Keyo 37 - Kafa Linguistics Project

Wogee Taabooto Shuuneyoo

¹ Betsaleeli taabootoon geellee mixoochee shuunehe. Ebi taabooto bi gidoo gutte hiraa qato, bi maaco ikke hiraa qato, bi neexoo ikke hiraa qatone.

² Bi maacinaa maachinon xalle aachoona dikkehe; bi guude gawe goconoo aachoona shuunehe.

³ Awudde qalibetoon aachoochee shuuneꞌi, guttoon ikke baddaa, guttoon wotta bare baddaa tunii, awudde baatoona tookkii yeshiihe.

⁴ Aroochee gutte yareenaꞌon geellee mixoochee shuuneꞌi aachoona dikkehe.

⁵ Taabooto shaaggeyemmoyich, ebi yareenaꞌon taabootee naabooch geddeti qalibeteenaꞌochi aahoona beshiiꞌi giijjiye.

⁶ Wotta axaaxoon maariyee guufoon xalle aachoochee shuunehe. Ebi guufo bi gidoo gutte hiraa qato, bi maaco ikke hiraa qatone.

⁷ Aroochee guufee goconaa goconooch tunemmi, gutte kiruubeenaꞌon qicheti aachoochee shuunehe.

⁸ Ikke kiruuboon ikke baddi gocooch, wotta ikke kiruuboon bare baddi gocooch tuniiꞌi shuunehe. Boonoshinoo axaaxoon maariyee guufoona tookkii ikkochii shuunehe.

⁹ Kiruubeenaꞌo boonoshinaa boonoshina ciinee beetinaꞌo tuneechii, boonoshi aafoon axaaxoon maariyee guufo waan tuniiheete; boonoshi qoshoon yaggiꞌi, axaaxoon maariyee guufoon yiiriheete.

Yaaree Kosho Kotemmi Madelloo Shuuneyoo

¹⁰ Betsaleeli madelloon geellee mixoochee shuunehe. Ebi madelloo bi gidoo gutte hiroo, bi maaco ikke hiroo, bi neexo ikke hiraa qatone.

¹¹ Aroochee xalle aachoona dikkehe. Bi guude gawe goconoo aachoona shuunehe.

¹² Ikke ciixi qach bede goci degoon bi guude gawoona shuunehe. Bi guude gawe goconoo aachoona shuunehe.

¹³ Madelloyich awudde qalibeteenaꞌon aachoochee shuuneꞌi, awudde baateenaꞌo beeti awudde shuutoona yeshiihe.

¹⁴ Madelloon shaagoyich tunemmi yareenaꞌon boonoshi yechemmoyich, ebi qalibeteenaꞌon goci degee katinooch tuniihe.

¹⁵ Yareenaꞌon geellee mixoochee shuuneꞌi aachoona dikkehe.

¹⁶ Madelloyich tunemmi qiiceenaꞌo, eboshiyoo yalle saaneenaꞌonaa shaateenaꞌonon, ebiyoommon wotta uyee deejjoon ukkoyich tunemmi koddeenaꞌonaa quppe saaneenaꞌonon xalle aachoochee shuunehe.

Maqirajjo Shuuneyoo

¹⁷ Betsaleeli ceechoo kotemmi maqirajjoon xalle aachoochee shuunehe. Bi neexemmi baatoonaa yaaboonon qiccii shuunehe. Ebi maqirajjee bungeenaꞌonaa bi bungeenaꞌochi degeenaꞌona, ceechee zayito beeti qulleenaꞌoo maqirajjoona tookkii ikkochee shuuneetinaꞌone.

¹⁸ Maqirajjee ikke badd keejje ato, bare badd keejje ato, bulli shiritte ato beetone.

¹⁹ Maqirajjoona tookkii yesheti shiritte ato, bi ikkikkoyich, luuzee bungoonaa bi degoonon shaahiitaa shuuneeti keejje qullo beetone.

²⁰ Maqirajjee giindooch wotta luuzee bungoonaa bi degoonon shaahiitaa shuuneeti awudde qullo beetone.

²¹ Maqirajjee ateenaꞌochi, batti batti gutteenaꞌochi xepphooch, bi hilleexi gutteenaꞌochi xepphooch, keejjinnee gutteenaꞌochi xepphoochoo, bungee dego shuuneetone.

²² Ebi bungee degeenaꞌonaa ateenaꞌo bullina maqirajjoona tookkii ikkochee shuuneetinaꞌone; eboshi bulli xalle aachoochee qiicaa shuuneetinaꞌone.

²³ Aroochee maqirajjoyich shabaatte ceecheenaꞌon, wotta qafeteenaꞌonaa ciitoo kiceyemmi yalle gafeteenaꞌonon xalle aachoochee shuunehe.

²⁴ Maqirajjoonaa bi qiiceenaꞌo bullinon shaashaa awudde kiilo giraamee xalle aachoona shuunehe.

Ixaanee Deejjee Gudo Shuuneyoo

²⁵ Betsaleeli ixaano shookkeyemmi deejjee gudoon geellee mixoochee shuunehe. Ebi gudo bi gidoo ikke hiroo, bi maacoo ikke hiroone; awudde bi naaboo bulli tatoone; bi neexoo gutte hiroone. Ebi are deejjee gudee awudde shuutoona beeti qareenaꞌo tookkii ikkochee shuuneetinaꞌone.

²⁶ Bi toommon, bi awudde naaboonaa qareenaꞌonon xalle aachoona dikkehe. Bi guude gawe goconoo aachoona shuunehe.

²⁷ Ebi are gocoyee desh, bi ikke baddi naaboonaa bare baddi naaboonooch, ebi deejjee gudo shaaggeyemmi yareenaꞌo giyemmi, gutte aachee qalibetoon shuunehe.

²⁸ Yareenaꞌon geellee mixoochee shuuneꞌi, aachoona dikkehe.

Huutee Zayitoonaa Ixaanoona Shuuneyoo

²⁹ Wotta Betsaleeli yaafeeti huutee zayitoonaa ariyechi asho shittoon bi shuunee beetoommi gommona shuuneeti cinnechi xalle ixaanoonon shuunehe.