Keyo 9 - Kafa Linguistics Project

Gijjeenaꞌo Toommooch Naxo Kindoo

¹ Aroochee Doono Yeeri Muusich ishichiye: “Faroon waan hamiree biich ishichibe: ‘Hibireenaꞌo Nuggishoo Doono Yeeri ishichiye: “Taach boonoshi goyinne maddemmoyich, ta asheenaꞌon gawukkibe.

² Tunebaani boonoshin gawukkoo ne qayigaata, boonoshinoo ne yeshigaatoo,

³ Doono Yeeri ta mochoo gaddooch beeti ne gijjoo bullin, eboshiyoo ne haresheenaꞌonaa kureenaꞌonon, ne gaaleenaꞌonaa miiminaꞌonon, ne bageenaꞌonaa emmisheenaꞌonon, giidechi naxoona yexxemmone.

⁴ Tunebaani Doono Yeeri ta, Israꞌeeleenaꞌochi gijjeenaꞌonaa Gibitseenaꞌochi gijjeenaꞌonon bariyemmo taane. Ebich Israꞌeeleenaꞌocho tuneti amee gijjona qitaachemmone” itone’ gete” iye.

⁵ Doono Yeeriyoo aaboon taajjeꞌi, “Yaach Doono Yeeri ta, hini showooch ebin tuniyemmo taane” iye.

⁶ Bi dechara Doono Yeeri bi gettiton ceechiye. Gibitseenaꞌochi gijjoo bulli qitii ciirehe; tunebaani Israꞌeeleenaꞌochi gijjoochee ikkolla qitaanoone.

⁷ Farooni asheenaꞌon wocheꞌi, Israꞌeeleenaꞌochi gijjeenaꞌoochee ikkolla qitaano bi tunoon xiishiye. Ebi tunetaanoona, bi mullo muumetoyich, asheenaꞌon gawukkaanoone.

Gaabee Naxo Kindoo

⁸ Aroochee Doono Yeeri Muusinaa Harooninoyich ishichiye: “Qellikke tulloon qaaqqee gudoochee ushi daambote. Muusi Farooni aafoochaa damba shimaajj shahe.

⁹ Gibitsee showoo bulliich quttoo tunemmone; are showoo bulliich beeti asheenaꞌonaa gijjeenaꞌonochi toommooch mayiibeeti gaaboo kechemmone” iye.

¹⁰ Ebich boonoshiyoo qaaqqee gudoochee tulloon uchii daammiꞌi, Farooni aafooch neexeheete. Muusiyoo ebi are tulloon shimaajj shakkiye. Asheenaꞌonaa gijjeenaꞌonochi toommooch mayiibeeti gaaboo kechiye.

¹¹ Gibitsee kaayechinaꞌo Muusi aafooch neexoon hakkaaneenaꞌone; ebiyoo boonoshinaa Gibitsee asho bullinochi toommooch gaaboo kechitoyichiye.

¹² Tunebaani Doono Yeeri Farooni mulloon bi muumiitoyich, Doono Yeeri Muusich bi gettitoommon, Muusinaa Haroonina gettiton waayeyaanoone.

Baderee Naxo Kindoo

¹³ Aroochee Doono Yeeri Muusich ishichiye: “Haree maaddoona tiyiree, Faroon waan hambe. Biichoo ishichibe: ‘Hibireenaꞌo Nuggishoo Doono Yeeri ishichiye: Taach boonoshi goyinne maddemmoyich ta asheenaꞌon gawukkibe.

¹⁴ Ebi tuno qayigaata, neennaa ne iraasheenaꞌonochi toommooch, wotta ne asheenaꞌo toommoochoo ta naxo bullin daakkiree kindiyemmo taane; ebiyoo showee toommo bulliich taanoommo koniyoona aallo bi tunoon ne ariyemmoyichiye.

¹⁵ Ta mochoon neennaa ne asheenaꞌonochi toommooch tiijjiree, giidechi naxoona showee toommoochee ittoshin aalliyesho taane;

¹⁶ tunebaani kashoona ne beeyemmoyich ta tuniito, ta giidoon neech ta bekkiyemmonaa ta shigo showee toommo bulliich bi arichemmonoyichiye.

¹⁷ And beddaahaa ne qelloon yeepphaꞌa, ta asheenaꞌon gawukkoon qajjeto neene.

¹⁸ Ebich yaach ebi goora, ebiyee aaf Gibits tunee ariyaani, giidechi magge baderoon kindiyemmo taane.

¹⁹ Ne gijjeenaꞌonaa maaxooch beeti mooyo bullina kexooch boonoshi giyemmoyich gete. Ebi tuno qayigaata, maaxooch beeti ashoonaa gijjoona bulli toommooch baderoo kindaa, qiti ciiremmone’ gete” iye.

²⁰ Faroonichi iraasheenaꞌoochee Doono Yeeri gettiton shattitinaꞌo boonoshi guuninaꞌonaa gijjeenaꞌona kexooch giyemmoyich tuniiheete.

²¹ Tunebaani Doono Yeeri gettiton qallayii qajjitinaꞌo boonoshi guuninaꞌonaa boonoshi gijjeenaꞌonon kexooch giijjaanoon arooch qajjiyeete.

²² Aroochee Doono Yeeri Muusich ishichiye: “Gibitsee showoo bulliich beeti asheenaꞌo, gijjeenaꞌonaa showee toommooch colleti mooyo bullinochi toommooch baderoo kindemmoyich, ne kishoon damba shimaayoo waan tiijjibe” iye.

²³ Muusi bi gumboon damba tiijjiye. Doono Yeeriyoo shimaayoo gigemmoyich tuniihe; baderoonoo kindiihe. Qaaqqoommi xeeyo showee toommooch kindiye. Doono Yeeriyoo Gibitsee showoo bulliich baderoon kindiihe.

²⁴ Baderoo kindiye; xeeyo phaqqii beehe. Gibitsi showoo getaa bi ceekketi yemeenoochee tiijjiꞌi, ebiyoommi magge baderoo showoo bulliich tunee ariyaanoone.

²⁵ Baderoo Gibitsee showoo bulliich, maaxooch beeto bullin, asheenaꞌonaa gijjeenaꞌonon yexxiye; budooch colleti maayo bullin aalliihe; mixo bullin tiichii aalliihe.

²⁶ Israꞌeeleenaꞌo beeti Gooshenee showooch baach baderoo kindaanoone.

²⁷ Aroochee Farooni Muusinaa Harooninon ceekkiiꞌi, boonoshich ishichiye: “And gondeto taane. Doono Yeeri tatoone; tunebaani taannaa ta asheenaꞌona gondeto noone.

²⁸ Xeeyoonaa baderoona no toommooch woddetone; ebich Doono Yeerin qollebote. Ittoshi hammemmoyich gawukkemmo taane; ebiyee bekk hiniich ittoshin yagiyemmi mooyo aalloone” iye.

²⁹ Muusiyoo wochiꞌi ishichiye: “Katemoochee keyiichi, bekkech ta kishoon yaggiree Doono Yeerin qollemmo taane. Showoo Doono Yeericho bi tunoon ne ariyemmoyich, xeeyo qajjemmone; baderoo kindaachemmone.

³⁰ Tunetaa neennaa ne iraasheenaꞌona andoo Nuggishoo Doono Yeerin shataano ittoshi tunoon ariibeeto taane” iye.

³¹ Mutto bungito, sheqoo moocheto bi tunetoyich, duubetone.

³² Tunetaa teepphoonaa gomberoona batt aafeyaano bi tunetoyich, duubeyaanoone.

³³ Muusiyoo Faroon waanee barii katemoyee maach kechiichii, bi kishoon kaama yaggiꞌi, Doono Yeerin qollehe. Baderoonaa xeeyoona neexehe; amiyoo dihoon qajjiye.

³⁴ Tunebaani Farooni amiyo, baderoonaa xeeyoona neexoon beeggiichii, wochinnoon Yeerin xuqqiye; biinnaa bi iraasheenaꞌona boonoshi mulloon muumiiheete.

³⁵ Ebina Farooni mullo muumehe. Doono Yeeri Muusina bi gettitoommon, Israꞌeeleenaꞌon gawukkaanoone.