Keyo 27 - Kafa Linguistics Project

Deejjee Gudo

¹ “Deejjee gudoon geellee mixoochee shuunebe. Ebi deejjee gudo bi gidoo uuche hiroo, bi maaco uuche hiroo, bi neexoo keejje hiroo tuneechi, awudde bi naaboo tato tunebe.

² Bi awudde shuutoona qareenaꞌon shuunebe. Ebi qareenaꞌo deejjee gudoona tookki ikkochee shuuneetinaꞌo tunebeete. Deejjee gudo bullin gooshoona dikkebe.

³ Tulloo booddeebeeti gubeenaꞌon, tulloo ucheebeeti maankeenaꞌon, quppe saaneenaꞌon, gomeenaꞌonaa qaaqqee buno yecheyemmi qiiceenaꞌonon, gooshoochee shuunebe.

⁴ Dabboommi mooyon gooshoochee shuunebe. Ebi dabbee awudde shuutooch yareenaꞌo giyemmi awudde qalibetoon gooshoochee shuunebe.

⁵ Ebi dabbo deejjee gudee gitooch beddaahaa bi shaggemmoyich, deejjee gudee degooch, noonoyee desh tuniibe.

⁶ Deejjee gudoyich yareenaꞌon geellee mixoochee shuuneree, boonoshin gooshoona dikkebe.

⁷ Deejjee gudo shaaggeyemmi ebi yareenaꞌon deejjee gudee gutte naabeexi qalibeteenaꞌochi aahoona giijjibe.

⁸ Deejjee gudoon maacaa aaho tuniiree, shaaqqoona shuunebe. Guudi toommoochaa neech ta bekkiitoommi gommona tuniiree shuunebe.

Yaafee Duukkaanee Addibaaboo

⁹ “Yaafee duukkaanee addibaaboon shuunebe. Deshi-waan beeti, addibaabee gidoyich balle hiroo tuneti, muttee tuppoochee ciciitaa yokkeeti woshiqoona shippeti qoreddoochee shuuneeti maccillaateenaꞌo tunebeete.

¹⁰ Boonoshin tuuggemmi hiye giimbeenaꞌonaa ebi giimbeenaꞌochi hiye baateenaꞌona gooshoochee shuuneetinaꞌo tunebeete; tunebaani ebi giimbeenaꞌo toommooch tunemmi kaꞌeenaꞌonaa yaabeenaꞌona birewoochee shuuneetinaꞌo tunebeete.

¹¹ Ebiyoommon wotta dambi-waan beeti addibaabee gidoyich balle hiroo tuneti maccillaateenaꞌo tunebeete. Boonoshin tuuggemmi hiye giimbeenaꞌonaa ebi giimbeenaꞌochi hiye baateenaꞌona gooshoochee shuuneetinaꞌo tunebeete; wotta ebi giimbeenaꞌo toommooch tunemmi kaꞌeenaꞌonaa yaabeenaꞌona birewoochee shuuneetinaꞌo tunebeete.

¹² “Aabi-gimo waan beeti addibaabee gidoyich aache hire maccillaateenaꞌo tunebeete. Boonoshin tuuggemmi aashire giimbeenaꞌonaa ebi giimbeenaꞌoyich aashire baateenaꞌona beebeete.

¹³ Aabi-keyo waan beeti addibaabee gidoo andoo aache hiroo tunebe.

¹⁴ Ikke baddaa, kelloochee tiijjiree, aaraa uuche hire maccillaateenaꞌo tunebeete; boonoshin tuuggemmi keejje giimbeenaꞌonaa ebi giimbeenaꞌoyich keejje baateenaꞌona beebeete.

¹⁵ Bare baddaa, kelloochee tiijjiree, aaraa uuche hire maccillaateenaꞌo tunebeete; boonoshin tuuggemmi keejje giimbeenaꞌonaa ebi giimbeenaꞌoyich keejje baateenaꞌona beebeete.

¹⁶ “Addibaabooch giyeebeeti kelloyich shimaayito, dameroonaa ceelloona tuneti, muttee tuppoochee ciciitaa yokkeeti woshiqoona shippeti qoreddoochee shuuneeti hiye hire maccillaatoo tunebe. Bi toommoochoo shashiitaa shippeto tunebe. Ebi maccillaatoyich awudde giimbeenaꞌonaa ebi are giimbeenaꞌoyich tunemmi awudde baateenaꞌona beebeete.

¹⁷ Addibaabee guudooch beeti giimbeenaꞌo bullich birewoochee shuuneeti yaabeenaꞌo, birewoochee shuuneeti kaꞌeenaꞌonaa gooshoochee shuuneeti baateenaꞌona beebeete.

¹⁸ Addibaabee uxeree gidoo balle hiroo, bi maaco aache hiroo, bi neexo uuche hiroo tunebe; ebi addibaabee uxeroyich muttee tuppoochee ciciitaa yokkeeti woshiqoona shippeti maccillaateenaꞌonaa gooshoochee shuuneeti baateenaꞌona beebeete.

¹⁹ Yaafee duukkaanoyich tunemmi qiico bulli, duukkaanee xogoo bullinaa addibaabee uxeree xogoo bullina gooshoochee shuuneeto tunebe.

Ceechee Zayito

²⁰ “Ceechoo kuxeyaanoon bi aaxxemmoyich tuniyemmi, zayitee michi aafoochee bottetee teegeeti, gaawe ceechee zayitoon boonoshi deebemmoyich, Israꞌeelee asheenaꞌoyich gete.

²¹ Danee duukkaanee daggooch, taabootoon bariibeeti maccillaatoyee maach, Harooninaa bi anaami bushiisheenaꞌona Doono Yeeri ta aafooch ceechoo xumoochee harooch beddaahaa bi aaxxemmoyich tuniiree quyebeete. Ebiyoo Israꞌeeleenaꞌoyich shiijjeroochee shiijjerooch, bulli yemeenee doyoo tunebe.