Keyo 25 - Kafa Linguistics Project

Yaafee Duukkaanoon Shuunoyich Giddemmi Wojjoo

¹ Doono Yeeri Muusich ishichiye:

² “Wojjoon taach boonoshi deebemmoyich, Israꞌeeleenaꞌoyich gete. Mulloochee tiijjiꞌi imma qaawiti asho bulli waanee wojjoon deꞌe.

³ Boonoshi waanee ne deqqemmi wojjeenaꞌo eboshine: aachoo; birewoo; gooshoo;

⁴ shimaayito, dameroonaa ceelloona tuneti woshiqoo; muttee tuppoochee shippeti qoreddoo; emmishee eexoochee shippeti qoreddoo;

⁵ qucaa shuuneeti, bagee baaddoochi gooqqo; gaawichaa qucheti bare gijjee gooqqo; geellee mixo;

⁶ ceechoyich tunemmi zayito; huutee zayitoonaa cinnechi ixaanoonoyich tunemmi qimaamo;

⁷ qeeshee guudoochi efoodoonaa geteexi kiisoonochi toommooch geddeyemmi aaxxe xaqqeenaꞌo, eboshiyoo shohaamo getteebeeti aaxxe xaqqoonaa bare aaxxe xaqqeenaꞌonane.

⁸ “Boonoshi daggooch ta beeyemmoyich, yaafee duukkaanoon taach boonoshi shuunemmoyich tuniibe.

⁹ Yaafee duukkaanoonaa bi daggooch beeti qiico bullinon neech ta bekkiimmi gommona shuunebote.

Wogee Taabooto

¹⁰ “Taabootoon geellee mixoochee boonoshi shuunemmoyich tuniibe. Ebi taabootoo bi gidoo gutte hiraa qato, bi maaco ikke hiraa qato, bi neexoo ikke hiraa qato tunebe.

¹¹ Bi maacinaa maachinon xalle aachoona dikkebe. Bi guude gawe goconoo aachoona shuunebe.

¹² Awudde qalibetoon aachoochee shuuneree, guttoon ikke baddaa, guttoon wotta bare baddaa tuniiree, awudde baatoona tookki yeshiibe.

¹³ Aroochee gutte yareenaꞌon geellee mixoochee shuuneree aachoona dikkebe.

¹⁴ Taabootoo shaaggeyemmoyich, ebi yareenaꞌon taabootee naabooch geddeti qalibeteenaꞌochi aahoona beshiiree giijjibe.

¹⁵ Ebi yareenaꞌo taabootee qalibeteenaꞌo daggooch beebeete; ebi aroochee ciroona kechaayeete.

¹⁶ Neech ta immemmi, sheeroo kooreeti gutte yalle xaqqeenaꞌon taabootee maac kotiibe.

¹⁷ “Axaaxoon maariyee guufoon xalle aachoochee shuunebe. Ebi guufo bi gidoo gutte hiraa qato, bi maaco ikke hiraa qato tunebe.

¹⁸ Axaaxoon maariyee guufee goconaa goconooch tunemmi, gutte kiruubeenaꞌon aachoon qici shuunebe.

¹⁹ Ikke kiruuboon ikke baddi gocooch, wotta ikke kiruuboon bare baddi gocooch tuniibe. Boonoshiyoo axaaxoon maariyee guufoona tookkii ikkochee shuuneetinaꞌo tunebeete.

²⁰ Kiruubeenaꞌo boonoshinaa boonoshina ciinee beetinaꞌo tuneechi, boonoshi aafoon axaaxoon maariyee guufo waan tuniibeete; boonoshi qoshoon yaggiree axaaxoon maariyee guufoon yiiribeete.

²¹ Neech ta immemmi, sheeroo kooreeti gutte yalle xaqqeenaꞌon taabootee maac kotiibe. Aroochee axaaxoon maariyee guufoon taabootee toommooch kotiibe.

²² Taabootee toommooch beeti gutte kiruubeenaꞌochi gutte daggooch, axaaxoon maariyee guufee tookk tuneechi, neenna danemmo taane. Israꞌeeleenaꞌoyich tunemmi ta geto bullin neech gettemmo taane.

Yaaree Kosho Kotemmi Madelloo

²³ “Madelloon geellee mixoochee shuunebe. Ebi madelloo bi gidoo gutte hiroo, bi maaco ikke hiroo, bi neexo ikke hiraa qato tunebe.

²⁴ Xalle aachoona dikkebe. Bi guude gawe gocon aachoona shuunebe.

²⁵ Ikke ciixi qach bede goci degoon bi guude gawoona shuunebe. Bi guude gawe goconoo aachoona shuunebe.

²⁶ Madelloyich awudde qalibetoon aachoochee shuuneree, awudde baatoo beeti awudde shuutoona yeshiibe.

²⁷ Madelloon shaagoyich tunemmi yareenaꞌon boonoshi yechemmoyich, ebi qalibeteenaꞌo goci degee katinooch tunebeete.

²⁸ Yareenaꞌon geellee mixoochee shuuneree aachoona dikkebe. Ebi yareenaꞌona madelloo shaakkeeba.

²⁹ Yalle saaneenaꞌonaa shaateenaꞌonon, ebiyoommon wotta uyee deejjoon ukkoyich tunemmi koddeenaꞌonaa quppe saaneenaꞌonon xalle aachoochee shuunebe.

³⁰ Ta aafooch beeyemmi, taach yaafeeti yaaree koshon ebi madellee toommooch bulli aaboon kotiibe.

Ceechoo Kotemmi Maqirajjo

³¹ “Ceechoo kotemmi maqirajjoon xalle aachoochee shuunebe. Bi neexemmi baatoonaa yaaboonon qici shuunebe. Ebi maqirajjee bungeenaꞌonaa bi bungeenaꞌochi degeenaꞌona, ceechee zayito beeti qulleenaꞌoo maqirajjoona tookkii ikkochee shuuneetinaꞌo tunebeete.

³² Maqirajjee ikke badd keejje ato, bare badd keejje ato bulla shiritte ato tunebe.

³³ Maqirajjoona tookkii yesheti shiritte ato, bi ikkikkoyich, luuzee michi bungoonaa bi degoonon shaahiitaa shuuneeti keejje qullo tunebe.

³⁴ Maqirajjee giindooch wotta luuzee bungoonaa bi degoonon shaahiitaa shuuneeti awudde qullo tunebe.

³⁵ Maqirajjee batti batti gutte ateenaꞌochi xepphooch, bi hilleexi gutte ateenaꞌochi xepphooch, keejjinneexi gutte ateenaꞌochi xepphoochoo, bungee dego tunebe.

³⁶ Ebi bungee degeenaꞌonaa ateenaꞌo bullina maqirajjoona tookki ikkochee shuuneetinaꞌo tunebeete; eboshi bulli xalle aachoochee qicaa shuuneebeete.

³⁷ “Aroochee shabaatte ceecheenaꞌon shuuneree, maqirajjee ciinooch beeti xaaꞌooch boonoshi aaxxe bekkemmoyich, maqirajjooch kotiibe.

³⁸ Qafeteenaꞌonaa ciitoo kiceyemmi yalle gafeteenaꞌonon xalle aachoochee shuunebe.

³⁹ Maqirajjoonaa bi qiiceenaꞌo bullinon shaashaa awudde kiilo giraamee xalle aachoochee shuunebe.

⁴⁰ Hini guudi toommoochaa neech ta bekkiitoommi gommona shuunoyich neen ariibe!