Leweenaꞌo 12 - Kafa Linguistics Project

Bushoon Shiyeti Ure Xallo

¹ Doono Yeeri Muusich ishichiye:

² “Israꞌeeleenaꞌoyich ishichi gete: ‘Ikke ure xifaꞌa anaami bushoon bi shiyigaata, bi qechooba bi eeꞌoommon, shabaatte qemi wottoon eeꞌemmine.

³ Shimittinnee qemooba bushoo dokireebe.

⁴ Ure bi damoochee xallemmi wottoon, shaashaa keejje qemon quyebuye. Bi xallemmi aabo ciiremmi wottoon, yaafeeti amee mooyochi achoochona shaggaayuye; yaafee duukkaanooch giyaayuye.

⁵ Tunebaani bi shiyeto maache busheen bi tunegaata, bi qechooba bi eeꞌoommon, gutte shabaattee wottoon eeꞌemmine. Damoochee bi xallemmi wottoon shichaa shiritte qemon quyebuye.

⁶ “ ‘Ure anaami bushoon woyee maache busheen shiyaꞌa bi xallemmi aabo ciirehooba, micciibeeti deejjoyich ikke nati bagee baaddoon, wotta axaaxee deejjoyich daabbichoon woyee uggee cobbelloon danee duukkaanee kellooch daamiree, qeeshoyich giddiibuye.

⁷ Qeeshoo eboshin Doono Yeeri taach deejjiree ebi eeꞌoochee bi xallemmoyich tuniyemmone. Ebina damee ufee eeꞌoochee xallemmine. Anaamon tuneba maacheen, bushoon shiyeti ureyich tunemmi sheeroo ebine.

⁸ “ ‘Bagee baaddoon deeboyich bi hakkoo guutigaata, gutte daabbichoon woyee gutte uggee cobbelloon, ikkoon micciibeeti deejjoyich, wotta ohe ikkoon axaaxee deejjoyich giddiibuye. Qeeshoo eeꞌoochee bi xallemmoyich bi tuniitaa, xallemmine’ gete” iye.