Leweenaꞌo 1 - Kafa Linguistics Project

Micciibeeti Deejjoon Giddiyoo

¹ Doono Yeeri danee duukkaanee daggoochaa Muusin ceeggiꞌi ishichiye:

² “Israꞌeeleenaꞌoyich ishichi gete: ‘Ittoshi daggoochee koniyoona bi gijjoochee deejjoon Doono Yeeri taach bi giddiigaata, bi miimoochee woyee bi bagoonaa emmishoonoochee giddiibe.

³ “ ‘Deejjoon bi giddiibeeto, micciibeeti deejjoyich bi miimoochee tunegaata, bachaalli wuron giddiibe. Doono Yeeri ta deqqemmoyich, danee duukkaanee kelloochaa giddiibe.

⁴ Uro micciibeeti deejjoyich giddeti gijjoochi qellooch bi kishoon kotiibe. Ebina Doono Yeeri ta bi deejjoon deꞌiree bi axaaxoon maaremmo taane.

⁵ Ebi wuron Doono Yeeri ta aafoochaa guuribe. Qeesheenaꞌo tuneti Harooni anaami bushiisheenaꞌo damoon giddiibeete; danee duukkaanee kellooch beeti deejjee gudee awudde naabooch tibibeete.

⁶ Biyoo ebi wurochi gooqqoon gaxxiree quum quumoona bashi kichibe.

⁷ Qeeshoo Harooni anaami bushiisheenaꞌo deejjee gudooch qaaqqoon shooheete; ebi qaaqqee toommooch mixon qeeneete.

⁸ Aroochee qelloonaa awuyonon bare meeno bullina tookki qaaqqee toommooch beeti michi toommooch qeeneete.

⁹ Uroo maacee meenonaa baatoonon maye. Qeeshoo ebi micciibeeti deejjoon, qaaqqoona micciibeeti deejjoon tuniiree deejjee gudoochaa bullin ikkot deejjibe. Ebiyoo Doono Yeeri taach gaawe cinnechi deejjoo tunemmone.

¹⁰ “ ‘Uro micciibeeti deejjoyich bi giddiibeeto, bagoon woyee emmishoon bi tunegaata, bachaalli baaddoo tunebe.

¹¹ Deejjee gudo beetoochaa dambi-waanaa, Doono Yeeri ta aafoochaa guuribe. Qeesheenaꞌo tuneti Harooni anaami bushiisheenaꞌo, damoon deejjee gudee awudde naabooch tibibeete.

¹² Uroo quumoon, qelloonaa awuyonon maaci kichibe. Qeeshoo ebi bullin qaaqqee toommooch beeti michi toommooch qeene.

¹³ Uro maacee meenonaa baatoonon maye. Qeeshoo deejjee gudoochaa bullin ikkot deejjibe. Ebiyoo qaaqqooch michaa giddeebeeti, Doono Yeeri taach gaawe cinnoon cinneebeeti, micciibeeti deejjoon tunemmone.

¹⁴ “ ‘Uro micciibeeti deejjoyich, Doono Yeeri taach bi giddiibeeto, kafee yaroochee bi tunegaata, daabbichoon woyee uggoon giddiibe.

¹⁵ Qeeshoo bi qettimixon wuuqqi kuxe; bi qelloonoo deejjee gudee toommoochaa michibe. Bi damoo deejjee gudee gaꞌooch cote.

¹⁶ Maacee meenonaa wulloonon deejjee gudoochaa aabi-keyo waan beeti tullee baashooch dufe.

¹⁷ Qoshoona yeshiree gutta gaaha; tunebaani kapphe kichaaye. Biyoo deejjee gudee toommooch beeti qaaqqooch michibe. Ebiyoo qaaqqooch michaa giddeebeeti, Doono Yeeri taach gaawe cinnoon cinneebeeti, micciibeeti deejjoon tunemmone.