Keyo 35 - Kafa Linguistics Project

Shambetee Doyeenaꞌo

¹ Muusi Israꞌeelee iitoo bullin kiciꞌi ishichiye: “Ittoshi tuniyemmoyich Doono Yeeri gettiti mooyinaꞌo eboshine:

² Shiritte qemon shuunoon shuunemmo ittoshine; tunebaani shabaattinnee qemo, kashe ittoshi heechemmi, Doono Yeeri taach yaafeeti shambetoone; arooba shuunoon shuunemmo koniyoona qitibe.

³ Shambetee aabooba ittoshi beeyi kexoochaa qaaqqoon shookkaahote” iye.

Yaafee Duukkaanoon Shuunoyich Tunemmi Wojjoo

⁴ Muusi Israꞌeelee iitoo bullich ishichiye: “Doono Yeeri gettito ebine:

⁵ Ittoshich beeto bulliichee Doono Yeerich wojjoon imbote. Bi mullo tiyaa imoyich daaggito koniyoona, aachoon woyee birewoon woyee gooshoon wojjoo tuniiree Doono Yeerich deebe.

⁶ Shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shippeti qoreddoon; emmishee eexoochee shippeti qoreddoon;

⁷ qucaa shuuneeti, bagee baaddoochi gooqqoon; gaawichaa qucheti bare gijjee gooqqoon; geellee mixon;

⁸ ceechoyich tunemmi zayitoon; huutee zayitoonaa cinnechi ixaanoonoyich tunemmi qimaamoon;

⁹ qeeshee guudoochi efoodoonaa geteexi kiisoonochi toommooch geddeyemmi shohaamee aaxxe xaqqoonaa bare aaxxe xaqqeenaꞌonon wojjoo tuniiree deebe.

¹⁰ “Ittoshi daggoochee shuunee ariyechi asho bulli waaree, Doono Yeeri gettito bullin shuunebe.

¹¹ Duukkaanoon, bi qeroon, bi qamaaxireenaꞌon, bi tureenaꞌon, bi yareenaꞌon, bi giimbeenaꞌonaa bi baateenaꞌonon;

¹² wogee taabootoon, bi yareenaꞌon, axaaxoon maariyee guufoonaa biin qeroyich tunemmi maccillaatoonon;

¹³ madelloon, bi yareenaꞌon, bi qiico bullinaa Yeeri aafooch beeyemmi, yaafeeti yaaree koshonon;

¹⁴ aaxxeebeeti ceechoyich tunemmi maqirajjoon, bi qiiceenaꞌon, bi ceecheenaꞌonaa ceechoyich tunemmi zayitoonon;

¹⁵ ixaanee deejjee gudoon, bi yareenaꞌon, bi huutee zayitoonaa cinnechi bi ixaanoonon; yaafee duukkaanee kelloyich tunemmi maccillaatoon;

¹⁶ micciibeeti deejjoyich tunemmi deejjee gudoon, tulloo kechemmoyich tunemmi, gooshoochee shuuneeti, dabboommi bi mooyon, bi yareenaꞌonaa bi qiico bullinon; machee aaco koteebeeti gafetoonaa bi kotoonon;

¹⁷ addibaabee maccillaateenaꞌon, boonoshi giimbeenaꞌonaa boonoshi neexemmi baateenaꞌonon; addibaabee kelloyich tunemmi maccillaatoon;

¹⁸ yaafee duukkaanoonaa addibaaboonoyich tunemmi xogeenaꞌonaa wodereenaꞌonon;

¹⁹ Yaafe Xaaꞌoochaa maddoyich taheyemmi, malletiitaa shuuneeti taheenaꞌon, eboshiyoo Harooninaa bi anaami bushiisheenaꞌona qeesheenaꞌo tuneree, tahemmi yaafeeti taheenaꞌon shuunebeete” iye.

Asheenaꞌo Doono Yeerich Wojjoon Giddiyoo

²⁰ Aroochee Israꞌeelee iitoo bulli Muusi aafoochee kechii hammiye.

²¹ Bi mullo tiyito bulli danee duukkaanee shuunoyich, maddoo bullich tunemmi qiiceenaꞌonaa yaafeeti taheenaꞌonoyich tunemmi wojjoon Doono Yeerich deebiye.

²² Boonoshi mullo shunnitinaꞌo bulli, anaaminaꞌoo maacheenaꞌoo tahooch geddeebeeti aachoon, boonoshi waameexi aachoon, boonoshi kisheexi axxaamittoon, boonoshi qetteexi aachoonaa baribare aachoo bullinon deebiyeete. Boonoshi bulliyoo aachoon yaafeeti wojjoo tuniiꞌi Doono Yeerich giddiiheete.

²³ Shimaayite woshiqoon, damere woshiqoon, ceelle woshiqoon, muttee tuppoochee ciciitaa yokkeeti qoreddoon, emmishee eexoochee shippeti qoreddoon, qucaa shuuneeti, bagee baaddoochi gooqqoon, gaawichaa qucheti, bare gijjee gooqqoon, asho biich beeti beeton deebiye.

²⁴ Birewee wojjoon woyee gooshee wojjoon imoyich hakkito bulli Doono Yeerich deebiye; shuunoyich tunemmi geellee mixo biich beeti asho bulliyoo deebiye.

²⁵ Shuunee ariyechi maacheenaꞌo bulli boonoshi yokketi, shimaayito, dameroonaa ceelloona tuneti woshiqoon, wotta muttee tuppoochee ciciiꞌi boonoshi yokketi woshiqoon deebiyeete.

²⁶ Boonoshi mullo tiyiti, shuunee ariyechi genneenaꞌo bulli emmishee eexoochee woshiqoon yookkeheete.

²⁷ Ukkireenaꞌo efoodoonaa geteexi kiisoonochi toommooch geddeyemmi, shohaamee aaxxe xaqqeenaꞌonaa baribare aaxxe xaqqeenaꞌonon deebiyeete.

²⁸ Ebiyoommon ceechoyich, huutee zayitoyich, cinnechi ixaanoyichoo tunemmi qimaamoonaa zayitoonon deebiyeete.

²⁹ Doono Yeeri Muusina bi gettiti shuunoyich tunemmi mooyo amoonolla imoyich boonoshi mullo tiyiti Israꞌeeleenaꞌo bulli, anaaminaꞌonaa maacheenaꞌona, mullee daaggoona Doono Yeerich wojjoon deebiyeete.

Muusi Betsaleelinaa Oholiyaabinon Yeeri Kaacon Asheenaꞌoyich Geto

³⁰ Aroochee Muusi Israꞌeeleenaꞌoyich ishichiye: “Ebiyoche, Doono Yeeri Yihudi yoodoochee tuneti Huuri bushoochi bushoo, Uriyi bushoo Betsaleelin kaaccitone.

³¹ Doono Yeeri bi Ayaanoona bi ceennemmoyich tuniitone; kishee shuunoo tuneti mooyo amoyichona hakkoon, ariyoonaa mulloonon biich immitone.

³² Ebiyoo, ebi kishee shuunoon bi qoppemmoyich, aachoona, birewoonaa gooshoona shuuneebeeti qiiceenaꞌon bi shuunemmoyich,

³³ qebbooch geddeyemmi aaxxe xaqqeenaꞌon bi qiicemmonaa mixon bi qiicemmonoyich, kishee shuunoo bullinoo bi shuunemmoyichiye.

³⁴ Bareenaꞌon boonoshi dojjemmi hakkoon biinnaa Daani yoodoochee tuneti Ahisamaaki bushoo Oholiyaabinoyich immitone.

³⁵ Kishee shuunee ariyechinaꞌo, shuunee qoppechinaꞌo, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shashiyechinaꞌonaa shippechinaꞌona tuneree boonoshi shuunemmoyich, hakkoon boonoshich immitone. Boonoshiyoo shuunoo aabinona shuunechinaꞌonaa qoppechinaꞌonane.