Leweenaꞌo 20 - Kafa Linguistics Project

Axaaxoon Shuuneti Ashi Toommooch Shaggemmi Nalloo

¹ Doono Yeeri Muusich ishichiye:

² “Israꞌeeleenaꞌoyich ishichi gete: ‘Israꞌeeleenaꞌo ittoshi daggoochee woyee Israꞌeelee showooch koteti shiqqeenaꞌo daggoochee koniyoona bi bushoon Molookich bi imigaata, qitibe. Asheenaꞌo bulli xaqqoona yexiree biin wuxibeete.

³ Bi bushoon Molookich imona ta yaafee duukkaanoon bi eeꞌitoyich, yaafe ta shigoonoo bi naakkiitoyich, biich etto tunemmo taane; bi asheenaꞌo daggoochee kichaa bi yookkeyemmoyichoo tuniyemmo taane.

⁴ Uro bi bushoon Molookich bi imon ariibee wuxaanoon asheenaꞌo cikkii qayigaata,

⁵ are uroonaa bi kechi asheenaꞌonoyich etto tunemmo taane. Biinnaa taan qajjiichii, Molookich goyinnoyich biin dabbitinaꞌonon boonoshi ashi daggoochee kichaa boonoshi yookkeyemmoyich tuniyemmo taane.

⁶ “ ‘Ikke asho, taan qajjiꞌi, qititi ashoona tookkii yibbaatee beetinaꞌonaa allaameenaꞌona waanee echii waayeya bi hamigaata, are ashoyich etto tunemmo taane. Bi asheenaꞌo daggoochee kichaa bi yookkeyemmoyich tuniyemmo taane.

⁷ “ ‘Illa ebich ittoshi qelloon yaafiree yaafoon tunebote. Ta, ittoshi Nuggishoo Doono Yeeri taane.

⁸ Ta qociiti qociyoon manjii quyebote. Ta, ittoshin yaafiibeeti Doono Yeeri taane.

⁹ “ ‘Bi nihoon woyee bi indeen naaggiibeeti asho koniyoona qitibe. Bi nihoon woyee bi indeen bi naaggitoyich, bi damoyich koniyoona echeyaachemmone.

¹⁰ “ ‘Ikke asho, ashi mecheena tookkii shunoo bi maagaata, uroonaa ureena boonoshi guttiyona qitibeete.

¹¹ “ ‘Ikke asho, bi nihoochi mecheen bi qeyigaata, bi nihoon bi giishiitoyich, boonoshi guttiyona qitibeete. Boonoshi damoyich koniyoona echeyaachemmone.

¹² “ ‘Ikke asho, bi bushoo mecheen bi qeyigaata, boonoshi guttiyona qitibeete; shullii boonoshi itoyich, boonoshi damoyich koniyoona echeyaachemmone.

¹³ “ ‘Ikke asho, maacheen qemoommon anaamon bi qeyigaata, boonoshi guttiyona eeꞌe mooyon boonoshi tuniitoyich, qitibeete. Boonoshi damoyich koniyoona echeyaachemmone.

¹⁴ “ ‘Ikke asho, busheenaa indeenon bi shaagigaata, ebi oogeti gonde mooyone. Ittoshi daggooch ebiyoommi gonde mooyo bi beetaachemmoyich, boonoshi bulli qaaqqooch gokkebeete.

¹⁵ “ ‘Ikke asho gijjoon woyee cooxon bi qeyigaata, qitibe; are bi qeyiti gijjoon woyee cooxon wuxibote.

¹⁶ “ ‘Ikke ure, gijjoo woyee cooxo waan giddaꞌa biin bi qeyemmoyich bi tuniigaata, ureenaa are gijjoo woyee cooxonon wuxibote. Boonoshi damoyich echeyemmo koniyoona aalloone.

¹⁷ “ ‘Ikke asho, bi nihoochi bushee woyee bi indeechi bushee tuneti bi maneen bi shaagigaata, ebi yeelliiti mooyone. Kiceeti asheenaꞌo ciini beetaa, boonoshi asheenaꞌo daggoochee kichaa yookkebeete. Bi maneen bi qeyitoyich, bi naboyich echeyemmo koniyoona aalloone.

¹⁸ “ ‘Ikke asho, qechoona beeti ureen bi qeyigaata, damoo ufeebeeti ureechi achoon bi gaxxitoyich, ureyoo ebi bi achoon bi gaxxitoyich, boonoshi asheenaꞌo daggoochee kichaa yookkebeete.

¹⁹ “ ‘Ne indee maneen woyee ne nihoo maneen qeyaahine. Ebi xibittinoon qallayoo bi tunetoyich, ebin tuniimminaꞌo boonoshi shuuneti axaaxoyich echeyemminaꞌone.

²⁰ “ ‘Ikke asho, bi niheeshoochi mecheen bi qeyigaata, bi niheeshoon bi giishiitoyich, boonoshi guttiyona boonoshi shuuneti axaaxoyich echeyemminaꞌone; shiijjeroon keraanoonoo qitemminaꞌone.

²¹ “ ‘Ikke asho, bi manoochi mecheen bi shaagigaata, ebi eeꞌe mooyo bi tunetoyich, bi manoonoo bi giishiitoyich, shiijjeroon keraanoon qitemminaꞌone.

²² “ ‘Illa ittoshin giijjiya ta ii beeti showoo ittoshin kichi bi dufaachemmoyich, ta qociiti qociyoonaa ta dojjiti doyoona bulloshin manjiiree quyebote.

²³ Ittoshi aafoochee ta yookkaa kichaabeeti aageteenaꞌo doyoon dabbiyaahote. Ebi mooyinaꞌon boonoshi tuniitoyich, boonoshin tiyaaroye.

²⁴ Tunebaani ta ittoshich “Boonoshi showoon woraashemmo ittoshine. Ebi ejjoonaa eeyona xuupphiibeeti showoon ittoshi hajjoo tuniiree ittoshich immemmo taane” iyoye. Aageteenaꞌo waanee ittoshin bariiti, ittoshi Nuggishoo Doono Yeeri taane.

²⁵ “ ‘Illa ebich xalloo tuneti gijjoo, cooxo, kafoonaa xalloo tuneyaanoonon barbariibote. Eeꞌoone iyaꞌa ta bariiti gijjoo, cooxo, kafoo, showoona yuummiibeeti mooyo amoonolla ittoshi qelloon eeꞌiyaahote.

²⁶ Doono Yeeri ta, yaafoo ta tunetoyich, ittoshiyoo taach yaafeeto tunemmo ittoshine. Ta hajjoo ittoshi tunemmoyich aageteenaꞌo daggoochee ittoshin bariito taane.

²⁷ “ ‘Ittoshi daggoochee ikke asho, anaamo tuneba maachee, qititi ashoona tookkii yibbaateebeeto woyee allaamoo bi tunegaata, qitibe. Boonoshiyoo xaqqoona yexaa qitibeete. Boonoshi damoyich koniyoona echeyaachemmone’ itone gete” iye.