Keyo 33 - Kafa Linguistics Project

Siini Guudon Gawukkiree Boonoshi Hammemmoyich Doono Yeeri Geto

¹ Aroochee Doono Yeeri Muusich ishichiye: “Hiniichee tiyiree hambe. Neennaa Gibitsee ne kichiti asheenaꞌona hini xaaꞌoon gawukkiree, ‘Ne shiijjereenaꞌoyich immemmo taane’ iyaꞌa Abrahamich, Yisaaqinaa Yaaqobinoyich ta wogeti showooch hambote.

² Maraakoon ne aaf shiichiiree, Kanaaneenaꞌon, Amooreenaꞌon, Hiteenaꞌon, Ferizeenaꞌon, Hiweenaꞌonaa Yebuseenaꞌonon yoohi kichemmo taane.

³ Ejjoonaa eeyona xuupphiibeeti showooch hambote. Tunebaani babberoo ittoshi tunetoyich, gommoochaa ittoshin ta aalliyaachemmoyich, ittoshina tookki hamaachemmo taane” iye.

⁴ Asheenaꞌo ebi ayinikkiti mooyon waayeꞌi, ayinii tuummiyeete; aroobiyee tiijjiꞌi koniyoona shashoon gedaanoone.

⁵ Ebiyoo Doono Yeeri Muusich “Israꞌeeleenaꞌon, ‘Ittoshi babberoo ittoshi tunetoyich, qillifee yexx bedoonona ittoshina tookkii ta hammeto gaata, ittoshin aalliyesho taane. Andoo ittoshi geddiibeeti shashoon kichibote. Ittoshi toommooch amoon ta tuniyemmo gaata maaccemmo taane’ gete” bi itoyichiye.

⁶ Ebich asheenaꞌo boonoshi geddiibeeti shashoon Kooreebi guudoochaa kichiyeete; aroyee gubb gedaaneenaꞌone.

Danee Duukkaanoo

⁷ Muusi, duukkaanoon kaamboyee maach wokkiꞌi beeti xaaꞌooch xogii beehe. Aroonoo “Danee duukkaanoo” iye. Doono Yeerin qaawiibeeti asho bulli, kaamboyee maach beeti danee duukkaanooch hammii beehe.

⁸ Muusi ebi duukkaanooch bi hammiibeeti aabo bullin, asho bulli bi duukkaani duukkaanee kellooch kechii neexeechii, arooch bi giyimmi wottoon ciinnii beehe.

⁹ Muusi duukkaanooch bi giyimmona, giimboochoommon neexeebeeti qubo kindiꞌi duukkaanee kellooch neexee beehe; Doono Yeeriyoo Muusina tookkii yibbaatee beehe.

¹⁰ Asheenaꞌo duukkaanee kellooch giimboochoommon neexeebeeti quboon boonoshi beeggiyooba, bulliyona boonoshi duukkaani duukkaanee kellooch neexeechii goyinnee beeheete.

¹¹ Asho bi shunechona tookkii yibbaatoommon, Doono Yeeri Muusina tookkii baroona daneꞌi yibbaatee beehe. Aroochee Muusi bi hilla wottee kaambooch waa beehe; tunebaani Muusichi gaachoo tuneti gurimaashoo, Nuuni bushoo Yaasi duukkaanoochee barii ariyaanoone.

Bi Asheenaꞌona Tookki Tunemmo Bi Tunoon Doono Yeeri Gibenikkoo

¹² Muusiyoo Doono Yeerich ishichiye: “ ‘Hini asheenaꞌon yaabibe’ ito neene; tunebaani taanna tookki konin ne daachiyemmo gaata taach arichiyaano neene. Wotta ‘Neen, ne shigoona ariito taane; ta aafoochaa gidoon daneto neene’ ito neene.

¹³ Gidoon daneto ta tunegaata, neen ta ariyemmonaa ne aafoochaa gaawe aafoona ciiche ta beeyemmonoyich, and ne gommon taach ne bekkiyemmoyich neen qollehoye. Wotta hini aagetoo ne aagetoo bi tunoon gabibe” iye.

¹⁴ Doono Yeeriyoo “Ta neenna tookki hammemmo taane; neenoo kashiyemmo taane” iye.

¹⁵ Aroochee Muusi wochiꞌi, “Noonna tookki hamaachemmo ne tunegaata, hiniichee noon kichiyaahine.

¹⁶ Ne, noonna tookkii hamo qayigaata, taannaa ne asheenaꞌona ne aafoochaa gidoon dano amoona arichehe? Taannaa ne asheenaꞌona showee toommo bulliich beeti asheenaꞌo bulliyee barito no tuno bi aricheebeeto, ne, noonna tookkaa ne hamona toone?” iye.

¹⁷ Doono Yeeriyoo Muusich, “Ta aafoochaa gidoon ne danetoyich, wotta ne shigoona neen ta ariitoyich, ne echeti are mooyon tuniyemmo taane” iye.

¹⁸ Arooba Muusi, “Ne oogee yiiroon taach ne bekkiyemmoyich neen qollehoye” iye.

¹⁹ Doono Yeeriyoo ishichiye: “Ta gaawittino bulli ne aafoona bi beshemmoyich tuniyemmo taane; ne aafoochoo ta shigo Doono Yeerin awaajjemmo taane. Ariqqeya ta qaawiti ashoyich ariqqemmo taane; maariya ta qaawiti ashoonoo maaremmo taane.

²⁰ Tunebaani koniyoona taan beegiree kashoona beemon hakkaachemmo bi tunetoyich, taan aafoona ciinon hakkaachine” iye.

²¹ Aroochee Doono Yeeri ishichiye: “Xaqqee guudi toommooch ne neexemmi xaaꞌoo ta gaꞌooch beetone.

²² Ta oogee yiiroo beshe beetaa, neen xaqqee goggini daggooch geddemmo taane; aroona ta beshemmi wottoon, ta kishoona neen qeremmo taane.

²³ Aroochee ta kishoon tiijjemmo taane; ta gubboon beeggemmo neene; tunebaani ta aafoon beego hakkeyaanoone” iye.