deejjoochee oogichii yaafeeton tuneti boonoshi qoodoo bi tunetoyich, ebi aroon yaafoo tuneti xaaꞌoochaa mameete; ebiyoo bulli yemeenee doyoone” iye.

Doono Yeerichi Shigoon Naaggiti Ashi Mooyo

^10-11 Bi indee Daani yoodoochee tuneti Dibiri bushee Shelomiti getteebeeti Israꞌeelechee, bi nihoo Gibitsee asho tuneti ikke uro Israꞌeeleenaꞌo daggooch hammiye. Biyoo kaamboochaa ikke Israꞌeelee ashoona kaarehe. Ebi Israꞌeelachechi bushoo Doono Yeerichi shigoon naagona uroon uppiye. Ebina biin Muus waan daammiyeete.

¹² Bi toommooch nalleyemmi mooyon Doono Yeeri bekkiimmi wottoon, are uroon cuchiyeete.

¹³ Doono Yeeriyoo Muusich ishichiye:

¹⁴ “Ebi naaggiti uroon kaamboyee maach kichibe. Bi naaggii beetaa waayeti asheenaꞌo bulli boonoshi kishoon bi shimbooch boonoshi kotiyemmoyich tuniibe. Israꞌeeleenaꞌo bulli biin xaqqoona yexi wuxibeete.

¹⁵ Aroochee Israꞌeeleenaꞌoyich ishichibe: ‘Asho koniyoona bi Nuggishoo Yeerin bi naagigaata, bi shuuneti axaaxoyich echeyemmone.

¹⁶ Doono Yeeri ta shigoon naaggimmo qitibe. Iiteenaꞌo bulli biin xaqqoona yexi wuxibeete. Israꞌeelee showooch koteti shiqqoo tuneba showee bushoo, asho koniyoona Doono Yeeri ta shigoon bi naagigaata, qitibe.

Ashoon Wuximmo Toommooch Kindemmi Nalloo

¹⁷ “ ‘Ashoon wuximmo qitibe.

¹⁸ Ashi gijjoon wuximmo kashee keroon aroommi gijjoon qoce.

¹⁹ Ikke asho ashi ashittinoon bi duubiigaata, are bi tuniitoommi mooyo bi toommooch tunebe.

²⁰ Ashi shaawushoon bi tiishigaata, bi shaawusho tiishebe; ashi aafoon bi dookkigaata, bi aafo dooge; ashi gashoon bi tiishigaata, bi gasho tiishebe; ashi ashittinooch bi tuniiti gonde mooyo amolla bi tunegaata, are mooyoommo bi toommooch tunebe.

²¹ Ashi gijjoon wuximmo aroommi gijjoon qoce. Ashoon wuxito qitibe.

²² Ebi sheeroo ittoshi daggooch koteti shiqqoyichoo tuneba showee bushoyich barbaraani ikke sheeroo tunebe. Ebiyoo ta, ittoshi Nuggishoo Doono Yeeri ta tunetoyichiye’ itone gete” iye.

²³ Muusiyoo ebi bullin asheenaꞌoyich gettiye. Asheenaꞌo Doono Yeerichi shigoon naaggiti uroon kaamboyee maach kichiꞌi xaqqoona yexxii wuxiyeete. Israꞌeeleenaꞌo eechiꞌi Doono Yeeri Muusich gettitoommon tuniiheete.