Leweenaꞌo 19 - Kafa Linguistics Project

Yaafoo Tuneechi Baribare Sheeroo

¹ Doono Yeeri Muusich ishichiye:

² “Israꞌeelee iiteenaꞌo bullich ishichi gete: ‘Ittoshi Nuggishoo Doono Yeeri ta, yaafoo ta tunetoyich, ittoshiyoo yaafoo tunebote.

³ “ ‘Ittoshi daggoochee asho bi ikkikkoona bi indeenaa bi nihoonon oogiibe. Ta shambetoon quyebote. Ta, ittoshi Nuggishoo Doono Yeeri taane.

⁴ “ ‘Taan qayiree shahalloyich goyinneyaahote. Xuuroon qaaqqoona wocii nuggisheenaꞌochi misiloon shuuneree goyinneyaahote. Ta, ittoshi Nuggishoo Doono Yeeri taane.

⁵ “ ‘Ikkittinee deejjoon taach ittoshi deejjii beegaata, ebi ittoshi deejjoon ta deqqemmon tuniiree deejjibote.

⁶ Ebi deejjoo bi giddehoobinaa bi decharoobina manjebe. Ebi deejjee meenoochee bi sharittich qeyito bi beegaata, qaaqqooch gokkebe.

⁷ Bi sharittich bi manjegaata, eeꞌetone; ebi deejjoon deꞌaachemmo taane.

⁸ Ebi aroochee maammi asho koniyoona, Doono Yeeri taach yaafeeti mooyon bi eeꞌitoyich, bi shuuneti axaaxoyich echeyemmone; bi asheenaꞌo daggoocheenoo kichaa yookkeyemmone.

⁹ “ ‘Ittoshi maayoon ittoshi qecigaata, taroon echiyaanoon bullin qeccaahote. Maayi buttoonoo butteyaahote.

¹⁰ Ittoshi woyinee aafoon butteyaahote. Showooch hollitonoo maciyaahote. Ebi aroon girechonaa shiqqoonoyich gawukkibote. Ta, ittoshi Nuggishoo Doono Yeeri taane.

¹¹ “ ‘Gaajjaahote. “ ‘Dawushiyaahote. “ ‘Ittoshi daggoochee ikkoo baroyich koottaaye.

¹² “ ‘Ta shigoon ceegiree kootoon wogeyaahote. Ebin tuniyoona ta shigoon naakkiyaahote. Ta, Doono Yeeri taane.

¹³ “ ‘Neenoommi ne manoon xuqqaahine. Biin boggaahine. “ ‘Shuunoon ne shuuniiti ashi caajjee gatiyoon qocaanoon qeejjiyaahine.

¹⁴ “ ‘Ulloon naaggaahine. Aaf doogoochi aafoochoo tephi dichemmi mooyon kotiyaahine. Ne Nuggishoo taan shate. Ta, Doono Yeeri taane.

¹⁵ “ ‘Dayinnetoon dabiiyaahine. Girecho waan gaꞌeyaahine. Gaannechoyichoo bariti oogoon immaahine. Tunebaani neenoommi ne manoyich dayinnetoona nallibe.

¹⁶ “ ‘Ashoon oonibee ne asheenaꞌo daggooch okk hach shaꞌeyaahine. “ ‘Neenoommi ne manoon qitooch bechemmi amee mooyonona tuniyaahine. Ta, Doono Yeeri taane.

¹⁷ “ ‘Ne manoon mulloochee tiijjiree shixxaahine. Ne toommooch axaaxoo tuneree bi haddeyaachemmoyich, xalla biin ittibatebe.

¹⁸ “ ‘Ne asheenaꞌo daggoochee koni toommoochona nichoon kichiyaahine. Mooyon shaaccaahine. Neenoommi ne manoon neenna tachiree shune. Ta, Doono Yeeri taane.

¹⁹ “ ‘Ta qociiti qociyoon quyebote. “ ‘Yara bare gijjeenaꞌo shuggeyemmoyich tuniyaahote. “ ‘Ne goyooch gutte maayi yaroon shookkaahine. “ ‘Gutte mooyoochee shippeti tahoon taheyaahine.

²⁰ “ ‘Ikke asho ashich maakkeeti gonneen bi qeyigaata, ure guuchittinoochee bi kechemmoyich biin maakkiiti uro gijjoon qocaano bi tunetaanoona, ebi gonneenaa biin qeyiti uroona sheereyemminaꞌone. Tunebaani ure batt guuchittinoochee keyaane bi tunetoyich, wuxeyaachemminaꞌone.

²¹ Uro bi qellich xuꞌee deejjoo tunemmi ikke bagee baaddoon Doono Yeeri taach, danee duukkaanee kellooch deebe.

²² Qeeshoo ebi xuꞌee deejjee bagee baaddoona ta aafoochaa uroochi xuꞌo maareyemmoyich tuniyemmone; ebina bi shuuneti axaaxoo maareyemmone.

²³ “ ‘Kanaanee showooch giyiꞌi bi aafo manjeebeeti mixon ittoshi bechiyooba, keejje nati wottoon bi aafoon mamo hakkeyaachemmo bi tunoon ariibote. Keejje nati wottoon manjeyaachemmone.

²⁴ Awuddinnee natooba, ebi michi aafo bulli Doono Yeeri taach yaafeeti galletee deejjoo tunebe.

²⁵ Tunebaani uuchinnee natooba, ebi michi aafoon mamon hakkiyote. Ebin ittoshi tuniigaata, wodde aafoon ittoshich aafemminaꞌone. Ta, ittoshi Nuggishoo Doono Yeeri taane.

²⁶ “ ‘Damoon quupphiti meenon ciroona maayaahote. “ ‘Kaayeyaahote. Iicishoo gettaahote.

²⁷ “ ‘Ittoshi qelloon mallaalloochaa qamichi maacheyaahote. Ittoshi ishaanee goconoo maacheyaahote.

²⁸ Qititi ashich ittoshi qeddoon gari qoccaahote. “ ‘Gaakkoon kochoommon ittoshi achoon kocheyaahote. Ta, Doono Yeeri taane.

²⁹ “ ‘Yahechinaꞌo boonoshi tunemmoyich tuniyoona ne maache bushiisheenaꞌon giishiyaahine. Ebin ne tuniigaata, showoo yahoonaa oogeti gonde mooyona ceennemmone.

³⁰ “ ‘Ta shambetoon quyebote. Ta goyinnee xaaꞌoonoo oogiibote. Ta, Doono Yeeri taane.

³¹ “ ‘Qititi ashoona tookkii yibbaatee beetinaꞌonaa allaameenaꞌona waan echii waayeya hammaahote. Ebin ittoshi tuniigaata, eeꞌemmo ittoshine. Ta, ittoshi Nuggishoo Doono Yeeri taane.

³² “ ‘Bukkechi ashi aafooch tiyi neexebe. Geene ashoon oogiibe. Ne Nuggishoo taanoo shate. Ta, Doono Yeeri taane.

³³ “ ‘Shiqqoo ittoshina tookkii, ittoshi showooch bi kotegaata, biin xuqqaahote.

³⁴ Ebi shiqqoon showee bushoon shaahiiree ciinote. Ittoshin ittoshi shunoommon, biin shunote. Gibits shiqqoo tuneꞌi ittoshi kotoon batteyaahote. Ta, ittoshi Nuggishoo Doono Yeeri taane.

³⁵ “ ‘Nalloochaa, qellayoochaa, machoona qoconaa shafiroonoochaa daboon shuuneyaahote.

³⁶ Maayoon ittoshi shafirii woyee aache mooyon ittoshi qeellee beegaata, tate shafiree qiicoona, tate machee qiicoonaa tate qeellee qiicoona qeellebote. Ta, ittoshin Gibitsee kichaa deebeti, ittoshi Nuggishoo Doono Yeeri taane.

³⁷ “ ‘Ta qociiti qociyoonaa ta dojjiti doyoona bulloshin manjiiree quyebote. Ta, Doono Yeeri taane’ itone gete” iye.