Keyo 5 - Kafa Linguistics Project

Muusinaa Haroonina Farooni Aafooch Giddo

¹ Ebiyee gubb, Muusinaa Haroonina Faroon waan hammiꞌi, “Israꞌeelee Nuggishoo Doono Yeeri ‘Barahoochaa taach baaroon boonoshi baaremmoyich, ta asheenaꞌon gawukkibe’ itone” iyeete.

² Farooniyoo wochiꞌi ishichiye: “Bi getoon ta waayemmonaa Israꞌeeleenaꞌon ta gawukkemmonoyich, Doono Yeeri aroo konine? Doono Yeerin ariyaache; Israꞌeeleenaꞌonoo gawukkaache” iye.

³ Muusinaa Harooninoo wochiꞌi, “Hibireenaꞌo Nuggishoo noonna danetone. Keejje qemi gommon hamiree, barahoochaa no Nuggishoo Doono Yeerich deejjoon no deejjemmoyich daaggibe iyaꞌa qollaabeeto noone. Ebin no tuniyoo qayigaata, naxoona noon yexxemmone; woyee goraadoona no qitemmoyich tuniyemmone” iyeete.

⁴ Tunebaani Gibitsee taatoo Farooni Muusinaa Harooninon “Haanoshite, amoyichiye asheenaꞌon shuunoo ittoshi biichii beeto? Ittoshi bulli shuunooch wottebote” iye.

⁵ Farooni daakkiꞌi, “Haddoona Gibitseenaꞌoyee beshito ittoshine. Ittoshiyoo Muusinaa Haroonina, asheenaꞌo shuunee shuunoon boonoshi neechemmoyich tuniibeeto ittoshine” iye.

⁶ Ebi arooba Farooni, guuninaꞌo toommooch ukkireti Gibitsee ukkireenaꞌonaa shuunoon ciinnii shuuniyoyich kaacheti Israꞌeelee ukkireenaꞌonoyich ishichiye:

⁷ “Xuubo shuuneyemmi maayi tulloon ebiyee bekk asheenaꞌoyich immaahote. Boonoshi hamiree, maayi tulloo beeti xaaꞌoochee boonoshi qelloona qaawi deebeete.

⁸ Ebiyee aaf ikke heeyooch shuunee boonoshi giddiibeeti xuubee haddoochee shappayaanoon, shuune boonoshi giddiyemmoyich tuniibote. Shuuna biisheenaꞌone; ‘Hamiree no Nuggishoyich deejjoon deejjibone’ boonoshi ii beeto ebichiye.

⁹ Koote woroon elleyaanoon yiti boonoshi shuunemmoyich, shuunoon boonoshi toommooch maggiibote” iye.

¹⁰ Aroochee guuninaꞌo toommooch ukkireti Gibitsee ukkireenaꞌonaa shuunoon ciinnii shuuniyoyich kaacheti Israꞌeelee ukkireenaꞌona hammiꞌi asheenaꞌoyich ishichiyeete: “Farooni ishichitone: ‘Ebiyee bekk amee maayi tullolla ittoshich icheyaachemmone.

¹¹ Amoocheenolla hami ittoshi qelloona maayi tulloon qaawiree deebote. Tunebaani ebiyee aaf ikke heeyooch shuunee ittoshi giddiibeeti xuubee haddoochee shappaachemmone’ itone” iyeete.

¹² Ebich asheenaꞌo maayi tulloon qaawi deeba Gibitsee showoo bulliich shaceheete.

¹³ Guuninaꞌo toommooch ukkireti Gibitsee ukkireenaꞌoo “Heeyooch ittoshi shuunemmi shuunoo ebiyee aaf maayi tulloon ittoshich no imaa shuunee ittoshi giddii beetoyee shappaaye” iꞌi asheenaꞌon kaatii beeheete.

¹⁴ Wotta shuunoon ciini shuuniyoyich kaacheti Israꞌeelee ukkireenaꞌo “Yiichichon tuneba hanaachichon, ebiyee aaf shuuniiꞌi ittoshi giddii beetoommon, amoyich giddiyaachote?” getaa, boonoshin ukkiriiti, guuninaꞌo toommooch ukkireti Gibitsee ukkireenaꞌona xooppeheete.

¹⁵ Aroochee shuunoon ciini boonoshi shuuniyemmoyich kaacheti Israꞌeelee ukkireenaꞌo Faroon waan hammiꞌi ishichii cookiyeete: “Ne guuno no toommooch ebi shaahe mooyon ne tuniito, amoyichiye?

¹⁶ Ne guuno nooch maayi tulloon imaanoon, ‘Xuuboon shuunebote’ iyeete. Gondo ne asheenaꞌochone; tunebaani ne guuno no xooppehone” iyeete.

¹⁷ Farooniyoo wochiꞌi ishichiye: “Shuuna biisho ittoshine; halla shuuna biisho ittoshine; ‘Hamiree Doono Yeerich deejjoon deejjibone’ ittoshi ii beeto, ebichiye.

¹⁸ And illa ittoshi shuunooch wottebote. Ame tulloolla ittoshich icheyaachemmone. Tunebaani ikke heeyooch shuuneree ittoshi giddiyemmoyich getteeti xuuboon shuuneree giddiibote” iye.

¹⁹ Shuunoon ciinnii shuuniyoyich kaacheti Israꞌeelee ukkireenaꞌo, “Ebiyee aaf ikke heeyooch ittoshi giddiibeeti xuuboyee and amolla shappaaye” getaa waayeꞌi, iritee toommooch boonoshi dihoon ariiheete.

²⁰ Taatoo aafoochee boonoshi kechii waahaa, boonoshin quyeebeeti Muusinaa Harooninon daneꞌi,

²¹ ishichiyeete: “Doono Yeeri ittoshich gaace! Ittoshi toommoochoo nallibe! Farooninaa bi iraasheenaꞌona noon ciigemmoyich tuniiꞌi, noon boonoshi wuxemmoyich goraadoon boonoshich immito ittoshine” iyeete.

Yeeri Bi Maccoon Biishe Wodiiya Gibenikkoo

²² Arooba Muusi Doono Yeer waan wotteꞌi ishichiye: “Ta Doonocho, hini asheenaꞌo toommooch ebi shaahe xuuxoon ne deebeto amoyichiye? Ebi tunegaata, amoyichiye taan ne deejjito?

²³ Ne shigoona getoyich Faroon waan ta giddetoochee tiijjiꞌi, biyoo asheenaꞌo toommooch xuuxoon woddiyooch giyitone. Newoo ciroona ne asheenaꞌon biishaa wodiyaano neene” iye.