Keyo 40 - Kafa Linguistics Project

Doono Yeeri Muusich Ciireexi Getoon Geto

¹ Aroochee Doono Yeeri Muusich ishichiye:

² “Yaafee duukkaanoon, ebiyoo danee duukkaanoon, ikkinnee agenee ikkinnee qemooba xogibe.

³ Miixee taabootoon bi daggooch kotiichi, maccillaatoona qeribe.

⁴ Madelloonoo giijjiree, biich qanniti mooyinaꞌon bi toommooch kotiibe. Aroochee maqirajjoon giijjiree, ceecheenaꞌon bi toommooch kotiibe.

⁵ Aachoochee shuuneeti, ixaano shookkeyemmi deejjee gudoon miixee taabootoyee aaf kotiibe. Yaafee duukkaanee kellooch maccillaatoon gede.

⁶ “Micciibeeti deejjoo giddeebeeti deejjee gudoon yaafee duukkaanee, ebiyoo danee duukkaanee kellee ciinooch, maach kotiibe.

⁷ Machee aaco koteebeeti gafetoon danee duukkaanoonaa deejjee gudoonochi gutte daggooch kotiibe. Aaconoo arooch gede.

⁸ Ebi yaafee duukkaanee addibaabee guudoochoo maccillaateenaꞌona uxeroon uxerebe. Maccillaateenaꞌonoo addibaabee kellooch gede.

⁹ “Aree hillooch huutee zayitoon daamiree, yaafee duukkaanoonaa bi daggooch beeti qiico bullinon huuti yaafibe. Yaafeetonoo tunemmone.

¹⁰ Aroochee wotta micciibeeti deejjoo giddeebeeti deejjee gudoonaa bi qiiceenaꞌo bullinon huuti yaafibe. Oogeton yaafeeto tunemmone.

¹¹ Machee aaco koteebeeti gafetoon, bi kotoonoo huuti yaafibe.

¹² “Aroochee Harooninaa bi anaami bushiisheenaꞌonon danee duukkaanee kellooch deebiree, boonoshi achoon aacona maye.

¹³ Haroonich yaafeeti tahoon tajjibe. Qeeshoon tuneree taach bi maddemmoyich, zayitoon huute. Yaafishoo gete.

¹⁴ Wotta bi anaami bushiisheenaꞌon deebiree kittoon tajjibe.

¹⁵ Qeesheenaꞌon tuneree taach boonoshi maddemmoyich, boonoshi nihoon ne huuttetoommon, boonoshinoo huute. Ebina boonoshinaa gubb shiijjemmi boonoshi shiijjereenaꞌo bullina bulli yemeenoon taach qeesheenaꞌo tunemminaꞌone” iye.

Yaafee Duukkaanoo Xogeyoonaa Yaafeyoona

¹⁶ Muusi bulli mooyon Doono Yeeri biich gettitoommon tuniiꞌi, shuunehe.

¹⁷ Guttinnee natooba, ikkinnee agenee ikkinnee qemooba, yaafee duukkaanoo xogeehe.

¹⁸ Yaafee duukkaanoon Muusi xogiyooba, baateenaꞌon boonoshi xaaꞌi xaaꞌoona kotiihe; tureenaꞌon neechiye; yareenaꞌon giijjiye; giimbeenaꞌonoo neechiye.

¹⁹ Qeroonoo yaafee duukkaanee toommooch yaggiye; wotta bi toommooch xappeyemmi bare qeroon geddiye. Ebi bullin Doono Yeeri biich gettitoommon tuniiꞌi shuunehe.

²⁰ Aroochee wotta sheeroo kooreeti, gutte yalle xaqqoon daammiꞌi, taabootee maac geddiye; yareenaꞌonoo taabootooch beeti qalibeteenaꞌooch giijjiye; axaaxoon maariyee guufoonoo bi toommooch geddiye.

²¹ Taabootoon yaafee duukkaanee daggooch giijjiꞌi, qeremmi maccillaatoon tongafiye; ebina miixee taabootoon qeriye. Ebi bullin Doono Yeeri biich gettitoommon tuniiꞌi shuunehe.

²² Madelloon danee duukkaanee daggooch, dambi-waan, taabootoon daabbeebeeti maccillaatee maachaa geddiye;

²³ yaaree koshon aree toommooch kotiiꞌi, Doono Yeeri aafooch tuniihe. Ebi bullin Doono Yeeri biich gettitoommon tuniiꞌi shuunehe.

²⁴ Maqirajjoon danee duukkaanee maac, madellee ciinooch, deshi-waan kotiihe.

²⁵ Ceecheenaꞌon aree toommooch kotiiꞌi, Doono Yeeri aafooch tuniihe. Ebi bullin Doono Yeeri biich gettitoommon tuniiꞌi shuunehe.

²⁶ Aachoochee shuuneeti, ixaanee deejjee gudoon danee duukkaanee daggooch, taabootoon qeriibeeti maccillaatee aafooch kotiihe;

²⁷ aree toommooch cinnechi ixaanoon shookkiye. Ebi bullin, Doono Yeeri biich gettitoommon tuniiꞌi shuunehe.

²⁸ Aroochee maccillaatoon yaafee duukkaanee kellooch tongafiye.

²⁹ Micciibeeti deejjoo giddeebeeti deejjee gudoon danee duukkaanee kellee ciinooch kotiihe; aree toommooch micciibeeti deejjoonaa maayi deejjoonon deejjiye. Ebi bullin Doono Yeeri biich gettitoommon tuniiꞌi, shuunehe.

³⁰ Machee aaco koteebeeti gafetoon danee duukkaanoonaa micciibeeti deejjee gudoonochi gutte daggooch kotiihe; aaconoo arooch geddiye.

³¹ Ebi aacona Muusi, Harooninaa bi anaami bushiisheenaꞌona boonoshi kishoonaa boonoshi baatoonon macheheete.

³² Danee duukkaanooch boonoshi gimoyee shiichiꞌi, wotta deejjee gudooch boonoshi giddoyee shiichiꞌi, machee beeheete. Ebi bullin Doono Yeeri Muusich gettitoommon tuniiꞌi, shuuneheete.

³³ Aroochee Muusi yaafee duukkaanoonaa deejjee gudoonochi guudoon addibaabee maccillaatoona uxerehe; addibaabee kellooch maccillaatoon tongafiye. Muusiyoo eechiꞌi shuunoon ciichiye.

Doono Yeerichi Oogee Yiiroo Bekko

³⁴ Aroyee gubb qubo danee duukkaanoon guuppiye; Doono Yeerichi oogee yiiroo ebi yaafee duukkaanooch ceenniye.

³⁵ Qubo danee duukkaanee toommooch bi tunetoyich, wotta Doono Yeerichi oogee yiiroo yaafee duukkaanooch bi ceennitoyich, Muusi gimon hakkaanoone.

³⁶ Israꞌeeleenaꞌo boonoshi kaamboon happiꞌi gommon boonoshi hammiibeeto, qubo yaafee duukkaanee toommoochee tiyii bi hamigaata baachiye; ebiyooba qaxirii beeheete.

³⁷ Tunebaani qubo tiyii hamo bi qayigaata, bi hammimmi aabee wottoon, aroochee boonoshi kaamboon shuurikkaaneenaꞌone.

³⁸ Gommon boonoshi qaxirimmi aabo bullin Israꞌeeleenaꞌo bullich Doono Yeerichi qubo areddoon yaafee duukkaanee tookkaa bekkee beehe; wotta qaaqqoo xumoon ebi qubee daggoochaa aaxxee beehe.