Leweenaꞌo 15 - Kafa Linguistics Project

Ashoon Eeꞌiibeeti Achoochee Ufeebeeti Mooyo

¹ Doono Yeeri Muusinaa Harooninoyich ishichiye:

² “Israꞌeeleenaꞌoyich ishichibote: ‘Ikke asho bi anaami achoochee awaawunoo ufeebeeto tunegaata, are asho eeꞌoone.

³ Ebi bi anaami achoochee ufeebeeti awaawunoo andoo ufeebeeto tuneba neexeto tuneba, are asho eeꞌoone.

⁴ “ ‘Bi qeyiti qeeno bulli eeꞌoone; bi koteti mooyo bulli eeꞌoone.

⁵ Bi qeyiti qeenon yechimmi asho koniyoona bi tahoon maye; bi qeddoonoo machebe; biyoo xumemmi wottoon eeꞌo tunemmone.

⁶ Bi koteti mooyo bulliich kotemmi asho koniyoona bi tahoon maye; bi qeddoonoo machebe; biyoo xumemmi wottoon eeꞌo tunemmone.

⁷ “ ‘Ebi uroochi achooch shaggimmo bi tahoon maye; bi qeddoon machebe; biyoo xumemmi wottoon eeꞌo tunemmone.

⁸ “ ‘Ebi uro xalle ashi toommooch bi cudigaata, are asho bi tahoon maye; bi qeddoonoo machebe; biyoo xumemmi wottoon eeꞌo tunemmone.

⁹ “ ‘Ebi uro yebbeti koroo eeꞌoone.

¹⁰ Uro yebbeꞌi koteti xaaꞌooch beeti mooyo amoonolla yechimmo koniyoona xumemmi wottoon eeꞌo tunemmone. Uro koteti mooyon tiijjimmi asho bi tahoon maye; bi qeddoonoo machebe; biyoo xumemmi wottoon eeꞌo tunemmone.

¹¹ “ ‘Ebi uro bi kishoon macheyaanoon bare ashoon bi yeshigaata, ebi bi yechiti asho bi tahoon maye; bi qeddoonoo machebe; biyoo xumemmi wottoon eeꞌo tunemmone.

¹² “ ‘Ebi uro yechiti qondoo bulli tiichebe; bi yechiti, mixoochee shuuneeti qiico bulli machebe.

¹³ “ ‘Bi anaami achoochee awaawunoo ufeebeeti asho ebi aroochee bi wodiyooba, xalleto bi tunemmoyich, shabaatte qemon quyebe. Bi tahoon maye; woce aacona bi qeddoon machebe; biyoo xallemmone.

¹⁴ Shimittinnee qemooba gutte daabbichoon woyee gutte uggee cobbelloon, Doono Yeeri ta aafooch, danee duukkaanee kellooch, qeeshoo waan giddiibe.

¹⁵ Qeeshoo ikkoon axaaxee deejjoyich, wotta ohe ikkoon micciibeeti deejjoyich giddiyemmone. Ebin tuniyoona uro Doono Yeeri ta aafoochaa bi eeꞌoochee bi xallemmoyich tuniyemmone.

¹⁶ “ ‘Ikke asho bi keeroo ufegaata, bi qeddoon machebe; biyoo xumemmi wottoon eeꞌo tunemmone.

¹⁷ Qoreddoochee woyee gooqqoochee shuuneeti qiico amoochi toommoochona ebi keeroo ufegaata, aacona machebe; biyoo xumemmi wottoon eeꞌo tunemmone.

¹⁸ Ikke asho maacheena tookkii qeyiꞌi bi keeroon bi ukkigaata, boonoshi guttiyona boonoshi qeddoon machebeete; boonoshiyoo xumemmi wottoon eeꞌo tunemminaꞌone.

¹⁹ “ ‘Ikke ure bi achoochee damoo ufeebeeto bi tunegaata, ebiyoo qechee shago bi tunegaata, shabaatte qemi wottoon eeꞌemmine. Bi achooch shaggimmo xumemmi wottoon eeꞌo tunemmone.

²⁰ “ ‘Bi eeꞌehooba bi qeyeti beeroo bulli eeꞌemmone; bi koteti mooyo bulliyoo eeꞌemmone.

²¹ Bi qeyeti beeroon yechimmi asho koniyoona bi tahoon maye; bi qeddoonoo machebe; biyoo xumemmi wottoon eeꞌo tunemmone.

²² Bi koteti mooyo amoonolla yechimmi asho koniyoona bi tahoon maye; bi qeddoonoo machebe; biyoo xumemmi wottoon eeꞌo tunemmone.

²³ Bi qeyeti beeroon tuneba bi koteti mooyo amoonolla yechiti asho xumemmi wottoon eeꞌo tunemmone.

²⁴ “ ‘Ikke asho biin bi qeyaa qecho bi achooch bi shagigaata, shabaatte qemi wottoon eeꞌo tunemmone; bi qeyiti beeroo bulli eeꞌo tunemmone.

²⁵ “ ‘Ikke ure bi qechee gooroyee bara meeti aaboon bi achoochee damoo ufeebeeto bi tunegaata, woyee bi qechee goorooch bi xalli bede aabooba xalleyaanoon bi damoo ufaabeeti bi tunegaata, ebi damoo ufeebeeti aabo bullin, qechee goorooch eeꞌe bi tunoommon eeꞌe tuneree beeyemmine.

²⁶ Damoo ufeebeeti aabooba bi qeyeti beeroo bulli, bi koteti mooyo bulliyoo qechee goorooch eeꞌo bi tunoommon eeꞌo tunemmone.

²⁷ Bi beeroon woyee bi koteti mooyon yechimmi asho eeꞌo tunemmone. Bi tahoon maye; bi qeddoonoo machebe; biyoo xumemmi wottoon eeꞌo tunemmone.

²⁸ “ ‘Damee ufo neexehooba, shabaatte qemon quyebuye. Ebiyee gubb xallee tunemmine.

²⁹ Shimittinnee qemooba gutta daabbichoon woyee gutte uggee cobbelloon, danee duukkaanee kellooch, qeeshoo waan giddiibuye.

³⁰ Qeeshoo ikkoon axaaxee deejjoyich, wotta ohe ikkoon micciibeeti deejjoyich giddiyemmone. Ebin tuniyoona ure Doono Yeeri ta aafoochaa bi eeꞌoochee bi xallemmoyich tuniyemmone.

³¹ “ ‘Ebina boonoshi daggooch beeti ta danee duukkaanoon eeꞌiiree boonoshi qitaachemmoyich, boonoshin eeꞌiyemmi mooyoochee Israꞌeeleenaꞌon bariibote’ itone getote” iye.

³² Bi anaami achoochee awaawunoo ufee beetoyich, woyee keeroo ufeꞌi biin eeꞌiiti ashich,

³³ qechechi ureyich, bi achoochee ufeebeeti mooyo kechiibeeti maachech tuneba anaamoyich, woyee eeꞌe tuneti ureen qeyiti ashich tunemmi sheeroo ebine.