Keyo 6 - Kafa Linguistics Project

¹ Aroochee Doono Yeeri Muusich ishichiye: “And Farooni toommooch ta tuniyemmon beeggemmo neene. Giidechi ta mochoochee tiyitona, ta asheenaꞌon gawukkemmone. Iberoon giidechi ta mochoochee tiyitona, ‘Ta showoochee keyi hambote’ geti yoohi kichemmone” iye.

Yeeri Muusin Wochinnoon Wocho

² Yeeriyoo daakkiꞌi Muusich ishichiye: “Ta, Doono Yeeri taane.

³ Beshe Hakkechi Nuggishoo ta tunoon arichiyoona, Abrahamich, Yisaaqich, Yaaqobichoo bekketo taane. Tunebaani Doono Yeeri ii beeti ta shigoona boonoshich bekkeyaano taane.

⁴ Iibbittinoona boonoshi beebee echeti Kanaanee showoon boonoshich imoyich wogeto taane.

⁵ Wotta Gibitseenaꞌo boonoshin guuno tuniiꞌi hajjaa, gaashilliibee Israꞌeeleenaꞌo cookiti cookoon waayeto taane; ta wogeti wogoon shalligito taane.

⁶ “Ebich Israꞌeeleenaꞌoyich ishichi gete: Doono Yeeri ishichitone: ‘Ta, Doono Yeeri taane. Gibitseenaꞌochi guuchittinee waanjoochee ittoshin kichemmo taane; boonoshich guuno tunoochee ittoshin biishemmo taane. Qaaꞌi naxoon boonoshi toommooch deeboyich giidechi ta mochoon boonoshi toommooch tiijjemmo taane; ittoshinoo biishemmo taane.

⁷ Ittoshin ta maccoo tuniyemmo taane; ittoshichoo Nuggishoon tunemmo taane. Gibitseenaꞌochi guuchittinee waanjoochee ittoshin kichiti, ittoshi Nuggishoo Doono Yeeri ta tunoon ariyemmo ittoshine.

⁸ Abrahamich, Yisaaqinaa Yaaqobinoyich imma ta wogeti showooch ittoshin giijjemmo taane; ittoshi hajjoon tuniiree ittoshich immemmo taane. Ta, Doono Yeeri taane’ itone gete” iye.

⁹ Muusiyoo ishin Israꞌeeleenaꞌoyich gettiye. Tunebaani asheenaꞌo oogeton boonoshi mullee tiishoochee tiyitona, wotta boonoshi toommooch tuneti guuchittinee magge shuunoochee tiyitona, ebi bi gettiti mooyon waayemmon qajjiyeete.

¹⁰ Aroochee Doono Yeeri Muusin

¹¹ “Israꞌeeleenaꞌon bi gawukkaa, bi showoochee keyi boonoshi hammemmoyich, Gibitsee taatoo Faroonich hamiree gete” iye.

¹² Tunebaani Muusi wochiꞌi Doono Yeerich, “Israꞌeeleenaꞌo ta getaa waayoon qajjiton, Farooni ta getaa aabichiree waayehe? Tawoo yibbaatoon hakkaani eciya tippo taane” iye.

¹³ Doono Yeeriyoo Muusinaa Harooninoyich ishichiye: “Israꞌeeleenaꞌonaa Gibitsee taatoo Farooninoyich ishichibote: ‘Doono Yeeri Israꞌeeleenaꞌon Gibitsee no kichemmoyich gettitone’ getote” iye.

Israꞌeeleenaꞌo Shiijjee Yaaroo

¹⁴ Israꞌeeleenaꞌochi qaabbechi yareenaꞌo eboshine: Israꞌeelichi gutenee bushoo Roobeelichi anaami bushiisheenaꞌo Hanooki, Faali, Hetsirooninaa Kariminane. Eboshi Roobeeli yoodee qaabbechi niheenaꞌone.

¹⁵ Simoonichi anaami bushiisheenaꞌo Yemuꞌeeli, Yamiini, Ohaadi, Yakiini, Tsohaarinaa Kanaanechee bushoo Shaawullinane. Eboshi Simooni yoodee qaabbechi niheenaꞌone.

¹⁶ Lewi yagiti yemeeno balli shaashaa shabaatte natone. Bi anaami bushiisheenaꞌo Gerishooni, Qohaatinaa Meraarinane. Boonoshi shiijjereenaꞌo eboshine:

¹⁷ Gerishoonichi anaami bushiisheenaꞌo Libiininaa Shimeꞌinane.

¹⁸ Qohaatichi anaami bushiisheenaꞌo Amiraami, Yitsaari, Kebirooninaa Uzeelinane. Qohaati yagiti yemeeno balli shaashaa keejje natone.

¹⁹ Meraari bushiishoo Mahilinaa Muushinane. Lewi yoodee qaabbechi niheenaꞌo boonoshi shiijjeri shiijjeroona eboshine.

²⁰ Amiraami bi nihoo manee Yokebeedin shaaggiye. Biyoo Harooninaa Muusinon shiyahan. Amiraami yagiti yemeeno balli shaashaa shabaatte natone.

²¹ Yitsaarichi anaami bushiisheenaꞌo Qoraahi, Nefeeginaa Zikirinane.

²² Uzeelichi anaami bushiisheenaꞌo Mishaꞌeeli, Elisafaaninaa Sitirinane.

²³ Harooniyoo Aminadaabi bushoo Nahishooni manee Elisheebin shaaggiye. Biyoo Nadaabin, Abiihin, Elazaarinaa Itamaarinon shiyahan.

²⁴ Qoraahichi anaami bushiisheenaꞌo Asiiri, Eliqaaninaa Abiyasaafinane. Eboshi Qoraahi yareenaꞌochi qaabbechi niheenaꞌone.

²⁵ Haroonichi bushoo Elazaari Futeelichi maache bushiisheenaꞌoochee ikkeen shaaggiye. Biyoo Finihaasin shiyahan. Eboshi bulli Lewi yoodee qaabbechinaꞌochi yari yaree ukkireenaꞌone.

²⁶ “Israꞌeeleenaꞌon boonoshi yoodi yoodee yaaroona tuniiree, Gibitsee kichibote” iꞌi Doono Yeeri gettito, ebi Harooninaa Muusinoniye.

²⁷ Israꞌeeleenaꞌon bi gawukkemmoyich Gibitsee taatoo Faroonich gettitinaꞌo boonoshine.

Yeeri Muusinaa Harooninoyich Yibbaato

²⁸ Doono Yeeri Muusich Gibitsaa bi yibbaatehooba

²⁹ biich, “Ta, Doono Yeeri taane; neech ta gettaabeeto bullin Gibitsee taatoo Faroonich gete” iye.

³⁰ Tunebaani Muusi Doono Yeerich “Ta, eciya tippo taane; ta getaa Farooni aabichiree waayehe?” iye.