Leweenaꞌo 11 - Kafa Linguistics Project

Manjeebeeti Gijjeenaꞌonaa Cooxinaꞌona

¹ Doono Yeeri Muusinaa Harooninoyich ishichiye:

² “Israꞌeeleenaꞌoyich ishichi getote: ‘Showee toommooch beeti kashechi mooyinaꞌoochee ittoshi maayemmo eboshiniye:

³ Bi shanekkoo kappheetonaa manjaanaabetona tuneti gijjoon woyee cooxon mamon hakkiyote.

⁴ Tunebaani manjaanaabee boonoshi shanekkoo kappheyaaneenaꞌon, wotta boonoshi shanekkoo kappheechaa manjaaneyaaneenaꞌon maayaahote. Gaalee manjaanaa beetine; tunebaani bi shanekkoo kappheyaano bi tunetoyich, ittoshi waanaa eeꞌeene.

⁵ Ukkeche manjaanaa beetine; tunebaani bi shanekkoo kappheyaano bi tunetoyich, ittoshi waanaa eeꞌeene.

⁶ Goroollishe manjaanaa beetine; tunebaani bi shanekkoo kappheyaano bi tunetoyich, ittoshi waanaa eeꞌeene.

⁷ Gudino bi shanekkoo kappheetone; tunebaani manjaaneyaano bi tunetoyich, ittoshi waanaa eeꞌoone.

⁸ Ebi gijjeenaꞌonaa cooxinaꞌonochi meenon ciroona maayaahote. Boonoshi meeshooch ittoshi kishoon bechiyaahote. Eboshi ittoshi waanaa eeꞌeenaꞌone.

⁹ “ ‘Baharoonaa woce aaconochi daggooch beeti halleenaꞌoochee qoshoommi mooyonaa shoxxoona biich beeton mamon hakkiyote.

¹⁰ Tunebaani baharoonaa woce aaconochi daggooch beeti halleenaꞌoochee qoshoommi mooyo aalleenaꞌonaa shoxxaalleenaꞌona ittoshi waanaa eeꞌeenaꞌo tunebeete.

¹¹ Ittoshi waanaa eeꞌeenaꞌo boonoshi tunetoyich, boonoshi meenon maayaahote. Boonoshi meeshoochoo ittoshi kishoon bechiyaahote.

¹² Qoshoommi mooyonaa shoxxoona biich aalli, aachi daggooch beeti mooyo amolla ittoshich eeꞌo tunebe.

¹³ “ ‘Kafeenaꞌo daggoochee eeꞌeenaꞌo eboshine; eboshin maayaahote. Eboshiyoo, booyo, aakko, aremoo,

¹⁴ gooppi gace, ookshooppheroonaa boonoshin shaaheenaꞌo bullina,

¹⁵ kurecheenaa biin shaaheenaꞌo bullina,

¹⁶ shaakko, qamini waajjechi yuye, baharee baakkoo, shelli gaceenaa biin shaaheenaꞌo bullina,

¹⁷ gishiishi yuye, xooro, ooge waajjechi yuyeenaa

¹⁸ nacce yuyeena, barahee yuyeenaa haashoon yechii maabeeti aaꞌi gacoona,

¹⁹ maannaakko, maaꞌimaaꞌoonaa biin shaaheenaꞌo bullina, yaacheenaa (keceenaa) shakishakoonane. Eboshin maayaahote.

²⁰ “ ‘Qoshechi, guttoyee beshe baatechi kashingixeenaꞌo bulli eeꞌeenaꞌone.

²¹ Tunebaani qoshechi, guttoyee beshe baatechi kashingixeenaꞌo daggoochee caphoch tunemmi baatoo boonoshich beetinaꞌon mamon hakkiyote.

²² Eboshi daggoochee ittoshi maayemminaꞌo ooge gechoon, ooge qellechi gechoon, mocere gechoonaa barahee gechoononiye.

²³ Tunebaani qoshechi, guttoyee beshe baatechi bare cooxinaꞌo ittoshi waanaa eeꞌeenaꞌone.

²⁴ “ ‘Ebi gijjeenaꞌonaa cooxinaꞌonochi meeshoon ittoshi yeshigaata, eeꞌemmo ittoshine. Eboshichi meeshoon yechimmi asho xumemmi wottoon eeꞌemmone.

²⁵ Eboshichi meeshoochee tiijjimmi asho bi tahoon maye; biyoo xumemmi wottoon eeꞌo tunemmone.

²⁶ Shanekkecho, tunebaani bi shanekkoo kappheyaanoonaa manjaaneyaanoona tuneti gijjoonaa cooxona eeꞌoone. Eboshichi meeshoon yechimmi asho eeꞌo tunemmone.

²⁷ Awudde baatechinaꞌo daggoochee baatee madoona showoon neexxii beetinaꞌo eeꞌeenaꞌone; eboshichi meeshoon yechimmo koniyoona xumemmi wottoon eeꞌo tunemmone.

²⁸ Eboshichi meeshoon tiijjimmi asho bi tahoon maye; biyoo xumemmi wottoon, eeꞌo tunemmone. Eboshi ittoshi waanaa eeꞌeenaꞌone.

^29-30 “ ‘Showoona yuummiibeeti halleenaꞌo daggoochee eboshi eeꞌeenaꞌone. Eboshiyoo, eccee, iiccoo, sholloonaa biin shaaheenaꞌo bullina, aayo, arjaanoonaa engeengilleenane.

³¹ Showoona yuummii beetinaꞌo daggoochee eboshi ittoshich eeꞌeenaꞌone. Eboshichi meeshoon yechimmo xumemmi wottoon eeꞌo tunemmone.

³² Eboshichi meeshoo amee qiicee toommoochona bi holligaata, ebi are qiico mixoochee woyee qoreddoochee woyee gooqqoochee woyee keeshoochee shuuneeti qiico amolla bi tunegaata, eeꞌoone. Ebi qiico aachi daggooch geddebe; xumemmi wottoonoo eeꞌo tunemmone; aroochee xallemmone.

³³ Eboshichi meeshoo nuuqqee qiicooch bi holligaata, bi daggooch beeto bulli eeꞌemmone. Ebi are qiicoon tiishote.

³⁴ Ebiyoommi qiicee daggoochee aaco manjeebeeti maayi toommooch bi ufegaata, are maayo eeꞌoone. Ebi qiicoochee ucheebeeti mooyo bulli eeꞌoone.

³⁵ Eboshichi meeshoo holliti qiico bulli eeꞌoone; maayo gudeebeeti qiico tuneba nuuqqoochee shuuneeti gemmoo tiichebe. Eboshi eeꞌeenaꞌone; ittoshich eeꞌeenaꞌone.

³⁶ Tunebaani aachi xuupho woyee aachi oppo xalloone; tunetaa ebi mooyochi achooch shaggimmo koniyoona woyee amee mooyolla eeꞌemmone.

³⁷ Shookkemmi maayi yaree toommooch bi holligaata, ebi maayi yaroo eeꞌeyaachemmone.

³⁸ Tunebaani maayi yaree toommooch aaco ukkeechaa meeshoo bi toommooch holligaata, ebi maayi yaroo ittoshich eeꞌoone.

³⁹ “ ‘Ittoshi maayemmoyich daaggeeti gijjoonaa cooxona bi qitigaata, bi meeshoon yechimmo xumemmi wottoon eeꞌo tunemmone.

⁴⁰ Ebi meeshoon maammo bi qoreddoon maye; biyoo xumemmi wottoon eeꞌo tunemmone. Meeshoon tiijjimmo bi qoreddoon maye; xumemmi wottoonoo eeꞌo tunemmone.

⁴¹ “ ‘Showoona yuummiibeeti mooyo amolla ittoshich eeꞌoone; manjeyaachemmone.

⁴² Showoona yuummiibeeti mooyo bullin, ebiyoo yuummereenaꞌo woyee awudde baatoona shaꞌee beeton woyee meeti baatechon maayaahote. Eboshi eeꞌeenaꞌone.

⁴³ Showoona yuummii beetinaꞌon mamona eeꞌeyaahote. Ittoshin eeꞌiyemminaꞌo boonoshi tunetoyich, boonoshina eeꞌeyaahote.

⁴⁴ Ittoshi Nuggishoo Doono Yeeri ta yaafoo ta tunetoyich, ittoshi qelloon yaafibote. Yaafoonoo tunebote. Showoona yuummiibeeti mooyo amoonolla mamona ittoshi qelloon eeꞌiyaahote.

⁴⁵ Ittoshi Nuggishoo tunoyich, Gibitsee ittoshin kichaꞌa deebeti Doono Yeeri taane. Ebich yaafoo ta tunetoyich, ittoshiyoo yaafoo tunebote.

⁴⁶ “ ‘Gijjoonaa cooxonon, kafoon, aachi daggooch beeti halloonaa showoona yuummiibeeti halloona bulloshin ciinnii beetona icheti sheeroo ebine.

⁴⁷ Ebi sheeroo xalloonaa xalloo tuneyaanoonon, kashechi halloochee manjeyemmonaa manjeyaachemmonon ittoshi barbariyemmoyich ittoshin gaachemmone’ getote” iye.