Keyo 8 - Kafa Linguistics Project

Woqqeqqee Naxo Kindoo

¹ Aroochee Doono Yeeri Muusich ishichiye: “Faroon waan hamiree biich ishichibe: ‘Doono Yeeri ishichiye: “Taach boonoshi goyinne maddemmoyich, ta asheenaꞌon gawukkibe.

² Tunebaani gawukkoo ne qayigaata, ne showoo bullin woqqeqqeenaꞌona yexxemmo taane.

³ Abbaayi aacooch woqqeqqeenaꞌo ceennemminaꞌone; woqqeqqeenaꞌo aroochee keyiree, ne taatee kexooch, ne qeyaabeeti gatooch, ne qeyaabeeti qeenooch, ne iraasheenaꞌo kexonaa ne asheenaꞌo kexonooch, neech maayo kachiibeeti gemmoonaa bukee qiiceenaꞌonooch ceennemminaꞌone.

⁴ Woqqeqqeenaꞌo ne toommooch, ne asho bullinaa ne iraashoo bullinochi toommooch kechemminaꞌone” itone’ gete” iye.

⁵ Aroochee Doono Yeeri Muusich ishichiye: “Haroonin ‘Ne gumboon yeshiree woce aacinaꞌo toommooch, bobbeeti aacinaꞌonaa kote aacinaꞌonochi toommooch ne kishoon yaggibe. Woqqeqqeenaꞌo Gibitsee showooch boonoshi kechemmoyich tuniibe’ gete” iye.

⁶ Ebina Harooni Gibitsee showeexi aacinaꞌo toommooch bi kishoon yaggiye; woqqeqqeenaꞌo kechiꞌi showoon guuppiyeete.

⁷ Tunebaani kaayechinaꞌo wotta boonoshi kaayoona Gibitsee showee toommooch woqqeqqeenaꞌo kechemmoyich tuniiheete.

⁸ Farooniyoo Muusinaa Harooninon ceeggiꞌi boonoshich ishichiye: “Taannaa ta asheenaꞌona waanee woqqeqqeenaꞌon bi wokkiyemmoyich, Doono Yeerin qollebote. Doono Yeerich deejjoon boonoshi deejjemmoyich ittoshi asheenaꞌon ta gawukkaa hammemminaꞌone” iye.

⁹ Muusiyoo Faroonich ishichiye: “Woqqeqqeenaꞌo Abbaayi aacooch baach echeechi, ne waanee, ne kexinaꞌoochee, ne iraasheenaꞌonaa ne asheenaꞌonona waanee boonoshi aallemmoyich Doono Yeerin ta qollemmi aaboon ne taajjebe” iye.

¹⁰ Farooniyoo “Yaach tunebe” iye. Muusiyoo ishichiꞌi wochiye: “No Nuggishoo Doono Yeeriyoommi bare nuggishoo koniyoona aallo bi tunoon ne ariyemmoyich, ne gettetoommon tunebe.

¹¹ Woqqeqqeenaꞌo ne waanee, ne kexinaꞌoochee, ne iraasheenaꞌonaa ne asheenaꞌona waanee wokkemminaꞌone; Abbaay baach tunemminaꞌone” iye.

¹² Muusinaa Haroonina Faroon waanee boonoshi wottetoyee gubb, Farooni toommooch bi deejjiti woqqeqqeenaꞌon bi aalliyemmoyich, Muusi Doono Yeerin qollehe.

¹³ Doono Yeeriyoo Muusi qolletoommon tuniihe. Kechi daggooch, uxeree daggoonaa budonooch beeti woqqeqqeenaꞌo qitiyeete.

¹⁴ Asheenaꞌoo macii kiciꞌi ikkooch gutiyeete. Showoo bulli shaaqqiye.

¹⁵ Tunebaani Farooni iritoo ketteto tunoon beeggiichii, Doono Yeeri gettitoommon, bi mulloon muumiihalli, Muusinaa Haroonina gettiton waayeyaanoone.

Shaaccaabeeti Shunnee Naxo Kindoo

¹⁶ Aroochee Doono Yeeri Muusich, “Haroonin ‘Ne gumboon tiijjiree showee buttoon yexe’ gete. Ebina Gibitsee showeexi quttoo bulli shaaccaabeeti shunneen tunemmone” iye.

¹⁷ Boonoshiyoo ebiyoommon tuniiheete. Harooni bi yechiibeeti gumboon tiijjiꞌi, showee buttoon bi yexximmona, Gibitsee showeexi quttoo bulli shaaccaabeeti shunneen tunehe. Asheenaꞌonaa gijjeenaꞌonon ebi shunnee tuqqahan.

¹⁸ Kaayechinaꞌoo boonoshi kaayoona ebi shaaccaabeeti shunnee kechemmoyich tuniiya boonoshi qiiccetaanona, hakkaaneenaꞌone. Shunnee asheenaꞌonaa gijjeenaꞌonon tuqqahan.

¹⁹ Kaayechinaꞌoo Faroonich “Hini mooyo Nuggishoo shuunoone” iyeete. Farooni mullo andoo muumoone. Doono Yeeri gettitoommon, Muusinaa Haroonina gettiton waayeyaanoone.

Gamee Naxo Kindoo

²⁰ Aroochee Doono Yeeri Muusich ishichiye: “Yaach maaddoona Faroon waan hamiree, aacooch bi hami beetaa, biinna danebe. Biichoo ishichi gete: ‘Doono Yeeri ishichiye: “Taach boonoshi goyinne maddemmoyich, ta asheenaꞌon gawukkibe.

²¹ Ta asheenaꞌon gawukkoo ne qayigaata, ne waan, ne iraasheenaꞌonaa ne asheenaꞌona waan mattiqutte gamoon deejjemmo taane. Ne taatee kexo bullinaa Gibitsee asheenaꞌo kexo bullinon gamoo bayi deqqemmone; showoo bullinoo bullemmone.

²² Tunebaani arooba ta asheenaꞌo beeti Gooshenee showoon barito tuniyemmo taane. Doono Yeeri ta, hini are showooch beeto ta tunoon ne ariyemmoyich, gamoo arooch beetaachemmone.

²³ Ta asheenaꞌon ne asheenaꞌoyee bariyemmo taane. Ebi worganikkiti malletoo yaach tunemmone” itone’ gete” iye.

²⁴ Doono Yeeriyoo ebin tuniihe. Mattiqutte gamoo Faroonichi taatee kexooch, bi iraasheenaꞌo kexonaa Gibitsee showoo bullinooch giyiye. Gibitsee showoo bullinoo aalliihe.

²⁵ Aroochee Farooni Muusinaa Harooninon ceeggiꞌi, “Hamiree hini Gibitsee showoochaa ittoshi nuggishoyich deejjoon deejjibote” iye.

²⁶ Tunebaani Muusi ishichiye: “Ebi tato toonoone; no Nuggishoo Doono Yeerich no deejjaabeeti deejjoo Gibitseenaꞌo waanaa ciigee beetone. Ebi boonoshi ciigeebeeti deejjoon boonoshi aafoochaa no deejjigaata, noon xaqqoona yexxii wuxoon qajjeheete?

²⁷ Bi nooch gettii beetoommon, no Nuggishoo Doono Yeerich deejjoon deejjoyich, keejje qemi gommon barahooch hamo nooch qaawiihe” iye.

²⁸ Farooniyoo ishichiye: “Ittoshi Nuggishoo Doono Yeerich barahoochaa deejjoon ittoshi deejjemmoyich daaggemmo taane; tunebaani oogeton wohiree hammaahote. Taach Yeerin qollebote” iye.

²⁹ Muusiyoo ishichiye: “Ne waanee ta hammetoyee gubb, bekkech Doono Yeerin qollemmo taane; yaachoo gamoo bulli ne waanee, ne iraasheenaꞌonaa asheenaꞌona waaneenoo wokkemmone. Ebiyee aaf ne tuniitoommon, andoo asheenaꞌo hamiree Doono Yeerich deejjoon boonoshi deejjemmoyich daaggaanoon qayona ne dawushaachemmoyich neen ariibe” iye.

³⁰ Muusiyoo Faroon waanee kechii bi hammitoyee gubb, Doono Yeerin qollehe.

³¹ Doono Yeeriyoo Muusi qolloon waayehe; ikkoonolla echiyaanoon gamoon Faroon waanee, bi iraasheenaꞌonaa asheenaꞌona waaneenoo wokkiihe.

³² Ebiyoobolla Farooni bi mulloon muumiihalli, asheenaꞌon gawukkaanoone.