Keyo 31 - Kafa Linguistics Project

Yeeri Betsaleelinaa Oholiyaabinon Kaaco

¹ Doono Yeeri Muusich ishichiye:

² “Yihudi yoodoochee tuneti Huuri bushoochi bushoo, Uriyichi bushoo Betsaleelin kaacceto taane.

³ Ta Ayaanoona bi ceennemmoyich tuniito taane; kishee shuunoo tuneti mooyo amoyichona hakkoon, ariyoonaa mulloonon biich immeto taane.

⁴ Ebiyoo ebi kishee shuunoon bi qoppemmoyich, aachoona, birewoonaa gooshoona shuuneebeeti qiiceenaꞌon bi shuunemmoyich,

⁵ qebbooch geddeyemmi aaxxe xaqqeenaꞌon bi qiicemmonaa mixon bi qiicemmonoyich, kishee shuunoo bullinoo bi shuunemmoyichiye.

⁶ Wotta biinna tookki bi shuunemmoyich, Daani yoodoochee tuneti Ahisamaakichi bushoo Oholiyaabin daakkaꞌa kaacceto taane. Ebiyoommon wotta neech ta getteto bullin boonoshi shuunemmoyich, kishee shuunee ariyechinaꞌo bullich hakkoon immeto taane.

⁷ Ebiyoo danee duukkaanoon, miixee taabootoonaa bi toommeexi, axaaxoon maariyee guufoonon, duukkaanee qiiceenaꞌo bullin,

⁸ ebiyoo madelloon bi qiiceenaꞌona tookki, xalle aachoochee shuuneeti aachee maqirajjoon bi qiico bullina tookki, ixaano shookkeebeeti deejjee gudoon,

⁹ micciibeeti deejjoo deejjeyemmi gudoon bi qiico bullina tookki, machee aaco koteebeeti gafetoon bi kotoona tookki,

¹⁰ gaawichaa shippeti taheenaꞌon, eboshiyoo Harooninaa bi anaami bushiisheenaꞌona qeesheenaꞌo tune maddebee boonoshi tahemmi yaafeeti taheenaꞌon,

¹¹ huutee zayitoonaa Yaafe Xaaꞌoyich tunemmi gaawe cinnechi ixaanoonon boonoshi shuunemmoyichiye. Neech ta gettetoommi gommona ebi bullin shuunebeete” iye.

Shambetee Aabo

¹² Aroochee Doono Yeeri Muusich ishichiye:

¹³ “Israꞌeeleenaꞌoyich ishichibe: ‘Doono Yeeri ta, ittoshin yaafiibeeto ta tunoon ittoshi ariyemmoyich, taannaa ittoshinochi daggooch, gubbi ittoshi shiijjeroo bulli daggoochoo malletoo bi tunetoyich, ta shambetoon quyebote.

¹⁴ “ ‘Ittoshich yaafoo bi tunetoyich, shambetee aaboon quyebote. Ebin shaaddemmo koniyoona qitibe. Arooba shuunoon shuunemmo koniyoona bi asheenaꞌo daggoochee kichaa yookkebe.

¹⁵ Shiritte qemon shuunoon shuunemmo ittoshine; tunebaani shabaattinnee qemo, kashe ittoshi heechemmi, Doono Yeeri taach yaafeeti shambetoone. Shambetee aabooba shuunoon shuunemmo koniyoona qitibe.

¹⁶ Israꞌeeleenaꞌo gubbi boonoshi shiijjereenaꞌo bulliich beddaahaa, bulli yemeenee wogoon tuniiree shambetoon quyebeete.

¹⁷ Taannaa Israꞌeeleenaꞌonochi daggooch bulli yemeenoon malletoo tunemmone. Ebiyoo Doono Yeeri ta, shimaayoonaa showoonon shiritte qemi daggooch shuunaꞌa, shabaattinnee qemooba ta shuunoochee ta kashetoyichiye’ gete” iye.

¹⁸ Doono Yeeri Siini guudi toommoochaa Muusina tookkii bi yibbaatoon bi ciichitoyee gubb, bi yapheroona kooreeti, gutte yalle miixee xaqqeenaꞌon Muusich immiye.