Keyo 38 - Kafa Linguistics Project

Deejjee Gudo Shuuneyoo

¹ Betsaleeli micciibeeti deejjoo giddeebeeti deejjee gudoon geellee mixoochee shuunehe. Ebi deejjee gudo bi gidoo uuche hiroo, bi maaco uuche hiroo, bi neexoo keejje hiroo tuneechii, awudde bi naaboo tatoone.

² Bi awudde shuutoona qareenaꞌon shuunehe. Ebi qareenaꞌo deejjee gudoona tookkii ikkochee shuuneetinaꞌone. Deejjee gudo bullin gooshoona dikkehe.

³ Deejjee gudoyich qiiceenaꞌo bullin, eboshiyoo tulloo booddeebeeti gubeenaꞌon, tulloo ucheebeeti maankeenaꞌon, quppe saaneenaꞌon, gomeenaꞌonaa qaaqqee buno yecheyemmi qiiceenaꞌonon gooshoochee shuunehe.

⁴ Tulloo kechemmoyich tunemmi, dabboommi mooyon gooshoochee shuunehe. Ebi dabboon deejjee gudee gitooch beddaahaa bi shaggemmoyich, deejjee gudee daggooch, noonoyee desh tuniihe.

⁵ Ebi dabbee awudde shuutooch yareenaꞌo giyemmi awudde qalibetoon gooshoochee shuunehe.

⁶ Yareenaꞌon geellee mixoochee shuuneꞌi, boonoshin gooshoona dikkehe.

⁷ Deejjee gudo shaaggeyemmi, ebi yareenaꞌon deejjee gudee gutte naabeexi qalibeteenaꞌochi aahoona giijjiye. Deejjee gudoon maacaa aaho tuniiꞌi shaaqqoona shuunehe.

Gooshee Gafeto Shuuneyoo

⁸ Betsaleeli danee duukkaanee kellooch maddeebeeti genneenaꞌo deebiti, gooshee heeraawoochee machee aaco koteebeeti gafetoonaa bi kotoonon, shuunehe.

Yaafee Duukkaanee Addibaaboo Shuuneyoo

⁹ Betsaleeli yaafee duukkaanee addibaaboon shuunehe. Deshi-waan beeti, addibaabee gidoyich balle hiroo tuneti maccillaateenaꞌo beetinaꞌone. Boonoshi shuuneeto, muttee tuppoochee ciciitaa yokkeeti woshiqoona shippeti qoreddoocheeniye.

¹⁰ Boonoshin tuuggemmi hiye giimbeenaꞌonaa ebi giimbeenaꞌochi hiye baateenaꞌona gooshoochee shuuneetinaꞌone; tunebaani ebi giimbeenaꞌo toommooch beeti kaꞌeenaꞌonaa yaabeenaꞌona birewoochee shuuneetinaꞌone.

¹¹ Ebiyoommon wotta dambi-waan beeti addibaabee gidoyich balle hiroo tuneti maccillaateenaꞌo beetinaꞌone. Boonoshin tuuggemmi hiye giimbeenaꞌonaa ebi giimbeenaꞌochi hiye baateenaꞌona gooshoochee shuuneetinaꞌone; wotta ebi giimbeenaꞌo toommooch beeti kaꞌeenaꞌonaa yaabeenaꞌona birewoochee shuuneetinaꞌone.

¹² Aabi-gimo waan beeti addibaabee gidoyich aache hire maccillaateenaꞌo beetinaꞌone. Boonoshin tuuggemmi aashire giimbeenaꞌonaa ebi giimbeenaꞌoyich aashire baateenaꞌona beetinaꞌone. Ebi giimbeenaꞌo toommooch beeti kaꞌeenaꞌonaa yaabeenaꞌona birewoochee shuuneetinaꞌone.

¹³ Aabi-keyo waan beeti addibaabee gidoo aache hiroone.

¹⁴ Ikke baddaa, kelloochee tiijjiꞌi, aaraa uuche hire maccillaateenaꞌo beetinaꞌone. Boonoshin tuuggemmi keejje giimbeenaꞌonaa ebi giimbeenaꞌoyich keejje baateenaꞌona beetinaꞌone.

¹⁵ Bare baddaa, kelloochee tiijjiꞌi, aaraa uuche hire maccillaateenaꞌo beetinaꞌone. Boonoshin tuuggemmi keejje giimbenaꞌonaa ebi giimbeenaꞌoyich keejje baateenaꞌona beetinaꞌone.

¹⁶ Addibaabee guudooch beeti maccillaatoo bulli muttee tuppoochee ciciitaa yokkeeti woshiqoona shippeti qoreddoochee shuuneetone.

¹⁷ Addibaabee guudooch beeti giimbeenaꞌochi baateenaꞌo gooshoochee shuuneetinaꞌone; wotta giimbeenaꞌo toommooch beeti kaꞌeenaꞌonaa yaabeenaꞌona birewoochee shuuneetinaꞌone. Ebi giimbeenaꞌo toommo birewoona dikkeetone; addibaabee giimbeenaꞌo bullichi yaabeenaꞌo birewoochee shuuneetinaꞌone.

¹⁸ Addibaabee kelloyich, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shippeti qoreddoochee shuuneeti maccillaatoo beetone; bi toommoochoo shashiitaa shippetone. Ebi maccillaatoo, addibaabee uxeree maccillaateenaꞌochoommon, bi gidoo hiye hiroo, bi neexoo uuche hiroone.

¹⁹ Ebi maccillaatoon tuuggemmi awudde giimbeenaꞌonaa ebi are giimbeenaꞌoyich gooshoochee shuuneeti awudde baateenaꞌona beetinaꞌone. Boonoshi kaꞌeenaꞌo birewoochee shuuneetinaꞌone; boonoshi toommonaa yaabeenaꞌona birewoona dikkeetinaꞌone.

²⁰ Yaafee duukkaanee xogeenaꞌonaa bi guudooch beeti addibaabee uxeree xogeenaꞌona bulloshi gooshoochee shuuneetinaꞌone.

Yaafee Duukkaanee Shuunoyich Tuneti Mooyinaꞌo

²¹ Yaafee duukkaanee shuunoyich, ebiyoo miixee duukkaanee shuunoyich, Muusi gettitoommon, qeeshoo Harooni bushoo Itamaari yaabaa, Leweenaꞌo kooriti mooyinaꞌo haddoo ebine.

²² Yihudi yoodoochee tuneti, Huuri bushoochi bushoo, Uriyi bushoo Betsaleeli Doono Yeeri Muusich gettito bullin shuunehe.

²³ Biinna tookkii shuuneebeeti, Daani yoodoochee tuneti, Ahisamaaki bushoo Oholiyaabi, kishee shuunee ariyecho, shuunee qoppechonaa shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shashiyechonane.

²⁴ Yaafee duukkaanee shuunoo bullich Doono Yeerich yaafeeto bi tunoon bekkiyoyich, bi aafooch kaama tiijjiꞌi asheenaꞌo immiti aachoo bulli yaafee kechi machoona qocaa, ikke hume kiilo giraamo tunehe.

²⁵ Israꞌeeleenaꞌo haddeehooba, boonoshi waanee daneti birewoo yaafee kechi machoona qocaa keejje humaa awudde ballaa shaashe kiilo giraamo tunehe.

²⁶ Haddeeti, hiye natonaa hiye natoyee damboona tuneti anaamo bulli shiritte ballaa keejje humaa uuche ballaa aachoone. Ebi are asheenaꞌo bulli boonoshi ikkikkoona yaafee kechi machoona qocceti, sheqeelee qachi birewoon qoccitinaꞌone.

²⁷ Yaafee duukkaanee giimbeenaꞌochi, wotta duukkaanee maaci maccillaatee giimbeenaꞌochi balle baateenaꞌo keejje humaa awudde balle kiilo giraamee birewoona shuuneeheete. Ebi geto, ikkikke baatoo shaashaa awudde kiilo giraamee birewoona shuuneete getone.

²⁸ Betsaleeli giimbeenaꞌochi kaꞌeenaꞌonaa yaabeenaꞌonon echeti shaashe kiilo giraamee birewoona shuunehe; wotta ebi are giimbeenaꞌo toommon dikkehe.

²⁹ Doono Yeerich yaafeeto bi tunoon bekkiyoyich, bi aafooch kaama tiijjiꞌi asheenaꞌo immiti gooshoo gutte humaa awudde ballaa hiyaa uuche kiilo giraamoone.

³⁰ Betsaleeli ebi gooshoona danee duukkaanee kellee giimbeenaꞌochi baateenaꞌon, gooshee deejjee gudoon, tulloo kechemmoyich tunemmi, gooshee dabboommi mooyonaa deejjee gudee qiiceenaꞌo bullinon shuunehe;

³¹ wotta yaafee duukkaanee addibaabee uxeree guudooch beeti giimbeenaꞌochi baateenaꞌonaa addibaabee kellee giimbeenaꞌochi baateenaꞌonon shuunehe; ebiyoommon wotta yaafee duukkaanee xogeenaꞌonaa addibaabee uxeree guudooch beeti xogeenaꞌona bulloshin shuunehe.