Leweenaꞌo 22 - Kafa Linguistics Project

Deejjoo Yaafoo Tuno

¹ Doono Yeeri Muusich ishichiye:

² “Yaafoo tuneti ta shigoon boonoshi giishiyaachemmoyich, Israꞌeeleenaꞌo taach kichiibeeti, yaafoo tuneti mooyon gaawichiree boonoshi yechemmoyich, Harooninaa bi bushiishoonoyich gete. Ta, Doono Yeeri taane.

³ “Boonoshich ishichibe: ‘Gubbi ne shiijjeroo bulliichee koniyoona eeꞌo tuneechii Israꞌeeleenaꞌo Doono Yeeri taach kichiti, yaafoo tuneti mooyon bi yeshigaata, ebi are asho ta aafoochee kichaa yookkebe. Ta, Doono Yeeri taane.

⁴ “ ‘Harooni yaroochee qeddee shaddee biiyecho woyee bi achoochee awaawunoo ufeebeeti asho koniyoona bi xallemmi wottoon, yaafoo tuneti mooyoochee amoonolla maayaaye. Qeeshoo qititi moochi achooch shaggiꞌi eeꞌeti mooyo amoonolla bi yeshigaata woyee bi keeroo bi achooch ufegaata,

⁵ woyee yuummero tuneti cooxon yeshona bi eeꞌegaata woyee amee gommonolla eeꞌeti ashoon yeshona bi eeꞌegaata,

⁶ ebiyoommi mooyon yechiti asho xumemmi wottoon eeꞌo tunemmone. Bi achoon bi machemmi wottoon, yaafoo tuneti mooyoochee maayaaye.

⁷ Aabe giyigaata, xalloo tunemmone. Aroyee gubb, ebi yaafoo tuneti maayoon mamon hakkiye. Ebiyoo qeesheenaꞌo maayoon daneebeeti gommo aroo baach bi tunetoyichiye.

⁸ Qititi gijjoochi woyee cooxo yechii wuxiti gijjoochi meenon maayaaye. Ebin bi tuniigaata, bi ashittinoon eeꞌiyemmone. Ta, Doono Yeeri taane.

⁹ “ ‘Qeesheenaꞌo boonoshi tuniyemmoyich ta getteti mooyon tuniibeete. Ebin tuniyoo boonoshi qayigaata, yaafeeti ta doyoon qallayoona axaaxechinaꞌo tuneree qitemminaꞌone. Ta, boonoshin yaafiibeeti Doono Yeeri taane.

¹⁰ “ ‘Qeeshee yaroochee tuneti ashoyee besh, bare asho ebi yaafeeti mooyoochee maayaaye; bi waan koteti iibboo woyee shuunoon shuuniyoyich gijjoona bi kiraayiti asho ebi aroochee maayaaye.

¹¹ Tunebaani qeeshoo guunon gijjoona bi kemegaata woyee bi kexooch shiijjeti guuno bi beegaata, aroochee mamon hakkiye.

¹² Bi bushee qeeshoo tuneyaani bare ashoon bi shaagigaata, ebi yaafoo tuneti mooyoochee mamon hakkaachane.

¹³ Tunebaani bushoon shiyaan beechaa, bi keno qitaa woyee gawukkeyaꞌa bi nihoo waan bi wottegaata, bi bushittinee yemeenooba bi mamoommon, bi nihoochi maayoochee mamuye. Tunebaani bare asho ebi aroochee maayaaye.

¹⁴ “ ‘Ikke asho ebi yaafoo tuneti mooyoochee diqqoona bi maagaata, bi maati maayoommon, wotta bi toommooch uuche kishoochee ikkoon daakki gedi qeeshoyich imbe.

^15-16 Qeesheenaꞌo, maayi bedaani asho aroochee maayemmoyich tuniyoona Israꞌeeleenaꞌo Doono Yeeri taach giddiibeeti, yaafeeti mooyon eeꞌiyaayeete. Ebin tuniyoo, maati ashi toommooch axaaxoonaa sheeroonon deebemmone. Ebiyoo boonoshin yaafiibeeto, Nuggishoo Doono Yeeri ta tunetoyichiye’ itone gete” iye.

Doono Yeerich Deejjeyemmi Gijjoo

¹⁷ Doono Yeeri Muusich ishichiye:

¹⁸ “Haroonich, bi bushiishoonaa Israꞌeeleenaꞌo bullinoyich ishichibe: ‘Ittoshi daggoochee Israꞌeelee asho woyee Israꞌeelee showooch koteti shiqqoo tiikkeshoon woyee mullee daaggoona giddeebeeti, micciibeeti deejjoon Doono Yeeri taach bi giddiigaata,

¹⁹ Doono Yeeri ta ittoshi deejjoon deqqemmoyich, bachaalli wuron woyee bagee baaddoon woyee emmishee baaddoon deejjibe.

²⁰ Bachiti mooyo bi achooch beeti gijjoon deejjiyaahote. Doono Yeeri ta ebin deꞌaachemmo taane.

²¹ Ikke asho tiikkeshoon woyee mullee daaggoona giddeebeeti deejjoon giddiyoyich bi miimoochee woyee bi bagoochee woyee bi emmishoochee ikkittinee deejjoon Doono Yeeri taach bi giddiigaata, Doono Yeeri ta ebi deejjoon deqqemmoyich, ikke shappaalloon tunebe. Bachiti mooyo bi achooch beeyaaye.

²² Aaf doogoon woyee baata tiishoon woyee duroon woyee mayo, quco woyee yaasho bi achooch beeton Doono Yeeri taach deejjiyaahote. Eboshin deejjee gudee toommooch michaa giddeebeeti deejjoon tuniiree Doono Yeeri taach deejjiyaahote.

²³ Bi baatoo oogeti genjoo woyee qamini dungo tuneti wuron woyee bagoon woyee emmishoon mullee daaggoona giddeebeeti deejjoyich giddiyoon hakkiyote; tunebaani tiikkeshoyich bi tunegaata, Doono Yeeri ta ebin deꞌaachemmo taane.

²⁴ Bi cammo qicheto woyee furitee kechito woyee qitito woyee maacheti gijjoon Doono Yeeri taach deejjiyaahote. Ebin ittoshi showoochaa deejjiyaahote.

²⁵ Israꞌeeleenaꞌo tuneyaaneenaꞌo waanee waati ebiyoommi gijjoon Doono Yeeri taach maayi buuroommon tuniiree giddiyaahote. Qicheto bi tunetoyich, bache mooyo bi achooch beetone; Doono Yeeri ta, ebin deꞌaachemmo taane’ itone gete” iye.

²⁶ Doono Yeeri Muusich ishichiye:

²⁷ “Maamo woyee bagee baaddoo woyee emmishee bushoo bi shiijjegaata, shabaatte qemi wottoon bi indeena tookki beebe. Tunebaani shimittinnee qemoyee gubb, qaaqqooch michaa giddeebeeti, Doono Yeeri ta deqqemmi deejjoon tunoon hakkiye.

²⁸ Miimin bi maamona tookki, bagee indeen bi bushoona tookki, emmishee indeenoo bi bushoona tookki ikke areddoon deejjiyaahote.

²⁹ “Doono Yeeri taach galletee deejjoon ittoshi deejjii beegaata, ebi deejjoon ta deqqemmoommon tuniiree deejjibote.

³⁰ Ebi deejjee meeno arooba maataa ciirebe. Aroochee amoonolla echiiree bi dechara bechiyaahote. Ta, Doono Yeeri taane.

³¹ “Ta getoon waayebote. Ceechishoo getote. Ta, Doono Yeeri taane.

³² Yaafoo tuneti ta shigoon giishiyaahote. Israꞌeeleenaꞌo bulli, yaafoo ta tunoon bekkiibeete. Ittoshin yaafiibeeti Doono Yeeri taane.

³³ Ittoshi Nuggishoon tunoyich, Gibitsee ittoshin kichaa deebeto taane. Ta, Doono Yeeri taane” iye.