Keyo 32 - Kafa Linguistics Project

Harooni Maanji Misiloon Aachoochee Shuuno

¹ Muusi wotteyaanoon, guudi toommooch bi yagoon boonoshi beeggiyooba, asheenaꞌo Haroon waan giddeꞌi ishichiyeete: “Tiyiree, no aafooch shiichi noon yaabemmi nuggisheenaꞌon nooch shuunebe. Gibitsee noon kichiti, are uro Muusi aabichii bi ito gaata ariyaano noone” iyeete.

² Harooniyoo boonoshich, “Ittoshi mecheenaꞌo, anaami bushiisheenaꞌonaa maache bushiisheenaꞌonochi waameexi aachoon kichiree taach deebote” iye.

³ Ebich asho bulli bi waameexi aachoon kichiꞌi, Haroonich deebii immiye.

⁴ Biyoo boonoshi immiton kicii daammii ukkiꞌi, shahalloon maamochi shaahoona shuunehe. Aroochee asheenaꞌo “Israꞌeelee ashoocho, Gibitsee neen kichiti nuggishoo hinine” iyeete.

⁵ Harooni ebin beeggiꞌi, aachoochee shuuneeti maamochi aafooch deejjee gudoon shuunehe. Biyoo “Yaach Doono Yeerich baaroo tunemmone” ii awaajjiye.

⁶ Asheenaꞌo dechara maaddoona tiyiꞌi, micciibeeti deejjoon deejjiyeete; ikkittinee deejjoonoo deejjiyeete; aroyee gubb, mamonaa uyonoyich koteheete; tekki kaayibee duubba tiyiyeete.

Doono Yeeri Kaaro

⁷ Arooba Doono Yeeri Muusich ishichiye: “Gibitsee ne kichiti ne asheenaꞌo duubetinaꞌone; ebich boonoshi waan kaateree hambe.

⁸ Boonoshich ta getteti getoochee kaatee shokiyeete; aachoon ukkiꞌi, shahalloon maamochi shaahoona boonoshi qellich shuuneheete; aroyichoo goyinnee, deejjoonoo biich deejjiꞌi, ‘Israꞌeelee ashoocho, Gibitsee neen kichiti nuggishoo hinine’ iyeete” iye.

⁹ Doono Yeeriyoo daakkiꞌi Muusich ishichiye: “Ebi asheenaꞌon beeggeto taane; boonoshiyoo babbereenaꞌone.

¹⁰ Eke ne qayaa, kupphe ta kaaroon boonoshi toommooch kindii aaxxiiree, boonoshin aalliibona. Aroochee neennaa ne shiijjereenaꞌonon oogeti aagetoon tuniyemmo taane” iye.

Muusi Corootiti Corooto

¹¹ Tunebaani Muusi bi Nuggishoo Doono Yeerichi ariqqoon qolleebee ishichiye: “Doono Yeero, ooge ne hakkoonaa giidechi ne mochoona Gibitsee ne kichiti, ne asheenaꞌo toommooch ebi shaahoon oogichaa amoyich kaarenne?

¹² Gibitseenaꞌo ‘Guudinaꞌo toommoochaa boonoshin wuxiya, showee toommoocheenoo boonoshin ciroona aalliiya gabiiniye, boonoshin bi kichito’ getiree, amoyich geteeta? Kupphe ne kaaroochee wottebe. Ne asheenaꞌo toommooch kindiiya ne gabiti mooyon qaye.

¹³ Ne guuninaꞌo Abrahamin, Yisaaqinaa Israꞌeelinon shalligibe. Boonoshich, ‘Ittoshi shiijjereenaꞌon shimaayeexi xojjenoochoommon meechemmo taane; imma ta gibenikkiti hini showoo bullin ittoshi shiijjereenaꞌoyich immemmo taane; bulli yemeenoon boonoshi hajjoo tunemmone’ iyaꞌa neenna ne wogeti wogoon shalligibe” iye.

¹⁴ Doono Yeeriyoo bi gaboon shaddiꞌi, bi asheenaꞌo toommooch deeba bi gabiti mooyon deebaanoon qajjiye.

Muusi Yalle Xaqqeenaꞌon Tiisho

¹⁵ Muusiyoo gutte yalle miixee xaqqeenaꞌon bi kishooch yechiꞌi, guudi toommoochee kindiye; ebi yalle xaqqeenaꞌo aafinaa gubbinon kooreetinaꞌone.

¹⁶ Boonoshiyoo Yeeri shuunetinaꞌone; ebi yalle xaqqeenaꞌo toommooch qiicii koorito, Yeerine.

¹⁷ Yaasi asheenaꞌo cookee qaaroon waayeꞌi Muusich, “Kaamboochee waayeebeeto, ginee koyee qaaroone” iye.

¹⁸ Muusiyoo “Ebi, kochii wochiꞌi wudoo danee qaaro toonoone; kocheꞌi gubb wottee qaaroo toonoone; shoddee qaarooniye ta waayaabeeto” iye.

¹⁹ Muusi kaambooch katinnii, ebi maamonaa capphii duubbiibeeti asheenaꞌonon beeggiꞌi, oogeton ippee shinehe; bi kishooch beeti yalle xaqqeenaꞌon, guudi baatoochaa ceqqeꞌi kewucciye.

²⁰ Boonoshi shuuneti maamon daammii qaaqqooch michiye; aroochee buddino bi tunemmi wottoon, yiikkehe; aroonoo aachi daggooch shacciye; Israꞌeeleenaꞌo uchemmoyichoo tuniihe.

Muusi Haroonin Kaaro

²¹ Aroochee Muusi Haroonin “Ebi shaahe magge axaaxoon boonoshi shuunemmoyich ne tuniito, ebi asheenaꞌo neen aabicheenane?” iye.

²² Harooniyoo wochiꞌi ishichiye: “Ta doonocho, ippeyaahine. Hini asheenaꞌo bulli aaboon gondo waan gaꞌeebeeti asheenaꞌo boonoshi tunoon ariibeeto neene.

²³ Boonoshiyoo, ‘No aafooch shiichi noon yaabemmi nuggisheenaꞌon nooch shuunebe. Gibitsee noon kichiti, are uro Muusi, aabichii bi ito gaata ariyaano noone’ iyeete.

²⁴ Ebich, ‘Aachee qiico bi waan beeto koniyoona kichibe’ iyoye. Aroochee aachoon taach immiyeete; tawoo qaaqqooch geddoye; ebina hini maanji misilo tunehe” iye.

Leweenaꞌo Meeti Asheenaꞌon Wuxoo

²⁵ Asheenaꞌo gawukkeenaꞌo boonoshi tunoon, Harooniyoo boonoshin boonoshi gaba gawukkito bi tunoonaa boonoshi etteenaꞌona cooqqireetinaꞌo boonoshi tunoonon Muusi beeggiye.

²⁶ Biyoo kaambooch giyeebeeti kellooch neexeechii, “Doono Yeericho tunetinaꞌote, ta waan wobote” ii cookiye. Leweenaꞌo bulli bi waan kiceeheete.

²⁷ Aroochee boonoshich, “Israꞌeelee Nuggishoo Doono Yeeri ishichitone: ‘Asho bi ikkikkoona bi goraadoon cuyebe. Kaambooch giyi, ikke kelloochee bare kellooch besheree, bi ikkikkoona bi manoon, bi addaaroonaa bi giyoonon wuxibe’ itone” iye.

²⁸ Leweenaꞌoo Muusi gettiton ceechiyeete; arooba asheenaꞌo daggoochee keejje hum bede asheenaꞌon wuxiyeete.

²⁹ Aroochee Muusi ishichiye: “Ittoshi anaami bushiisheenaꞌonaa ittoshi maneenaꞌonon wuxoona, Doono Yeerich maddoyich hanaach yaafeeto ittoshine; biyoo hanaach ittoshin diiritone” iye.

Muusi Wochinnoon Corootoo

³⁰ Dechara Muusi asheenaꞌoyich ishichiye: “Oogeti gonde axaaxoon shuuneto ittoshine. Tunebaani and Doono Yeer waan kechemmo taane; diqqich ittoshi axaaxoyich maaroon daniyemmo taane” iye.

³¹ Ebich Muusi Doono Yeer waan wottee hammiꞌi ishichiye: “Ebi asheenaꞌo magge axaaxoon shuunetinaꞌone. Aachoochee nuggishoon boonoshich shuunetinaꞌone.

³² Boonoshi axaaxoon ne maaremmoyich neen qollehoye. Ebi tuno qayigaata, ne kobereti macaafoochee ta shigoon hidibe” iye.

³³ Doono Yeeriyoo Muusich ishichiꞌi wochiye: “Taan xuqqitinaꞌoniye ta macaafoochee ta hidemmo.

³⁴ And hamiree, neech ta getteti xaaꞌooch asheenaꞌon yaabibe. Ta maraakoo ne aafooch hammemmone. Tunetaa ta naxemmi aabo shagiyooba, boonoshi axaaxoyich hini asheenaꞌon naxemmo taane” iye.

³⁵ Ebich Doono Yeeri asheenaꞌon naxoona yexxiye. Ebiyoo Harooni maamon bi shuunemmoyich boonoshi tuniitoyichiye.