Keyo 36 - Kafa Linguistics Project

¹ “Ebich Betsaleeli, Oholiyaabi, wotta yaafee duukkaanee shuunoo bullin aabichiree boonoshi shuunemmo gaata Doono Yeeri hakkoonaa ariyoonon boonoshich immiti, ariyechi asheenaꞌo bulli Doono Yeeri gettitoommi gommona shuunoon shuunemminaꞌone” iye.

Asheenaꞌo Wodde Wojjoon Imo

² Aroochee Muusi, Betsaleelinaa Oholiyaabinon, ebiyoommon wotta Doono Yeeri shuunoon boonoshi shuunemmoyich hakkoon immiti, boonoshi mullo tiyiti, shuunee ariyechi asho bullin ceeggiye.

³ Boonoshiyoo yaafee duukkaanee shuunoyich Israꞌeeleenaꞌo deebiti, mullee daaggoona icheti wojjoo bullin Muus waanee deqqiyeete. Tunebaani asheenaꞌo boonoshi daaggoona maaddi maaddoona kuxaanoon, wojjoon Muus waan deebii beeheete.

⁴ Ebich yaafee duukkaanee shuunoon shuuneebeeti, ariyechi shuunechinaꞌo bulli boonoshi shuunoon qajjiichii waaꞌi,

⁵ Muusich “Asheenaꞌo Doono Yeeri gettiti shuunoyich qaaweetoyee beshaa beshe wojjoon deebii beetinaꞌone” iyeete.

⁶ Aroochee Muusi Israꞌeeleenaꞌo kaambo bulliich ishichiibeeti getoon wochee daachiihe: “Anaamo tuneba maachee koniyoona yaafee duukkaanee shuunoyich tunemmi wojjoon ebiyee damba deebaaye” iye. Ebina boonoshiyoo asheenaꞌo deebaachemmoyich bajjiyeete.

⁷ Ebin boonoshi tuniito, ebi waati mooyo shuunoo bullin shuunoyich beddii echeto bi tunetoyichiye.

Yaafee Duukkaanoo Shuuneyoo

⁸ Shuunechinaꞌo daggoochee shuunee hakkoo boonoshich beeti asheenaꞌo bulli yaafee duukkaanoyich aashire maccillaateenaꞌon shuuneheete. Eboshin muttee tuppoochee ciciitaa yokkeeti, shimaayito, dameroonaa ceelloona tuneti woshiqoona shippeti qoreddoochee shuuneheete; aree toommoochoo kiruubeenaꞌon malletiiꞌi shippiyeete.

⁹ Maccillaatoo bulli tatoone; bi ikkikkoochi neexo hiyaa shimitte hiroo, bi maaco awudde hiroone.

¹⁰ Uuche maccillaatoon xaaqqii gawiiꞌi kochiyeete; echeti uuche maccillaatoon ebiyoommon xaaqqii gawiiꞌi kochiyeete.

¹¹ Ebi ikkooch xaaqqeeti ikke maccillaatee gocooch, shimaayite qoreddoochee shuuneeti kenneenaꞌon geddiyeete; ohe ikke maccillaatee gocoochoo ebiyoommon wotta geddiyeete.

¹² Aache kennoon ikke baddi maccillaatee gocooch, wotta aache kennoon ohe ikke maccillaatee gocooch ciiniiꞌi geddiyeete.

¹³ Aroochee yaafee duukkaanoo ikkochee yesheto bi tunemmoyich, aache qamaaxiroon aachoochee shuuneꞌi, ebi aroona maccillaateenaꞌon ikkochii yeshiiheete.

¹⁴ Yaafee duukkaanoon tookkaa qeremmi, emmishee eexoochee shippeti qoreddeenaꞌon shuuneheete. Ebi qoreddoo aaraa ikkoone.

¹⁵ Ebi aaraa ikke qoreddoo tatoone; bi ikkikkoochi neexo shaashe hiroo, bi maaco awudde hiroone.

¹⁶ Uuche qoreddoon ikkooch xaaqqii, ebiyoommon wotta shiritte qoreddoon ikkooch xaaqqii gawiiꞌi kochiyeete.

¹⁷ Ikke badd beeti uuche qoreddoo ikkooch xaaqqeeti, ciireexi gocooch aache kennoon, ebiyoommon wotta bare badd beeti shiritte qoreddoo ikkooch xaaqqeeti, ciireexi gocooch aache kennoon geddiyeete.

¹⁸ Aroochee duukkaanoon ikkochiꞌi yeshiyoyich, aache qamaaxiroon gooshoochee shuuneheete.

¹⁹ Duukkaanoyich qucaa shuuneeti, bagee baaddoochi gooqqoochee qeroon shuuneheete; wotta bi toommooch xappeyemmi, bare qeroon gaawichaa qucheti bare gijjee gooqqoochee shuuneheete.

^20-22 Yaafee duukkaanoyich kaamoo tuneti tureenaꞌon geellee mixoochee shuuneheete. Gutti gutte mixon buroona ikkochii xaaqqiꞌi, ikke turoon tuniiheete. Ikkikke turee neexo aashire hiroo, bi maacoo ikke hiraa qatone. Turee deshi ciiroochaa gutte kallaachoon kichiyeete. Yaafee duukkaanee turoo bullin ebiyoommi gommona shuuneheete.

²³ Yaafee duukkaanee deshi-waanich hiye turoon shuuneheete.

²⁴ Ebi hiye tureenaꞌoyich boonoshi neexemmi aabbe baatoon birewoochee shuuneheete; ikke turee gutte kallaachoyich gutte baatoon, wotta bare turee gutte kallaachoyich gutte baatoon tuniiheete.

²⁵ Ebiyoommon yaafee duukkaanee dambi-waanich hiye tureenaꞌon shuuneheete.

²⁶ Boonoshi kallaachoyich tunemmi aabbe baatoon birewoochee shuuneheete; ikke turee xepphooch gutte baatoon, wotta bare turee xepphooch gutte baatoon tuniiheete.

²⁷ Yaafee duukkaanee gubbich, ebiyoo aabi-gimo waanich, shiritte turoon shuuneheete.

²⁸ Gubbi duꞌeenaꞌoyich gutte turoon shuuneheete.

²⁹ Ebi tureenaꞌo deshee tiijjiꞌi damba ikkinnee qalibetooch beddaahaa, ikkottee yeshetinaꞌone. Gutte duꞌoyich tunemmi gutte turoon ebiyoommi gommona shuuneheete.

³⁰ Birewoochee shuuneeti gutti gutte baatoo ikkikke turoyich beetone; ebina shimitte turoonaa aaraa shiritte baatoona tunehe.

³¹ Wotta aaraa uuche yaroon geellee mixoochee shuuneheete. Ikke badd beeti yaafee duukkaanee tureenaꞌoyich uuche yaroon,

³² bare badd beeti, yaafee duukkaanee tureenaꞌoyich uuche yaroonaa yaafee duukkaanee gubb aabi-gimo waan beeti tureenaꞌoyich uuche yaroonon shuuneheete.

³³ Daggeexi yaroon tureenaꞌo daggoona tuniiꞌi, cilloochee cillooch beddaahaa beshiiheete.

³⁴ Tureenaꞌon aachoona dikkeheete. Yareenaꞌon yeshiyoyich qalibeteenaꞌon aachoochee shuuneheete; yareenaꞌonoo aachoona dikkeheete.

³⁵ Yaafee duukkaanee maaci maccillaatoon shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shippeti qoreddoochee shuuneheete; aree toommooch kiruubeenaꞌon malletiiꞌi shippiyeete.

³⁶ Geellee mixoochee maccillaateenaꞌo kaqqeyemmi awudde giimboon shuuneheete; eboshin aachoona dikkeheete; aachoochee shuuneeti kaꞌeenaꞌon boonoshi toommooch geddiyeete; boonoshichoo awudde baateenaꞌon birewoochee shuuneheete.

³⁷ Duukkaanee kellee maccillaatoon shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shippeti qoreddoochee shuuneheete; aree toommoochoo shashii shippiyeete.

³⁸ Ebi maccillaateenaꞌoyich uuche giimbeenaꞌonaa boonoshi kaꞌeenaꞌonon shuuneheete. Ebi giimbeenaꞌon boonoshi toommona tookkii aachoona dikkeheete. Boonoshi yaabeenaꞌon aachoochee shuuneheete. Ebi giimbeenaꞌo neexemmi uuche baatoon gooshoochee shuuneheete.