Keyo 30 - Kafa Linguistics Project

Ixaanee Deejjee Gudo

¹ “Ixaano shookkeyemmi deejjee gudoon geellee mixoochee shuunebe.

² Ebi gudo bi gidoo ikke hiroo, bi maaco ikke hiroo tunebe; awudde bi naaboo bulli tato tunebe; bi neexoo gutte hiroo tunebe. Ebi are deejjee gudee awudde shuutoona beeti qareenaꞌo tookkii ikkochee shuuneetinaꞌo tunebeete.

³ Bi toommon, bi awudde naaboonaa qareenaꞌonon xalle aachoona dikkebe. Bi guude gawe goconoo aachoona shuunebe.

⁴ Ebi are gocoyee desh, bi ikke baddi naaboonaa bare baddi naaboonooch, ebi ixaanee deejjee gudo shaaggeyemmi yareenaꞌo giyemmi, gutte aachee qalibetoon shuunebe.

⁵ Yareenaꞌon geellee mixoochee shuuneree, aachoona dikkebe.

⁶ Ebi deejjee gudoon neenna ta danaabeeti, axaaxoon maariyee guufo beeti, miixee taabootoyee aaf beeti maccillaatoyee maach kotiibe.

⁷ “Harooni ceecheenaꞌon bi qanniibeeti maaddi maaddoona, cinnechi ixaanoon ebi deejjee gudee toommooch shoohe;

⁸ ceecheenaꞌon bi aaxxiibeeti xumi xumoonoo ixaanoon shoohe. Ebiyoo, gubbi ittoshi shiijjeroo bulliich beddaahaa, ixaano Doono Yeeri ta aafooch bulli aaboon bi cufemmoyichiye.

⁹ Ebi deejjee gudee toommoochaa gidd bedaani ixaanoon woyee micciibeeti deejjoon woyee maayi deejjoon deejjiyaahine. Uyee deejjoonoo aree toommooch ukkiyaahine.

¹⁰ Harooni natooch ikke wottoon axaaxoon maariyoyich deejjeeti gijjee damoochee daami, ixaanee deejjee gudee awudde qareenaꞌooch huute. Nati natona ebi axaaxoon maariyee deejjee doyoo gubbi ittoshi shiijjeroo bulliich beddaahaa, tunebe. Ebi ixaanee deejjee gudo Doono Yeeri taach oogeti yaafoone” iye.

Danee Duukkaanoyich Qocheebeeti Gijjoo

¹¹ Aroochee Doono Yeeri Muusich ishichiye:

¹² “Israꞌeeleenaꞌon ne haddiyooba, asho bi ikkikkoona bi kashoyich biisho tunemmi biishee gijjoon Doono Yeerich qoce. Ebiyoo boonoshin ne haddiyooba, naxo boonoshi toommooch bi shagaachemmoyichiye.

¹³ Haddee daggooch giyiti asho koniyoona yaafee kechi machoona qocceti sheqeelee qachi birewoon imbe. Ikke sheqeelo aaraa gutte giraam bedoone. Ebi birewoo Doono Yeeri taach giddemmi deejjoone.

¹⁴ Hiye natonaa hiye natoyee damboona tuneꞌi haddee daggooch giyito bulli, Doono Yeeri taach ebi deejjoon giddiibe.

¹⁵ Ittoshi kashoon biishoyich deejjoon ittoshi giddiibeeti aabooba, gaannecho ebi gijjoyee beshoon, girechoo ebi gijjoyee shappoon immaaye.

¹⁶ Axaaxoon maariibeeti gijjoon Israꞌeeleenaꞌo waanee deꞌiree danee duukkaanee maddee shuunooch heechiibe. Doono Yeeri ta aafooch Israꞌeeleenaꞌoyich boonoshi axaaxoon maariyoyich shalligichoo tunemmone” iye.

Gooshee Gafeto

¹⁷ Doono Yeeri Muusich ishichiye:

¹⁸ “Machee aaco koteebeeti gafetoon bi kotoona tookki gooshoochee shuunebe. Danee duukkaanoonaa deejjee gudoonochi gutte daggooch kotiibe. Aroochoo aacon gede.

¹⁹ Harooninaa bi anaami bushiisheenaꞌona ebi gafetooch beeti aacoochee kitiree, boonoshi kishoonaa boonoshi baatoonon machebeete.

²⁰ Danee duukkaanooch boonoshi giyimmi aabo bullin woyee Doono Yeeri taach, qaaqqoona micciibeeti deejjoon giddiyoona maddoyich deejjee gudooch boonoshi giddemmi aabo bullin, boonoshi qitaachemmoyich, ebi aacona machebeete.

²¹ Boonoshi qitaachemmoyich, boonoshi kishoonaa boonoshi baatoonon machebeete. Ebiyoo Harooninaa gubbi bi shiijjeroo bullinoyich bulli yemeenee qociyoon tunebe” iye.

Yaafeeti Huutee Zayito

²² Doono Yeeri Muusich ishichiye:

²³ “Beshe gaawe cinnechi qimaameenaꞌon, eboshiyoo, uuche balle sheqeelee nagaani hareboon, gutte ballaa aache sheqeelee gaawe cinnechi qarefoon, gutte ballaa aache sheqeelee gaawe cinnechi toochoonaa

²⁴ uuche balle sheqeelee birguudoonon deebe. Eboshi bulli yaafee kechi machoona qocaa tato tunebeete. Arooch awudde neetiree zayitoon daakkiree,

²⁵ ariyechi asheenaꞌo shuunetoommi, yaafeeti cinnechi huutee zayitoon tuniibe. Yaafeeti huutee zayito tunemmone.

²⁶ Aroochee danee duukkaanoon, miixee taabootoon,

²⁷ madelloonaa bi qiiceenaꞌo bullinon, maqirajjoonaa bi qiiceenaꞌonon, ixaanee deejjee gudoon,

²⁸ micciibeeti deejjoo giddeebeeti deejjee gudoonaa bi qiiceenaꞌo bullinon, ebiyoommon machee aaco koteebeeti gafetoon bi kotoona tookki ebi zayitoona huute.

²⁹ Oogeton yaafeetinaꞌo boonoshi tunemmoyich, yaafibe. Boonoshi achooch shaggimmo, asho tuneba amee mooyolla, yaafeeton tunemmone.

³⁰ “Qeesheenaꞌo tuneree taach boonoshi maddemmoyich, Harooninaa bi anaami bushiisheenaꞌonon zayitoona huute. Yaafishoo gete.

³¹ Israꞌeeleenaꞌoyich ishichi gete: Gubbi ittoshi shiijjeroo bulliich beddaahaa, ebi taach yaafeeti huutee zayito tunemmone.

³² Asho konichi ashittinoocholla huuttaahote. Ebi zayito shuuneetoommi gommona amee zayitoonona shuuneyaahote; yaafeetone; yaafeeton tuniiree ciinote.

³³ Shaahii shuunemmo woyee qeesheenaꞌoyee besh bare ashi ashittinooch huuttimmo koniyoona bi asheenaꞌo daggoochee kichaa yookkebe” iye.

Cinnechi Ixaanoon Qanniyoo

³⁴ Doono Yeeri Muusich ishichiye: “Tachaa bacceeti gaawe cinnechi qimaameenaꞌon, eboshiyoo, mixoochee cottiibeeti shittoon, woongee (yaahee) daggoochee daneebeeti shittoon, macwollaggoon shaahiibeeti mixoochee kechiibeeti shittoonaa xalle ixaanoonon daamiree,

³⁵ ariyecho shuunetoommi, gaawe cinnechi ixaanoon qanniibe. Kiiho baccaa shuuneeto, xalloonaa yaafeetona tunebe.

³⁶ Ebi aroochee giishechoon koyi buddino tunii qacichiree, danee duukkaanee miixee taabootee aafooch, neenna ta danemmi xaaꞌooch, kotiibe. Ittoshich oogeton yaafeeto tunemmone.

³⁷ Ittoshi qellich ebiyoommi gommona amee ixaanoonolla shuuneyaahote. Doono Yeeri taach yaafeeton tuniiree ciinote.

³⁸ Gaaweti bi cinnoona emiroyich, ebin shaahiiꞌi shuunemmo koniyoona bi asheenaꞌo daggoochee kichaa yookkebe” iye.