Leweenaꞌo 18 - Kafa Linguistics Project

Qeyeyaachemmi Maacheenaꞌo

¹ Doono Yeeri Muusich ishichiye:

² “Israꞌeeleenaꞌoyich ishichi gete: ‘Ta ittoshi Nuggishoo Doono Yeeri taane.

³ Ittoshi beebee echeti Gibitsee asheenaꞌo tunii beetoommi mooyon tuniyaahote. Wotta and ittoshin ta giijjiya ii beeti Kanaanee asheenaꞌo tunii beetoommi mooyon tuniyaahote. Boonoshi qocoonoo dabbiyaahote.

⁴ Ta dojjiti doyoon, ta qociiti qociyoonoo ceechi quyebote. Ta, ittoshi Nuggishoo Doono Yeeri taane.

⁵ Asho eboshin tuniiree kashoona bi beeyemmoyich, ta dojjiti doyoonaa ta qociiti qociyoonon quyebote. Ta, Doono Yeeri taane.

⁶ “ ‘Ittoshi daggoochee koniyoona bi xibeen qeya, bi xibee tuneti ashe koni waanona katinnaaye. Ta, Doono Yeeri taane.

⁷ “ ‘Ne indeen qemona ne nihoon giishiyaahine. Ebiyeenoo wotta ne hajjee indee bi tunetoyich, biin qeyaahine.

⁸ “ ‘Ne nihoochi mecheen qemona ne nihoon giishiyaahine.

⁹ “ ‘Ne maneen qeyaahine. Ne nihoochi bushee woyee ne indeechi bushee, kexooch shiijjeti woyee maachee waati bi tunetaanoona, ebin tuniyaahine.

¹⁰ “ ‘Ne bushoochi busheen woyee ne busheechi busheen qeyaahine. Ebi neen giishiyemmone.

¹¹ “ ‘Ne nihoo mechee ne nihoyich shiyeti busheen qeyaahine. Ebi aree neech maneene.

¹² “ ‘Ne nihoo maneen qeyaahine. Ebi aree ne nihoochi katini xibeene.

¹³ “ ‘Ne indee maneen qeyaahine. Ebi areyoo ne indeechi katini xibeene.

¹⁴ “ ‘Ne niheeshoo mecheen qemona ne niheeshoon giishiyaahine. Ebi aree neech niheeshoo mecheene.

¹⁵ “ ‘Ne naamecheen qeyaahine. Ebi aree ne bushoo mecheene; ebich biin qeyaahine.

¹⁶ “ ‘Ne manoo mecheen qeyaahine. Ebi ne manoon giishiyoone.

¹⁷ “ ‘Biin ne qeyeti ureechi busheen woyee bi anaami bushoochi busheen woyee bi maache busheechi busheen qeyaahine. Eboshi are ureechi katini xibeenaꞌone. Ebi shulloone.

¹⁸ “ ‘Ne mechee kashoona beetaa, bi maneen shaagi nuutiiree biin qeyaahine.

¹⁹ “ ‘Qechoona eeꞌee toommooch beeti maachee waan gidderee, biin qeyaahine.

²⁰ “ ‘Ashi mechee tuneti ureen qemona ne qelloon eeꞌiyaahine.

²¹ “ ‘Ne bushiishoochee ikkoonolla Molookich bi deejjeyemmoyich beshii imona ne Nuggishoo ta shigoon naakkiyaahine. Ta, Doono Yeeri taane.

²² “ ‘Maacheen ne qemoommon anaamon qeyaahine. Ebi tiyaariibeeti mooyone.

²³ “ ‘Gijjoon woyee cooxon qemona ne ashittinoon eeꞌiyaahine. Maacheyoo gijjoo woyee cooxo biin bi qeyemmoyich bi qelloon beshiiree immaayuye. Ebi ciigiiti mooyone.

²⁴ “ ‘Ebi mooyoochee ikkoonolla ittoshi qelloon eeꞌiyaahote. Ittoshi aafoochee yookkaa ta kichaabeeti aageteenaꞌo bulli ebina boonoshi qelloon eeꞌiitinaꞌone.

²⁵ Showoo eeꞌehe. Tawoo arooch beeti asheenaꞌochi naboona are showoon naxeree arooch beeti asheenaꞌon kichi bi duppemmoyich tuniyemmo taane.

²⁶ Tunebaani ittoshi ta qociiti qociyoonaa ta dojjiti doyoonon quyebote. Showee bushoo tuneba ittoshi daggooch koteti shiqqoo ebiyoommi eeꞌe mooyoochee amoonolla shuunaaye.

²⁷ Ittoshiyee aaf are showooch koteti asheenaꞌo ebiyoommi eeꞌe mooyinaꞌon boonoshi tuniitoyich showoo eeꞌetone.

²⁸ Showoon ittoshi eeꞌiigaata, ittoshiyee aaf beeti aageteenaꞌon kichii bi dufoommon ittoshinoo kichi duppemmone.

²⁹ “ ‘Ebiyoommi eeꞌe mooyinaꞌo daggoochee aabinona tuniibeeti asho bi asheenaꞌo daggoochee kichaa yookkebe.

³⁰ Ebich ta getoon waayebote. Ittoshiyee aaf are showooch koteti asheenaꞌo tuniibee echeti eeꞌe mooyoochee amoonolla, tuniyaahote. Eboshin tuniyoona ittoshi qelloon eeꞌiyaahote. Ta, ittoshi Nuggishoo Doono Yeeri taane’ itone gete” iye.