Keyo 4 - Kafa Linguistics Project

Doono Yeeri Muusich Gaakkechi Mooyinaꞌon Shuunee Hakkoon Imo

¹ Muusiyoo Doono Yeerich wochiꞌi, “Israꞌeeleenaꞌo ‘Doono Yeeri neech bekkeyaanoone’ getiree, taan iberiyoon, ta gettemmonoo waayoon boonoshi qayigaatoche?” iye.

² Doono Yeeriyoo Muusich “Meni ne kisheexo, amoone?” iye. Muusiyoo, “Gumboone” iye.

³ Doono Yeeriyoo “Aroon showooch dufe” iye. Muusiyoo bi gumboon showooch duppiye. Gumboo bekkech dingeroon tunehe. Biyoo ebi dingeroon shattiꞌi wocciye.

⁴ Aroochee Doono Yeeri Muusich “Ne kishoon yaggiree, ebi dingeroon bi ceeroona yeshe” iye. Ebina Muusi bi kishoon yaggiꞌi dingeroon ceeroona bi yechimmona, aafi bi gumboon tunehe.

⁵ Doono Yeeriyoo Muusich “Ebin ne tuniyemmo, boonoshi qaabbechi niheenaꞌo Nuggishoo, Abrahami Nuggishoo, Yisaaqi Nuggishoo, Yaaqobi Nuggishoo Doono Yeeri ta, neech bekketo ta tunoon boonoshi iberiyemmoyichiye” iye.

⁶ Wotta Doono Yeeri daakkiꞌi Muusich, “Ne kishoon ne shoopphooch gede” iye. Muusiyoo bi kishoon bi shoopphooch geddiye. Aroochee bi kichimmona, qeddee shaddee biiyo bi kishooch kechiꞌi, bi kishoo kecho naccoommon naccehe.

⁷ Doono Yeeri Muusich “And ne kishoon wochiree ne shoopphooch gede” iye. Muusiyoo bi kishoon bi shoopphooch geddiye. Wochinnoon bi kichimmona, wodiꞌi aafi bi goorooch wottehe.

⁸ Doono Yeeriyoo Muusich ishichiye: “Neen iberiyaachone ii ikkinnee malletoonoo boonoshi qayigaata, guttinnee malletoon iberiyemminaꞌone.

⁹ Ebi gutte worganikkiti malleteenaꞌon beeggiꞌi, iberiyoo boonoshi qayigaata, ne getoonoo waayo boonoshi qayigaata, aacon Abbaayee kiti daamiree, showooch ukkibe. Ebi are aaco damoon tunemmone” iye.

¹⁰ Muusiyoo Doono Yeerich ishichiye: “Ta Doonocho, aaf tuneba ne guuno taanna tookkaa ne yibbaatetoyee gubb, andoo yibbaatoon hakkechi asho toono taane. Eciya tippo, yibbaatoonoo hakkaani asho taane” iye.

¹¹ Arooba Doono Yeeri Muusich ishichiye: “Ashich heciyoon immito konine? Ashoon miimo woyee ulloo tuniibeeto konine? Aafecho woyee aaf doogoon tuniibeeto konine? Ebin tuniibeeto, Doono Yeeri ta toone?

¹² Illa and tiyiree hambe. Tawoo ne noonooch tunemmo taane; ne gettemmon ta neech arichiyemmo taane” iye.

¹³ Tunebaani Muusi “Ta Doonocho, bare ashoon wochebe” iye.

¹⁴ Ebiyooba Doono Yeeri Muusi toommooch oogeton kaareꞌi, “Lewee asho tuneti, ne manoo Harooni beeto toone? Aroo gaawichii yibbaateebeeto bi tunoon ariibeeto taane. Biyoo neenna daneya ne waan waa beetone. Neen bi beegiyooba, bi mulloona emiremmone.

¹⁵ Newoo biich gettemmo neene; bi gettemmi mooyon biich gettemmo neene. Ne noonoonaa bi noonoonooch tunemmo taane; amoon ittoshi tuniyemmo gaata ta ittoshich arichiyemmo taane.

¹⁶ Newoo nuggishoommon tuneree biich gettemmo neene; biyoo ne noonoon tuneree asheenaꞌoyich gettemmone.

¹⁷ Worganikkiti malleteenaꞌon ne bekkiyemmoyich, ebi gumboon yeshiree hambe” iye.

Muusi Gibitsee Showooch Wotto

^18-19 Muusi Miidiyamee showooch bi beetaa, Doono Yeeri biich, “Neen wuxiya qaawiibee echeti asheenaꞌo bulli qititinaꞌone; wotteree Gibits hambe” iye. Muusi bi abboo Yotoor waan wottee hammiꞌi, “Ta xibeenaꞌo kashoona boonoshi beemon Gibits hamiree ta beeggemmoyich, taan daaggibe” iye. Yotooriyoo “Diggoona hambe” iꞌi daaggiye.

²⁰ Muusi bi mecheenaa bi anaami bushiisheenaꞌonon kuroon yebbiiꞌi, Gibits qaxiriye. Yeeri biich gettiti gumboon yechiꞌiniye bi hammito.

²¹ Doono Yeeriyoo Muusich ishichiye: “Gibits wottaa ne hamiyooba, neech ta immeti hakkoona ne shuunemmi, gaakkechi mooyo bullin Farooni aafoochaa ceechemmo ne tunoon batteyaahine. Tunebaani asheenaꞌon bi gawukkaachemmoyich, bi mulloon muumiyemmo taane.

²² Ebich Faroonich ishichibe: ‘Doono Yeeri ishichiye: “Israꞌeeli ta gutenee bushoone.

²³ Taach bi goyinne maddemmoyich ta bushoon ne gawukkemmoyich gettoye; tunebaani ne, gawukkemmon qajjehine; ebich ne gutenee bushoon wuxemmo taane” itone’ gete” iye.

²⁴ Muusi Gibits hammiibee bi qeyiti ikke xaaꞌoochaa Doono Yeeri biinna daneꞌi biin wuxiya iye.

²⁵ Muusi mechee Tsifoori aci shaammoon deebaꞌa bi bushoon dokiriyan; bushoo shookoona Muusi baatoon yechaꞌa, “Damoona ta daneti keno neene” iyan.

²⁶ Ebich Doono Yeeri biin wuxaanoon qajjiye; “Damoona ta daneti keno neene” bi ito, dokireyee naboonane.

²⁷ Ebiyooba Doono Yeeri Haroonich “Muusina danoyich barahooch hambe” itone. Biyoo tiyii hammiꞌi, Yeerichi guudoochaa Muusina danehe; daneꞌi shummiye.

²⁸ Muusiyoo Doono Yeeri bi gettemmoyich wocheti qaaroonaa bi tuniyemmoyich bi gettiti worganikkiti malleteenaꞌona bulloshin Haroonich gettiye.

²⁹ Muusinaa Haroonina Gibits hammiꞌi, Israꞌeelee ukkireenaꞌo bullin ikkooch kiciyeete.

³⁰ Harooniyoo Doono Yeeri Muusich gettiti qaaro bullin boonoshich gettiye; wotta worganikkiti malleteenaꞌon asheenaꞌo aafoochaa tuniihe.

³¹ Boonoshiyoo iberiiheete. Doono Yeeri boonoshich qaakkeebeeto bi tunoonaa boonoshi xuuxoon beeggito bi tunoonon waayeꞌi, Doono Yeerich yittiꞌi goyinneheete.