Leweenaꞌo 17 - Kafa Linguistics Project

Damoon Mamo Bacho

¹ Doono Yeeri Muusich ishichiye:

² “ ‘Doono Yeeri gettito ebiniye’ getiree, Haroonich, bi anaami bushiishoonaa Israꞌeeleenaꞌo bullinoyich gete:

^3-4 ‘Israꞌeeleenaꞌo daggoochee ikke asho miimon, bagoon woyee emmishoon Doono Yeerich deejjoo tuniiꞌi giddiyoyich Doono Yeerichi danee duukkaanee kellooch deebaanoon, kaambee daggoochaa woyee kaamboyee maachaa bi guurigaata, ebi bi ukkiti damoyich are asho echeyemmone. Damoon bi ukkitoyich, are uro bi asheenaꞌo daggoochee kichaa yookkebe.

⁵ Ebi sheeroo bi icheto, Israꞌeeleenaꞌo xalle gaddoochaa boonoshi guuriibeeti deejjee gijjeenaꞌon danee duukkaanee kellooch, qeeshoo waan deebiree, ebi aroochaa ikkittinee deejjoon tuniiree Doono Yeerich boonoshi deejjemmoyichiye.

⁶ Qeeshoo damoon danee duukkaanee kellooch beeti Doono Yeerichi deejjee gudee toommooch wucibe; awuyonoo Doono Yeerich gaawe cinnoon bi cinnemmoyich tuniiree michibe.

⁷ Illa ebiyee damba Israꞌeeleenaꞌo emmishi shaahe yinneenaꞌoyich gijjeenaꞌon guuroona Doono Yeerich boonoshi gibeneyoon shappayaayeete. Ebi Israꞌeeleenaꞌo boonoshi shiijjerooch beddaahaa bulli yemeenoon boonoshi quyemmi qociyoone’ gete.

⁸ “Ebich boonoshich ishichibe: ‘Micciibeeti deejjoon woyee bare deejjoon giddiibeeti Israꞌeelee asho tuneba boonoshi daggooch beeti shiqqoo

⁹ Doono Yeeri taach deejjiya danee duukkaanee kellooch deebaano bi beegaata, bi asheenaꞌo daggoochee kichaa yookkebe.

¹⁰ “ ‘Israꞌeelee ashoochee woyee Israꞌeeleenaꞌo daggooch shiqqoo tuneꞌi koteti asheenaꞌoochee koniyoona damoon bi maagaata, biich etto tunemmo taane; bi asheenaꞌo daggoochee biin kichi yookkemmo taane.

¹¹ Kashechi halloochi kasho bi beeto bi damoochiye. Ittoshi axaaxoon maariyoyich damoo deejjee gudooch bi ukkeyemmoyich ta getteto, ebichiye. Kashecho bi tunetoyich, axaaxoon maariibeeto damoone.

¹² Israꞌeeleenaꞌoyich “Ittoshi daggoochee koniyoona damoon maayaaye; ittoshi daggooch koteti shiqqolla bi tunetaa maayaaye” ta ito ebichiye.

¹³ “ ‘Israꞌeeleenaꞌo daggoochee woyee boonoshi daggooch koteti shiqqeenaꞌoochee ikke asho xalloo tuneti cooxon dabbeꞌi woyee xalloo tuneti kafoon kambeꞌi bi wuxigaata, damoon showooch ukkiree bi toommooch showoon qeribe.

¹⁴ Kashechi halloo bullichi kasho bi beeto bi damoochiye. Israꞌeeleenaꞌoyich “Kashechi halloochi kasho bi beeto bi damooch bi tunetoyich, kashechi halloochi damoo amoonolla maayaahote. Ebin maammo bi asheenaꞌo daggoochee kichaa yookkeyemmone” ta ito ebichiye.

¹⁵ “ ‘Showee bushoo tuneba shiqqoo koniyoona qititi gijjoon woyee cooxo yeshaa qititon maammo bi tahoon maye; bi qeddoonoo machebe; biyoo xumemmi wottoon eeꞌoone. Aroochee xallemmone.

¹⁶ Bi tahoon bi mayo qayigaata, bi qeddoonoo machoo bi qayigaata, bi shuuneti axaaxoyich echeyemmone’ itone gete” iye.