Keyo 24 - Kafa Linguistics Project

Bi Gibenikkiti Gibenoon Yeeri Manjiyoo

¹ Doono Yeeri Muusich ishichiye: “Ne, Harooni, Nadaabi, Abiihinaa shabe Israꞌeelee ukkireenaꞌona ta waan keyote. Wohooch tuneechi, taach goyinnebote.

² Tunebaani Doono Yeeri ta waan giddoon hakkemmo, ne ikkeeto baachiye. Bareenaꞌo giddaayeete. Asheenaꞌo neenna tookki kechaayeete” iye.

³ Muusi asheenaꞌo waan hammiꞌi Doono Yeerichi qaaroonaa doyoo bullinon bi getaa, asheenaꞌo ikke qaaroona “Doono Yeeri gettito bullin tuniyemmo noone” iyeete.

⁴ Aroochee Muusi Doono Yeeri gettito bullin kooriye. Biyoo dechara maaddoona tiyiye; guudi baatooch deejjee gudoon shuunehe; aaraa gutte Israꞌeelee yoodeenaꞌo haddoona aaraa gutte xaqqee giimbeenaꞌon xogii neechiye.

⁵ Aroochee Israꞌeelee gurimaasheenaꞌon bi wochetaa, boonoshiyoo micciibeeti deejjoon deejjiyeete; wurinaꞌonoo ikkittinee deejjoon tuniiꞌi Doono Yeerich deejjiyeete.

⁶ Muusiyoo wurinaꞌochi damee qaton daammii gafeteenaꞌooch geddiye; echeti qatonoo deejjee gudee toommooch wuciye.

⁷ Aroochee wogee macaafoon daammii asheenaꞌoyich shemmehe; boonoshiyoo “Doono Yeeri gettito bullin tuniyemmo noone; biich deꞌa gettemmo noone” iyeete.

⁸ Aroochee Muusi damoon daammii asheenaꞌo toommooch wuciichii, “Ebi qaaro bullin bi imiyooba, Doono Yeeri ittoshina tookkii bi giyiti wogoon manjiyemmi damoone” iye.

⁹ Muusi, Harooni, Nadaabi, Abiihinaa shabe Israꞌeelee ukkireenaꞌona guudi toommooch kechiyeete;

¹⁰ Israꞌeelee Nuggishoon beeggiyeete. Bi baatee dechiich birooba shimaayoo xalloommon xalleti, sapiiree aaxxe xaqqoochee shuuneeti, godoommi mooyo beetone.

¹¹ Tunebaani Yeeri ebi Israꞌeelee ukkireenaꞌon naxeyaanoone; boonoshiyoo Yeerin beeggiyeete; aroochee maa uchiyeete.

Muusi Siini Guudi Toommooch Keyo

¹² Aroochee Doono Yeeri Muusich ishichiye: “Guudi toommooch ta waan wobe. Hiniichoo yagibe. Tawoo Israꞌeeleenaꞌon ne dojjemmi sheeroonaa geteenaꞌonon ta kooriti yalle xaqqeenaꞌon neech immemmo taane” iye.

^13-14 Ebich Muusi Israꞌeelee ukkireenaꞌoyich ishichiye: “Ittoshi waan wottaa no waammi wottoon hiniich beebote. Harooninaa Huurina ittoshina tookkii beetinaꞌone; ittoshinaa ittoshina daggooch kaaro tiyigaata, boonoshi waan hambote” iye. Muusiyoo biin gaacheebeeti Yaasina tookkii Yeerichi guudi toommooch kecha tiyiye.

¹⁵ Aroochee Muusi guudi toommooch kechiye. Quboo guudon guuppiye;

¹⁶ Doono Yeerichi oogee yiiroo Siini guudi toommooch kindiye; quboo shiritte qemi wottoon guuppiye. Shabaattinnee qemooba, Doono Yeeri qubee daggooch tuneechii, Muusin ceeggiye.

¹⁷ Doono Yeerichi oogee yiiroo guudi toommooch michiibeeti qaaqqoochoommon tuneꞌi, Israꞌeeleenaꞌoyich bekkee beehe.

¹⁸ Aroochee Muusi guudi toommooch kechiꞌi qubee daggooch giyiye. Guudi toommooch aabbe areddoonaa aabbe xumoonon yagiye.