Leweenaꞌo 10 - Kafa Linguistics Project

Nadaabinaa Abiihina Qitoo

¹ Ikke areddoon, Harooni bushiishoo Nadaabinaa Abiihina boonoshi ikkikkoona ixaano shookkeebeeti qiicoon deebiꞌi, qaaqqoon arooch geddiyeete. Ixaanoonoo arooch shookkiyeete. Doono Yeeri boonoshich getaani, daaggeyaani qaaqqoon bi aafooch giddiiheete.

² Bekkech qaaqqoo Doono Yeer waanee kindiꞌi boonoshin michii wuxiye. Boonoshiyoo Doono Yeeri aafoochaa qitiyeete.

³ Muusiyoo Haroonich ishichiye: “Doono Yeeri gettito ebine: ‘Ta waan giddee beetinaꞌo daggoochaa ta yaafittinoon bekkiyemmo taane; asheenaꞌo bulli aafoochaa oogemmo taane’ bi ito ebine” iye. Harooniyoo cikkii qajjiye.

⁴ Muusiyoo Harooni niheeshoo Uzeeli bushiisheenaꞌo Mishaꞌeelinaa Elisafaaninon ceeggiꞌi, “Hach gidderee, ittoshi maneenaꞌochi dubenoon yaafee duukkaanee aafoochee tiijji, kaamboyee maach daambote” iye.

⁵ Boonoshiyoo waa boonoshi tahoona yechii tiijjiꞌi, Muusi boonoshich gettitoommon, kaamboyee maach kichiyeete.

⁶ Muusiyoo Haroonich, bi bushiisheenaꞌo Elazaarinaa Itamaarinoyich ishichiye: “Ittoshi qitaachemmoyich, asheenaꞌo toommoochoo kaaree shiixxoo kindaachemmoyich, ittoshi qelloon shiimoon qajjaahote. Ittoshi tahoonoo keexxaahote. Tunebaani ebi Doono Yeeri deejjiti qaaqqoona qititinaꞌoyich, ittoshi maneenaꞌo tuneti Israꞌeeleenaꞌo bulli eefeete.

⁷ Doono Yeerichi huutee zayito ittoshi achooch bi beetoyich, ittoshi qitaachemmoyich, danee duukkaanoochee maach kechaahote” iye. Boonoshiyoo Muusi gettitoommon tuniiheete.

Qeesheenaꞌoyich Icheti Sheeroo

⁸ Doono Yeeri Haroonich ishichiye:

⁹ “Ittoshi qitaachemmoyich, neennaa ne anaami bushiishoona danee duukkaanooch ittoshi giyii beegaata, woyinee uyoon woyee mashiibeeti uyoon uchaahote. Ebiyoo gubbi ittoshi shiijjeroo bulliich beddaahaa, bulli yemeenee qociyoo tunebe.

¹⁰ Ebin tuniiree yaafoonaa yaafeyaanoonochi daggooch, wotta eeꞌoonaa xalloonochi daggooch barbaremmo ittoshine.

¹¹ Muusich ta getaa, bi gettiti qociyoo bullin Israꞌeeleenaꞌoyich dojjibote” iye.

¹² Muusiyoo Harooninaa echeti bi gutte bushiisheenaꞌo Elazaarinaa Itamaarinoyich ishichiye: “Oogeti yaafoo bi tunetoyich, qaaqqooch michaa Doono Yeerich deejjeeti maayi buuroochee echeton daamiree, shittoo giyaani koshon kachiiree deejjee gudee gaꞌoochaa mamote.

¹³ Yaafoo tuneti xaaꞌoochaa mamote. Ebiyoo Doono Yeerich qaaqqooch michaa deejjeebeeti maayi buuroochee ne qoodoonaa ne bushiisheenaꞌochi qoodoonane. Doono Yeeri taach bi gettito ebine.

¹⁴ Israꞌeeleenaꞌochi ikkittinee deejjoochee neennaa ne bushiisheenaꞌonochi qoodoo tuniitaa bi ichetoyich, kaama tiijjeeti gaggimatoonaa deejjoyich giddeti baatee galloonon ne, ne anaami bushiishoonaa maache bushiishoona xalloo tuneti xaaꞌoo aabiichaanona, maayemmo ittoshine.

¹⁵ Ebi giddeti galloonaa kaama tiijjeeti gaggimatoonon Doono Yeeri aafooch kaama tiijjaa giddeebeeti deejjoon tuniiree boonoshi tiijjemmoyich, qaaqqooch michaa deejjeebeeti awuyona tookki deebeete. Ebiyoo Doono Yeeri gettitoommon, bulli yemeenoon neennaa ne shiijjereenaꞌonoyich qoodoo tunemmone” iye.

¹⁶ Aroochee Muusi axaaxee deejjoyich giddeti emmishee mooyon kupphiiꞌi echehe. Tunebaani gokketo bi tunoon ariiꞌi echeti Harooni bushiisheenaꞌo Elazaarinaa Itamaarinon kaarehe. Ishichiinoo iye:

¹⁷ “Ebi axaaxee deejjoon yaafoo tuneti xaaꞌoochaa amoyich maataachote? Ebi deejjoo oogeti yaafoone. Asheenaꞌochi axaaxoon shaagiree Doono Yeeri aafoochaa boonoshich maaroon ittoshi daniyemmoyich ittoshich ichetone.

¹⁸ Bi damoo yaafee duukkaanee maac giyaano bi tunetoyich, ittoshich ta gettetoommon emmishoochi meenon yaafoo tuneti xaaꞌoochaa maayi bedo ittoshine” iye.

¹⁹ Harooniyoo Muusich ishichiye: “Ebi axaaxee deejjoon hanaach ta maato gaata, Doono Yeeri aafoochaa tato tuneshe? Asheenaꞌo hanaach axaaxee deejjoonaa micciibeeti deejjoonon Doono Yeeri aafooch deebitinaꞌone. Tunebaani ebiyoommi magge mooyo ta toommooch shaggitone” iye.

²⁰ Muusiyoo Harooni yibbaatoona michiye.