Leweenaꞌo 21 - Kafa Linguistics Project

Qeesheenaꞌoyich Icheti Doyoo

¹ Doono Yeeri Muusich ishichiye: “Qeesheenaꞌo tuneti Harooni anaami bushiisheenaꞌoyich ishichi gete: ‘Ittoshi daggoochee koniyoona bi xiboo qitigaata, bi ashittinoon eeꞌiyaaye.

² Tunebaani bi katini xiboo, ebiyoo bi indee, bi nihoo, bi bushoo, bi bushee, bi manoonaa

³ biinna tookkii beeti shaakkeyaani bi maneenoyich bi ashittinoon eeꞌiyoon hakkiye.

⁴ Naacheꞌi bi xibetinaꞌoyich bi ashittinoon eeꞌiyaaye.

⁵ “ ‘Qeesheenaꞌo eeppii muushenetinaꞌo boonoshi tunoon bekkiyoyich, boonoshi qelloon cakkaayeete; boonoshi ishaanee goconoo maachaayeete; boonoshi achoon gari shettaayeete.

⁶ Boonoshi Nuggishoo taach yaafeeton tunebeete. Boonoshi Nuggishoo ta shigoon naakkiyaayeete. Micciibeeti deejjoonaa maayi buuroonon taach giddii beetinaꞌo boonoshi tunetoyich, yaafeenaꞌo tunebeete.

⁷ “ ‘Qeeshoo bi Nuggishoyich yaafeeto bi tunetoyich, yahechin tunaꞌa bi qeddoon eeꞌiitin woyee gawukkeeti maacheen shaaggaaye.

⁸ Maayi buuroon ittoshi Nuggishoo taach giddiibeeto bi tunetoyich, yaafoo tuniiree biin ciinote. Ittoshin yaafiibeeti Doono Yeeri ta, yaafoo ta tunetoyich, biin yaafoo tuniiree ciinote.

⁹ “ ‘Qeeshoo bushee yahechi tunaꞌa bi qelloon bi giishiigaata, bi nihoon giishiitine. Ebich qaaqqooch gokkebuye.

¹⁰ “ ‘Bi maneenaꞌo toommooch ukkireti, bi shimbooch zayito ukkeeti, yaafee kexooch shuuneechi tahoon tahoyich huutteti, qeeshee guudo bi qelloon kaaccii shiimoon qajjaaye; bi tahoonoo keexxaaye.

¹¹ Dubeno beeti xaaꞌooch shaggaaye; bi nihoochi woyee bi indeechi dubenona bi tunetaa, dubenoon yeshona eeꞌaaye.

¹² Yaafeeti, bi Nuggishoo ta zayito bi toommooch bi beetoyich, yaafeeti ta duukkaanoon duppii hamona duukkaanoon eeꞌiyaaye. Ta, Doono Yeeri taane.

¹³ “ ‘Bi shaaggemmi bushee gidiidee tunebuye.

¹⁴ Xuumeen, gawukkeetin, yahechi tunaꞌa bi qeddoon eeꞌiitin, eboshin shaaggaaye. Lewi yoodoochee gidiidee tuneti busheen baach shaage.

¹⁵ Ebin bi tuniyoo qayigaata, bi bushiisheenaꞌo bi asheenaꞌo daggooch eeꞌeenaꞌo tunemminaꞌone. Biin yaafiibeeti Doono Yeeri taane’ itone gete” iye.

¹⁶ Doono Yeeri Muusich ishichiye:

¹⁷ “Haroonich ishichibe: ‘Ne shiijjeroochee bache mooyo bi achooch beeti asho koniyoona bi Nuggishoo taach maayi buuroon giddiyoyich woyaaye.

¹⁸ Bache mooyo bi achooch beeto, ebiyoo aaf doogo woyee baata sheqqo woyee halla gondo woyee shappe quumecho,

¹⁹ woyee baata yesho woyee kisha tiisho,

²⁰ woyee kukko woyee deekko woyee aafee biiyecho woyee quciibeeti biiyo woyee xambiti mayo bi achooch beeto woyee guruusho maayi buuroon giddiyoyich woyaaye.

²¹ Qeeshoo Haroonichi shiijjeroochee bache mooyo bi achooch beeti asho koniyoona Doono Yeeri taach qaaqqooch michaa giddeebeeti maayi buuroon giddiyoyich woyaaye; bache mooyo bi achooch bi beetoyich, bi Nuggishoo taach maayi buuroon giddiyoyich woyaaye.

²² Ebiyoommi asho buuro tuniitaa taach giddeti, yaafoonaa oogeti yaafoona tuneti maayoochee mamon hakkiye.

²³ Tunebaani bache mooyo bi achooch bi beetoyich, yaafeeti mooyinaꞌon bi eeꞌiyaachemmoyich, maccillaatoo beetooch woyee deejjee gudo beetooch giddaaye. Boonoshin yaafiibeeti Doono Yeeri taane’ itone gete” iye.

²⁴ Muusiyoo ebin Haroonich, bi bushiisheenaꞌonaa Israꞌeeleenaꞌo bullinoyich gettiye.