Keyo 29 - Kafa Linguistics Project

Qeesheenaꞌo Yaafeyoo

¹ “Harooninaa bi anaami bushiisheenaꞌona qeesheenaꞌo tuneree taach boonoshi maddemmoyich, bariiꞌi yaafoyich ne tuniyemmo ebine: Bachaallo tuneti ikke wuronaa gutte bagee baaddoonon deebe.

² Shittoo giyaani qacini teepphee buddinee koshoochee, zayitoona xiriꞌaa kachiti koshon, zayito giyaani koshonaa shishiitaa kachiichii zayito huutteti koshonon qanniibe. Ebi kosho bulli shittoo giyaano tunebe.

³ Eboshi bullin gemooch gediree, wuronaa gutte bagee baaddoona tookki taach giddiibe.

⁴ Aroochee Harooninaa bi anaami bushiisheenaꞌonon danee duukkaanee kellooch daamiree, boonoshi qeddoon maye.

⁵ Taheenaꞌon daamiree, Haroonich tajjibe. Kittoon, efoodee dechiich tunemmi qamisoon, efoodoonaa geteexi kiisoonon tajjibe. Aroochee malletiitaa shippeti efoodee cuyoona cuye.

⁶ Qelli caacoon bi qellooch caaciree, yaafeeti gubbichoon qelli caacoona tookki yeshiibe.

⁷ Huutee zayitoon daamiree, ta shuunoyich bi baremmoyich bi shimbooch ukkiree huute.

⁸ Aroochee Harooni anaami bushiisheenaꞌon deebiree, kittoon tajjibe.

⁹ Buroon boonoshi maacooch cuye. Aroochee qelli caacoon boonoshi qellooch caace. Ebiyoommi gommona Harooninaa bi anaami bushiisheenaꞌonon qeesheenaꞌo boonoshi tunemmoyich yaafemmo neene. Ebina boonoshinaa gubbi boonoshi shiijjereenaꞌona qeeshoon tuneree, bulli yemeenoon taach maddemminaꞌone.

¹⁰ “Wuron danee duukkaanee aafooch deebe. Harooninaa bi anaami bushiisheenaꞌona boonoshi kishoon are wurochi qellooch kotiibeete.

¹¹ Danee duukkaanee kellooch Doono Yeeri ta aafoochaa guuribe.

¹² Wurochi damoochee daamiree, ne yapheroona deejjee gudee qareenaꞌooch huute. Echeti damoon deejjee gudee baatooch ukkibe.

¹³ Aroochee maacee meechi toommooch beeti awuyo bullin, qamee deshi qati kuxonaa gutte yeyitoonon, bi guudoona beeti awuyona tookki daami, deejjee gudee toommoochaa michibe.

¹⁴ Tunebaani wurochi meenonaa bi gooqqoonon, maacee meenonaa haamboonon kaamboyee maach kichi goge. Aroo axaaxoon maariyee deejjoone.

¹⁵ “Aroochee gutte bagee baaddoochee ikkoon deebe. Harooninaa bi anaami bushiisheenaꞌona boonoshi kishoon bi qellooch kotiibeete.

¹⁶ Ebi bagee baaddoon guuribe. Damoonoo deejjee gudee guudoona awudde gocooch tibibe.

¹⁷ Bagee baaddoochi meenon quumi quumoona kapphe kichiree, deejjee gudee toommooch gede. Maacee meenonaa baateenaꞌonon mayiree, qelloonaa kappheeti meenonochi toommooch gede.

¹⁸ Aroochee bagee baaddoochi meeno bullin goge. Ebiyoo Doono Yeeri taach micciibeeti deejjoone. Ebi deejjoo Doono Yeeri taach qaaqqoona micciibeeti deejjoone; taach gaawe cinnechone.

¹⁹ “Guttinnee bagee baaddoon deebe. Harooninaa bi anaami bushiisheenaꞌona boonoshi kishoon bi qellooch kotiibeete.

²⁰ Ebi bagee baaddoon guuribe. Damoochee daamiree, Harooninaa bi anaami bushiisheenaꞌonochi qanne waajji dechi caappooch, boonoshi qanne kishee indechoonaa boonoshi qanne baatee indechoonooch huute. Aroochee echeti damoon deejjee gudee guudoona awudde gocooch tibibe.

²¹ Deejjee gudee toommooch beeti, echeti damoonaa huutee zayitoonoochee daamiree, Harooninaa bi tahoonooch, ebiyoommon bi anaami bushiisheenaꞌonaa boonoshi tahoonooch wucibe. Ebina Harooninaa bi anaami bushiisheenaꞌona, wotta boonoshi tahoo yaafeeto tunemmone.

²² “Ebi bagee baaddoo qeesheenaꞌon ukkiriyee baaree bago bi tunetoyich, bi awuyon, bi naatoon, bi maacee meechi toommooch beeti awuyon, bi qamee deshi qati kuxon, gutte bi yeyitoonaa bi guudoona beeti awuyonon, bi qanne baatee galloonoo maaci kichibe.

²³ Doono Yeeri ta aafooch gemoona beeti, shittoo giyaanoon kachiti koshoochee, zayitoona xiriꞌaa kachiti koshoochee ikkoon, zayito giyaani koshoochee ikkoon, wotta shishiitaa kachiichii zayito huutteti koshoochee ikkoon tiijji daambe.

²⁴ Eboshi bullin Harooninaa bi anaami bushiisheenaꞌonochi kishooch gede. Doono Yeeri ta aafooch kaama tiijjaa giddeebeeti deejjoon tuniiree giddiibeete.

²⁵ Aroochee boonoshi kishoochee deꞌiree, micciibeeti deejjoona tookki Doono Yeeri taach gaawe cinnecho bi tunemmoyich, deejjee gudee toommoochaa michibe. Ebiyoo Doono Yeeri taach qaaqqoona micciibeeti deejjoone.

²⁶ Harooni qeeshoo tunee baaroyich basheeti guttinnee bagee baaddoochi gaggimatoon daamiree, Doono Yeeri ta aafooch kaama tiijjaa giddeebeeti deejjoon tuniiree giddiibe. Ebiyoo neech ichemmi, ne qoodoone.

²⁷ “Qeesheenaꞌon ukkiriyee baaree bagee baaddoochi gutte quumoon yaafibe. Eboshiyoo Doono Yeeri ta aafooch kaama tiijjaa giddeebeeti deejjoon tuniyaꞌa ne tiijjiti, taach bariti gaggimatoonaa galloonane. Ebi gaggimatoonaa galloona Harooninaa bi anaami bushiisheenaꞌonochi qoodoone.

²⁸ Gubbich Israꞌeeleenaꞌo ikkittinee deejjoon taach boonoshi giddiihooba, ta aafooch boonoshi tiijjemmi, ebi gaggimatoonaa gubbi baatee galloona qeesheenaꞌochi qoodoone. Ebiyoo Harooninaa gubbi bi shiijjereenaꞌonoyich bulli yemeenee doyoo tunemmone. Ebiyoo Israꞌeeleenaꞌo Doono Yeeri taach boonoshi giddiyemmi deejjoone.

²⁹ “Haroonichi yaafeeti taheenaꞌo bi shiijjereenaꞌoyich guuddemminaꞌone; boonoshiyoo ebi taheenaꞌon taheree, zayito boonoshi shimbooch huutaa, qeeshee guudoon tuneree maddoyich yaafeyemminaꞌone.

³⁰ Haroonichi keroyich qeeshee guudoon tunemmi bi bushoo yaafeeꞌi, Yaafe Xaaꞌoochaa maddeya danee duukkaanooch bi giyiyooba, shabaatte qemon ebi taheenaꞌon tahebe.

³¹ “Harooninaa bi bushiisheenaꞌonon qeesheenaꞌo tunii ukkiriyee baaree bagee baaddoochi meenon daamiree yaafoo tuneti xaaꞌoochaa kiiye.

³² Harooninaa bi anaami bushiisheenaꞌona danee duukkaanee kelloochaa, ebi bagee baaddoochi meenonaa gemooch geddeti koshonon mameete;

³³ qeesheenaꞌo tunee baaroo bi tunemmonaa boonoshin bi yaafemmonoyich, boonoshi axaaxoon maariiti deejjee maayoon mameete. Tunebaani taach yaafeeto bi tunetoyich, baroo koniyoona maayaaye.

³⁴ Meenoochee tuneba koshoochee, maataa echee qeyito bi beegaata, yaafeeto bi tunetoyich michibani, koniyoona maayaaye.

³⁵ “Neech ta gettetoommon, Harooninaa bi anaami bushiisheenaꞌonoyich tuniibe. Qeesheenaꞌo yaafeyee baarooba, shabaatte qemi wottoon qemi qemona ebin tuniibe.

³⁶ Boonoshi axaaxoon maariyee deejjoyich qemi qemona ikke wuron taach giddii deejjibe. Ebi aroona deejjee gudoon xalliibe. Yaafeeto bi tunemmoyich, zayitoon huute.

³⁷ Ebinoo shabaatte qemi wottoon qemi qemona tuniibe. Ebina deejjee gudo oogeton yaafeeto tunemmone; bi achooch shaggimmo, asho tuneba amee mooyolla, yaafeeton tunemmone.

Yeerich Qemi Qemona Giddeebeeti Deejjeenaꞌo

³⁸ “Gubbich, qemi qemona kuxaanoon deejjee gudee toommoochaa ikke nati gutte gishiishi bagee baaddoon deejjibe.

³⁹ Ikkoon maaddoona, ikkoonoo womikka deejjibe.

⁴⁰ Batti batti bagee baaddoona tookki gutte kobbaye qacini teepphee buddinoon, ikke neetiree gaawe zayitoona xiriꞌiree giddiibe. Wotta deejjoo tuniiree ikke neetiree woyinee uyoonoo ukkibe.

⁴¹ Guttinnee bagee baaddoon, maadda ne tuniitoommon, womikka maayoonaa uyee deejjoona tookki deejjibe. Ebiyoo gaawe cinnecho bi tunemmoyich, Doono Yeeri taach qaaqqoona micciibeeti deejjoone.

⁴² “Qemi qemona, gubbi ittoshi shiijjeroo bulliich beddaahaa, ebi micciibeeti deejjoo Doono Yeeri ta aafooch, danee duukkaanee kellooch, giddebe. Tawoo aroochaa ittoshina danemmo taane; neennoo yibbaatemmo taane.

⁴³ Aroochaanoo Israꞌeeleenaꞌona danemmo taane; ebi xaaꞌoonoo ta oogee yiiroona yaafemmo taane.

⁴⁴ “Ebina danee duukkaanoonaa deejjee gudoonon yaafemmo taane; wotta qeesheenaꞌo tuneree taach boonoshi maddemmoyich, Harooninaa bi anaami bushiisheenaꞌonon yaafemmo taane.

⁴⁵ Israꞌeeleenaꞌo daggooch beeyemmo taane; boonoshi Nuggishoonoo tunemmo taane.

⁴⁶ Boonoshi daggooch beemoyich, Gibitsee boonoshin kichiti boonoshi Nuggishoo Doono Yeeri ta tunoon ariyemminaꞌone. Ta, boonoshi Nuggishoo Doono Yeeri taane.