Keyo 28 - Kafa Linguistics Project

Qeesheenaꞌoyich Tunemmi Taheenaꞌo

¹ “Qeesheenaꞌo tuneree taach boonoshi maddemmoyich, Israꞌeeleenaꞌo daggoochee ne manoo Haroonin, bi anaami bushiisheenaꞌo Nadaabin, Abiihin, Elazaarinaa Itamaarinon ne waan boonoshi giddemmoyich tuniibe.

² Ne manoo Haroonich oogee yiiroon immiibeeti, malletecho tuneti yaafeeti tahoon shuunebe.

³ Bariti hakkoo boonoshich bi beeyemmoyich ta tuniiti, kishee shuunee ariyechi asho bullin ceegiree, Harooni qeeshoo tuneree taach maddeya bi yaafeyemmoyich, ebi tahoon boonoshi shuunemmoyich gete.

⁴ Boonoshi shuunemmi taheenaꞌo eboshine: geteexi kiiso, efoodo, qamiso, shashiitaa shuuneeti kittoo, qelli caacoonaa buroonane. Ne manoo Harooninaa bi anaami bushiisheenaꞌona qeesheenaꞌo tuneree taach boonoshi maddemmoyich, yaafeeti taheenaꞌon boonoshich shuunebeete.

⁵ Ebi kishee shuunee ariyechinaꞌo aachee woshiqoona, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona shifeete.

Efoodo

⁶ “Efoodoon aachee woshiqoona, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona malletiitaa shippeti qoreddoochee shuunebeete.

⁷ Aafinaa gubbinon yeshiyoyich, gutte gogee toommeexi kaꞌecho tunebe.

⁸ Efoodee cuyoon aachee woshiqoona, shimaayito, dameroonaa ceelloona tuneti woshiqoona, wotta muttee tuppoochee ciciitaa yokkeeti woshiqoona malletii shifiree, efoodoona tookki ikke shaahoo tuniiree xaaqqibeete.

⁹ “Gutta shohaamee aaxxe xaqqoon daamiree, Israꞌeelee yoodeenaꞌochi shigoon qiici kooribe.

¹⁰ Boonoshi shiijjee yaaroommona shiritte shigoon ikkinnee xaqqooch, echeti shiritte shigoon guttinnee xaqqooch qiici kooribe.

¹¹ Qiicii shuunoon ariibeeti asho maatemoon bi qiicoommon, Israꞌeelee yoodeenaꞌochi shigoon ebi gutte xaqqee toommooch qiiciree kooribe. Aroochee ebi xaqqeenaꞌon aachee qebbooch gede.

¹² Israꞌeelee yoodeenaꞌochi shalligichee xaqqeenaꞌo boonoshi tunemmoyich, ebi gutte aaxxe xaqqeenaꞌon gutte gogee toommeexi, efoodee kaꞌeenaꞌona tookki yeshiibe. Doono Yeeri ta aafooch shalligichoo tunemmi, ebi shigeenaꞌon Harooni bi gogooch shaage.

¹³ Aachoochee gutte qebboon shuunebe.

¹⁴ Woderoochoommon yokkeeti, gutte tifoon xalle aachoochee shuuneree, qebboona tookki yeshiibe.

Geteexi Kiiso

¹⁵ “Yeerichi daaggoo echeebeeti, geteexi kiisoon efoodoochoommon, aachee woshiqoona, shimaayito, dameroonaa ceelloona tuneti, muttee tuppoochee ciciitaa yokkeeti woshiqoona malletiitaa shippeti qoreddoochee shuunebe.

¹⁶ Xappaa qoddeto tuneechi, bi neexo ikke ciixo, bi maaco ikke ciixo, awudde bi naaboo tato tunebe.

¹⁷ Aroochee bi toommooch awudde yaaroona aaxxe xaqqeenaꞌon gede. Ikkinnee yaarooch saridiyoonoon, topphaziyoonoonaa garineetoonon,

¹⁸ guttinnee yaarooch maarigidoon, sapiiroonaa almaazoonon,

¹⁹ keejjinnee yaarooch yaakintoon, ageetoonaa amexoosoonon,

²⁰ awuddinnee yaarooch beruulloon, shohaamoonaa yasphiidoonon gede. Eboshi bullin aachee qebbeenaꞌooch gede.

²¹ Ebi aaraa gutte xaqqo boonoshi ikkikkoo toommooch, ikke Israꞌeelee yoodee shigo tuniitaa, aaraa gutte Israꞌeelee yoodeenaꞌochi shigo maatemoochoommon qiiceeto tunebe.

²² “Geteexi kiisoyich woderoochoommon yokkeeti tifeenaꞌon xalle aachoochee shuunebe.

²³ Gutte qalibetoon aachoochee shuuneree, geteexi kiisee damba qachi gutte gocona tookki yeshiibe.

²⁴ Ebi aachoochee shuuneeti gutte tifoon geteexi kiisee damba qachi, gutte goceexi qalibeteenaꞌona tookki yeshiibe.

²⁵ Bare gutte tifee cilleenaꞌon aaf beeti efoodee gogee toommeexi kaꞌeenaꞌo toommooch beeti, aachee gutte qebbeenaꞌona tookki yeshiibe.

²⁶ Gutte aachee qalibetoon shuuneree, efoodee gaꞌooch beeti, geteexi kiisee deshi gutte gocona maacaa yeshiibe.

²⁷ Bare gutte aachee qalibetoon shuuneree, malletiitaa shippeti efoodee buroo beetoyee damba qach, efoodee aaf beeti, toommeexi gogee kaꞌeenaꞌochi deshi qachaa yeshiibe.

²⁸ Geteexi kiiso malletiitaa shippeti, efoodee buree toommooch bi tunemmoyich, wotta efoodoochee bi muricaachemmoyich, geteexi kiisee qalibeteenaꞌon efoodee qalibeteenaꞌona tookki xaaqqiree, shimaayite yokkoona cuye.

²⁹ “Harooni Yaafe Xaaꞌooch bi giyiyooba, Doono Yeeri ta daaggoo echeebeeti, geteexi kiisooch beeti, Israꞌeelee yoodeenaꞌochi shigoon bi mullee kaamooch tuniibe. Ebina Doono Yeeri ta, ta asheenaꞌon bulli aaboon shalligemmo taane.

³⁰ Doono Yeeri ta aafooch bi giddeebeeti aabo bulliich, Harooni mullee kaamooch boonoshi tunemmoyich, Uriimoonaa Tumiimoonon bi geteexi kiisooch gede. Ebina Harooni ta daaggoo echeebeeti, geteexi kiisoon Doono Yeeri ta aafooch bulli aaboon shaage.

Qamiso

³¹ “Wotta efoodee dechiich taheyemmi qamisoon shimaayite woshiqoochee baach shippeti qoreddoochee shuunebe.

³² Qello giyemmi qettoon kichibe. Bi keexeyaachemmoyich, qettee guudoon shippeti qoreddoona xappiree koye.

³³ Qamisee baata ciiroochaa guude gawoon shimaayito, dameroonaa ceelloona tuneti woshiqoona romaanee michi aafoommi mooyinaꞌon shashiiree shife. Eboshi dagg daggooch beshii beshii, aachoochee shuuneeti qaaxilleenaꞌon shuye.

³⁴ Ebina qamisee baata ciireexi guude gawooch, aachoochee shuuneeti qaaxilleenaꞌonaa romaanee michi aafoommi mooyinaꞌona shaaddii shaaddiitaa tunemminaꞌone.

³⁵ Harooni maddoyich bi giyimmi aabo bullin, ebi qamisoon tahebe. Tahaꞌi, Yaafe Xaaꞌooch Doono Yeeri ta aafooch bi giyii beehoobinaa bi kechii beehoobina, qaaxillee qaaro waayeyemmone; biyoo qitaachemmone.

Qelli Caacoonaa Kittoona

³⁶ “Xalle aachoochee ikke shashoon shuunebe. Bi toommooch ‘Doono Yeerich Yaafeeto’ ii beeton maatemoochoommon qiici kooribe.

³⁷ Qelli caacoona tookki shimaayite yokkoona cuye. Ebi aroon qelli caacee aafaa tuniibe.

³⁸ Ebinoo Harooni bi barooch gede. Israꞌeeleenaꞌo bariiꞌi boonoshi immiibeeti wojjoon, ebiyoo yaafeeti deejjoon giddiibee boonoshi xuqqiti amee xuꞌoonona shaaggemmone. Doono Yeeri ta, ebi deejjoon gaawe aafoona ta ciinnemmoyich, bulli aaboon Harooni barooch beebe.

³⁹ “Kittoonaa qelli caacoonon muttee tuppoochee ciciitaa yokkeeti woshiqoona shippeti qoreddoochee shuunebe. Buroo shashiitaa shippeto tunebe.

Bare Taheenaꞌo

⁴⁰ “Harooni anaami bushiisheenaꞌoyich oogee yiiroonaa malletoonon bi immemmoyich, kitteenaꞌon, bureenaꞌonaa qelli caaceenaꞌonon shuunebe.

⁴¹ Ebi taheenaꞌon ne manoo Harooninaa bi anaami bushiisheenaꞌonoyich ne tajjitoyee gubb, zayitoon boonoshi shimbooch huutiree, qeesheenaꞌon tuniibe. Qeesheenaꞌo tuneree taach boonoshi maddemmoyich, yaafibe.

⁴² “Shimetoochee doshooch beddemmi, ashittinoon qeremmi qamini maaci shuroon muttee tuppoochee ciciitaa yokkeeti woshiqoona shippeti qoreddoochee boonoshich shuunebe.

⁴³ Harooninaa bi anaami bushiisheenaꞌona danee duukkaanooch boonoshi giyimmi aaboon woyee Yaafe Xaaꞌoochaa maddeya deejjee gudooch boonoshi giddemmi aaboon, xuꞌoon shuuneree boonoshi qitaachemmoyich, ebi shuroon eddebeete. “Harooninaa gubbi bi shiijjereenaꞌonoyich ebi bulli yemeenee doyoo tunemmone.