Leweenaꞌo 13 - Kafa Linguistics Project

Qeddee Shaddee Biiyeechon Icheti Sheeroo

¹ Doono Yeeri Muusinaa Harooninoyich ishichiye:

² “Ikke asho mayo woyee gaaboo woyee quco bi achooch kechiꞌi, qeddee shaddee biiyooch bi shaddee gaata, asheenaꞌo uroon qeeshoo Haroon waan woyee qeeshoo tuneti bi bushiishoochee ikkoo waan daambeete.

³ Qeeshoo ebi uroochi achooch beeti mayon manjii ciine. Ebi mayee toommooch beeti eexo naccegaata, mayo gooqqoon besheꞌi maac bi giyigaatoo, ebi qeddee shaddee biiyoone. Qeeshoo uro eeꞌo bi tunoon arichiibe.

⁴ Tunebaani bi achooch kechiti mooyo naccoo, gooqqoon besheꞌi maac giyaano tuneꞌi, toommooch beeti eexo nacco qayigaata, qeeshoo uroon shabaatte qemi wottoon ashoyee bariree bi beeyemmoyich tuniibe.

⁵ Aroochee shabaattinnee qemooba, wochinnoon manjii ciine. Bi ciinaa, mayo aafichoommo bi tunegaata, bi qeddee toommoochoo gaminaano bi tunegaata, wochinnoon shabaatte qemon ashoyee bariree bi beeyemmoyich tuniibe.

⁶ Shabaattinnee qemooba, qeeshoo wochinnoon manjii ciine. Mayo bi qeddooch gaminnii hamaanoon shokkee hammiibeeto bi tunegaata, qeeshoo, uro xalloo bi tunoon arichiibe. Ebi bi achooch kechito qucoone. Uro bi tahoon mayiree xalloo tunemmone.

⁷ Qeeshoo ciinniꞌi xalloo bi tunoon bi arichiitoyee gubb, ebi quco gaminnii bi hamigaata, uro wochinnoon qeeshoo waan giddebe.

⁸ Qeeshoo ciinaa, quco gaminnii hammiibeeto bi tunegaata, uro eeꞌo bi tunoon arichiibe. Ebiyoo qeddee shaddee biiyoone.

⁹ “Ikke asho qeddee shaddee biiyoon bi biiyegaata, asheenaꞌo uroon qeeshoo waan daambeete.

¹⁰ Biyoo ebi biiyoon manjii ciine. Uroochi achooch nafiti mooyo naccoo bi tunegaata, bi toommooch beeti eexo naccegaata, ebi nafiti achoo mayeꞌi ceelle meeno bekkegaata,

¹¹ ebi wodaani qeddee shaddee biiyoone. Qeeshoo ebi uro eeꞌo bi tunoon arichiibe. Uro eeꞌo bi tuno xalle aricheebeeto bi tunetoyich, ashoyee bariree bi beeyemmoyich tuniyoo qaawiyaache.

¹² “Ebi qeddee shaddee biiyo uroochi qeddooch shaceꞌi, qelloochee baatooch beddaahaa bechito tuneꞌi, qeeshoyich bi bekkegaata,

¹³ wochinnoon uroochi achoon manjii ciine. Ebi biiyo iberoon bi qeddo bulliich bechito bi tunegaata, uro ebi biiyoochee xalloo bi tunoon arichiibe. Bi ashittino bulli naccegaata, uro xalloone.

¹⁴ Tunebaani mayeꞌi ceelle meeno bekkegaata, eeꞌo tunemmone.

¹⁵ Qeeshoo wochinnoon manjii ciinniꞌi, mayeꞌi ceelle meeno bekketon bi danegaata, uro eeꞌo bi tunoon arichiibe. Ceelle meeno bekketi mayo qeddee shaddee biiyo bi tunetoyich eeꞌoone.

¹⁶ Tunebaani mayo shokkeꞌi bi naccegaata, uro qeeshoo waan hambe.

¹⁷ Qeeshoo ciinaa, mayo nacceto bi tunegaata, uro xalloone. Biyoo uro xalloo bi tunoon arichiibe.

¹⁸ “Ikke ashi achooch gaaboo kechiꞌi bi wodigaata,

¹⁹ ebi gaaboo woditi xaaꞌooch nafii nacceti mooyo woyee ceello waan wotteti mooyo keyigaata, qeeshoo waan hamiree ebin bekkiibe.

²⁰ Qeeshoo manjiiꞌi bi ciinaa, gooqqoon besheꞌi maac giyito bi tunegaata, wotta aree toommooch beeti eexo nacceto bi tunegaata, uro eeꞌo tunoon arichiibe. Ebi gaaboona yesheꞌi waati qeddee shaddee biiyoone.

²¹ Tunebaani qeeshoo manjii ciinaa, aree toommooch beeti eexo nacco qayigaata, wotta gooqqoon besheꞌi maac giyaanoon wodii hammiibeeto bi tunegaata, uroon shabaatte qemi wottoon ashoyee bariree bi beeyemmoyich tuniibe.

²² Ebi biiyo bi qeddooch gaminnii bi hamigaata, qeeshoo uro eeꞌo bi tunoon arichiibe. Ebi besheebeeti qeddee shaddee biiyoone.

²³ Tunebaani uroochi qeddooch shaceyaanoon ikke xaaꞌooch bi beegaata, ebi gaaboo wodiichaa echeti banoone. Ebich qeeshoo uro xalloo bi tunoon arichiibe.

²⁴ “Ikke ashi qeddoon qaaqqoo michaa, ebi micciti xaaꞌooch beeti ceelle meeno naccoo waan bi wottegaata woyee bi naccegaata,

²⁵ qeeshoo manjii ciine. Ebi mayee toommooch beeti eexo naccegaata, mayo gooqqoon besheꞌi maac bi giyigaata, qaaqqee michoona yesheꞌi waati qeddee shaddee biiyoone. Qeeshoo uro eeꞌo bi tunoon arichiibe.

²⁶ Tunebaani qeeshoo mayon manjii ciinaa, aree toommooch beeti eexo nacco qayigaata, wotta gooqqoon besheꞌi maac giyaanoon wodii hammiibeeto bi tunegaata, uroo shabaatte qemi wottoon ashoyee bariree bi beeyemmoyich tuniibe.

²⁷ Qeeshoo shabaattinnee qemooba manjii ciine. Mayo gaminnii hammiibeeto bi tunegaata, uro eeꞌo bi tunoon arichiibe. Ebiyoo qeddee shaddee biiyoone.

²⁸ Tunebaani mayo gooqqee toommooch gaminnii hamaanoon ikke xaaꞌooch bi beegaata, shokkee hammiibeeto bi tunegaatoo, ebi qeddee shaddee biiyo toonoone; qeeshoo uro xalloo bi tunoon arichiibe. Ebi micciti qeddo wodiichaa echeti banoone.

²⁹ “Ikke asho, anaamo tuneba maachee, bi qellooch woyee bi gaxooch mayo keyigaata,

³⁰ qeeshoo manjiiree ciine. Ebi mayo gooqqoon besheꞌi maac giyito bi tunegaata, bi toommooch beeti eexo keellesh waan wottetonaa cicoona bi tunegaata, ebi quciibeeti qeddee shaddee biiyo bi tunetoyich, qeeshoo are asho eeꞌo bi tunoon arichiibe;

³¹ qeeshoo ebi quciibeeti biiyoon manjii bi ciinaa, mayo gooqqoon besheꞌi maac giyaano tuneechii aree toommooch aaꞌi eexo aallegaata, qeeshoo are quciibeeti biiyechi asho shabaatte qemi wottoon ashoyee bariree bi beeyemmoyich tuniibe.

³² Aroochee shabaattinnee qemooba mayon wochinnoon manjii ciine. Bi ciinaa, ebi quciibeeti xaaꞌoo gaminaano bi tunegaata, bi toommooch keellesh waan wotteti eexo aallegaata, wotta gooqqoon besheꞌi maac giyaano bi tunegaata,

³³ are asho mayeti xaaꞌoon baach echiichi bi qelloon cakkebe. Qeeshoo daakkiree bare shabaatte qemon are ashoon ashoyee bariree bi beeyemmoyich tuniibe.

³⁴ Shabaattinnee qemooba qeeshoo wochinnoon manjii ciine. Mayo gooqqee toommooch gaminnii hamaano, gooqqoonoo besheꞌi maac giyaano bi tunegaata, qeeshoo are asho xalloo bi tunoon arichiibe. Ebi asho bi tahoon maye. Aroochee xallemmone.

³⁵ Tunebaani ebi asho xalloo bi tuno arichetoyee gubb, mayo bi qeddooch gaminnii bi hamigaata,

³⁶ qeeshoo wochinnoon ciine. Bi ciinaa, mayo gaminnii hammiibeeto bi tunegaata, ebi asho eeꞌo bi tuno xalla aricheto bi tunetoyich, qeeshoo keellesh waan wotteti eexon qaawaaye.

³⁷ Tunebaani qeeshoo bi ciinaa, mayo gaminnii hamaano shaahiꞌi biich bi bekkegaata, aaꞌi eexoo arooch kechito bi tunegaatoo, mayo woditone getone. Ebich qeeshoo uro xalloo bi tunoon arichiibe.

³⁸ “Asho anaamo tuneba maachee, bi qeddooch nacce mooyo keyigaata,

³⁹ qeeshoo ebin manjii ciine. Ebi mooyo daash waan bi wottegaata, qeddooch kechiibeeti, kette mooyone. Ebich ebi asho xalloone.

^40-41 Ikke asho bi qello shimboochaa woyee baroochaa bi shodedegaata, ebi uro xalloone.

⁴² Tunebaani ebi qello shodedeti xaaꞌooch naccoo waan wotteti mayo keyigaata, ebi qellooch kechiibeeti qeddee shaddee biiyoone.

⁴³ Qeeshoo ebin manjii bi ciinaa, mayo qeddee shaddee biiyoochoommon naccoo waan wotteto bi tunegaata,

⁴⁴ uro biiyechone; ebich eeꞌoone. Ebi bi qellooch beeti mayochee tiyitona, qeeshoo uro eeꞌo bi tunoon arichiibe.

⁴⁵ “Qeddee shaddee biiyechi asho keexe qoreddoon tahebe. Bi qelloonoo kaaccaaye. Bi noonoon opperee, ‘Eeꞌo taane; eeꞌo taane’ getibee cookibe.

⁴⁶ Biiyo bi achooch beemmi yemeeno bullin ebi asho eeꞌoone. Kaamboyee maach keyiree, ashoyee bariree kotebe.

Eeꞌeti Taheechon Icheti Sheeroo

⁴⁷ “Bagee eexoochee woyee muttee tuppoochee shippeti taho bi burbuꞌigaata,

⁴⁸ mahenoona woyee kishoona shippeti, bagee eexoochee woyee muttee tuppoochee shippeti taho woyee gooqqo woyee gooqqoochee shuuneeti qiico amolla bi tunegaata,

⁴⁹ ebi mahenoona shippeti woyee kishoona shippeti qoreddee toommooch woyee gooqqooch woyee gooqqoochee shuuneeti amee qiicee toommoochona, mocere woyee ceelle malletoo bi bekkegaata, ebi burbuꞌo bi tunetoyich, asheenaꞌo qeeshoyich bekkiibeete.

⁵⁰ Biyoo ebi burbuꞌoon manjii ciiniree, are qiicoon shabaatte qemi wottoon kexooch hici kotiibe.

⁵¹ Aroochee shabaattinnee qemooba wochinnoon bi ciinaa, burbuꞌo ebi qiicee toommooch gaminnii bi hamigaata, qiico eeꞌoone.

⁵² Qeeshoo ebi qiicoon michibe. Gaminniibeeti burbuꞌo bi tunetoyich, qaaqqooch michaa aallebe.

⁵³ “Qeeshoo manjii bi ciinaa, burbuꞌo mahenoona woyee kishoona shippeti qoreddee toommooch woyee gooqqoochee shuuneeti qiicee toommooch gaminnii hamaano bi tunegaata,

⁵⁴ ebi qiico macheyemmoyich tuniiree shabaatte qemi wottoon hici kotiibe.

⁵⁵ Bi machetoyee gubb, ebi qiicoon wochinnoon manjii ciine. Burbuꞌo gamino bi qajjitaanona, bi shaahoon shaddaano bi tunegaata, eeꞌoone. Ebi qiico burbuqqito maacaa tuneba maachaa, qiico qaaqqoona miccemmoyich tuniibe.

⁵⁶ Qeeshoo ciinaa, ebi qiico macheetoyee gubb, burbuꞌo aallee hamigaata, ebi burbuqqiti xaaꞌoon mahenoona woyee kishoona shippeti tahoochee woyee gooqqoochee keexi kichibe.

⁵⁷ Tunebaani burbuꞌo mahenoona woyee kishoona shippeti qoreddee toommooch woyee gooqqoochee shuuneeti amee qiicee toommoochona wochinnoon bi keyigaata, ebi gaminniibeeti burbuꞌo bi tunetoyich, qaaqqoona mice.

⁵⁸ Tunebaani uro mayaa, burbuꞌo ebi qiicee toommoochee bi aallegaata, wochinnoon maye. Ebi qoreddoo woyee qiico xalloo tunemmone” iye.

⁵⁹ Bagee eexoochee woyee muttee tuppoochee shippeti qoreddoo woyee mahenoona woyee kishoona shippeti qoreddoo woyee gooqqoochee shuuneeti qiico amolla burbuqqiꞌi bi eeꞌegaata, “Xalloo woyee eeꞌoone” getoyich tunemmi sheeroo ebine.