Keyo 23 - Kafa Linguistics Project

Tate Dayinneto

¹ “Koote woroon shookkaahine. Xuꞌechi ashich nalloo kechemmoyich tuniiya kootoon miixeyaahine.

² “Gonde mooyon tuniiya meeti asheenaꞌo tiyiyooba, boonoshin dabbiyaahine. Dayinnetoon dabiyoyich meeti asheenaꞌon dabbiree xummii miixeyaahine.

³ Nalloochaa girechoyich dabiiree nalliyaahine.

⁴ “Ne shixechochi gattoo woyee kuro aallee hammii beetaa ne danegaata, wochi deebiree biich imbe.

⁵ Neen shixxii beetochi kuro xaanoona tookkii dihiton ne beegigaata, tookki tiijjibani, ciinibee qayi hammaahine.

⁶ “Nallee gabberoochaa dayinnetoon dabiiree, girecho mooyon xummiyaahine.

⁷ Koote taggoon ashi toommooch yaaqqaahine. Xuꞌo bi toommooch aalli, kaame ashoon wuxiyaahine. Ebiyoommi gondoon shuuneebeeti ashoon maaraachemmo taane.

⁸ “Xucco kaachii ciinniibeeti ashi aafoon daayii beetone; kaame asheenaꞌochi nalloon xummii beetone; ebich xuccoon maayaahine.

⁹ “Ittoshiyoo Gibits ittoshi beehooba shiqqoo ittoshine; shiqqoyich shiqqittino am shaahoon waayee bi beeto gaata, ittoshi qelloona ittoshi ariibeeto ittoshine. Ebich shiqqoon xuqqaahote.

Shabaattinnee Natonaa Shabaattinnee Qemona

¹⁰ “Shiritte naton ne budooch yaroon shoohiree maayoon macibe.

¹¹ Tunebaani shabaattinnee natooba, goyaanoon ne qayaa showoo kashebe. Ne asheenaꞌo tuneti girechinaꞌo boonoshi maayemmi maayoon aroochee dane mameete; boonoshi maa echiiton kubbi cooxo mame. Ne woyinee qombeenaꞌonaa ne zayitee mixinaꞌonon ebiyoommon tuniibe.

¹² “Shiritte qemon ne shuunoon shuunebe. Tunebaani shabaattinnee qemooba amee shuunoonolla shuuneyaahine; ebina ne gattoo, ne kuro, ne guunonaa neech shuuneebeeti shiqqoona kashe heechemminaꞌone.

¹³ “Ta getteto bullin manjiiree quyebe. Bare nuggisheenaꞌo waan corootiyaahine. Boonoshi shigoonona ceeggaahine.

Keejje Ogooge Nati Baareenaꞌo

¹⁴ “Natooch keejje wottoon taach baaroon baaremmo ittoshine.

¹⁵ Shittoo Giyaani Kochi Baaroon baaribe. Abiibi agenooba Gibitsee ne kechetoyich, neech ta gettetoommon, ebi are agenooch maacheeti baaree aabooba, shabaatte qemon shittoo giyaani koshon mame. “Koniyoona shokke kishoon ta aafooch giddaaye.

¹⁶ “Ne budooch ne shookketi qaabbe Maayi Qecci Baaroon baaribe. “Nati ciirooch ne budeexi maayoon ne kiciyooba, Maayi Kicee Baaroon baaribe.

¹⁷ “Natooch keejje wottoon anaamo bulli Nuggishoo Doono Yeeri ta aafooch giddebe.

¹⁸ “Taach gijjoon ne deejjii beegaata, bi damoon shittoo giyiti koshona tookki giddiyaahine. “Ebi baareenaꞌooba deejjeeti gijjeenaꞌochi awuyon bi decharee maaddooch beddaahaa, michaanoon yagiyaahine.

¹⁹ “Ne budoochee daneebeeti maayoochee beshe gaaweti maayi cilloon ne Nuggishoo Doono Yeeri ta kexooch giijjibe. “Emmishee bushoochi meenon bi indeechi ejjoona kiijjaahine.

Yeeri Gibenikkiti Gibenee Qaaroonaa Bi Getoona

²⁰ “Maraakoon ne aaf daachiibeeto taane. Ebiyoo gommoochaa neen bi quyemmonaa neech ta qanniiti showooch neen bi giijjemmonoyichiye.

²¹ Gaawichi elleree bi gettii beeton waayebe. Bi toommooch hukkoon shuuneyaahine. Ta shigo bi toommooch beeto bi tunetoyich, bi toommooch hukkoon ne shuunegaata, neen maaraachemmone.

²² Bi gettii beeton manjii ne ellegaata, neech ta gettaabeeto bullin ne tuniigaatoo, ne etteenaꞌon kochemmo taane; neenna koyee beetinaꞌona koyemmo taane.

²³ Ta maraakoo ne aaf shiichemmone; neenoo Amooreenaꞌocho, Hiteenaꞌocho, Ferizeenaꞌocho, Kanaaneenaꞌocho, Hiweenaꞌochonaa Yebuseenaꞌochona tuneti showooch giijjemmone; tawoo boonoshin hidi aalliyemmo taane.

²⁴ Boonoshi nuggisheenaꞌoyich goyinne maddeyaahine. Boonoshi tuniibeeti doyoon dabbiyaahine. Boonoshi nuggisheenaꞌochi misiloon happi aalliibe. Boonoshi goyinneebeeti xaqqee giimboon tiishi burice.

²⁵ Ne Nuggishoo Doono Yeeri taach goyinne maddebe. Ta diiroo ne maayemmi maayoonaa ne uchemmi aaconooch tunemmone; biiyoon ne waanee wokkiyemmo taane;

²⁶ ne showee daggooch borihiyaabeeti maachee woyee xaafee tuneti maachee daneyaachemmine; kashee genjoonoo neech immemmo taane.

²⁷ “Neen shixxiibeeti aageteenaꞌo bulli oogichiree taan boonoshi shattemmoyich tuniyemmo taane; boonoshin betiyemmo taane; ne etto bulli gubb kisheree ne waanee woci bi aallemmoyich tuniyemmo taane.

²⁸ Hiweenaꞌon, Kanaaneenaꞌonaa Hiteenaꞌonon betiyemmo taane; ne aafoochee boonoshin yoohi kichemmo taane.

²⁹ Tunebaani ikke nati daggooch boonoshin kichaachemmo taane; ebin ta tuniigaata, showoo ashaalli xafoon tuneree kubbi cooxo woddemmone.

³⁰ Haddoona meetiree showoon bulloyich ne beddemmi wottoon, giishii giishiibee boonoshin yookkemmo taane.

³¹ “Ne showee daaroon Ceelle baharoochee Filsixeemee baharooch beddaahaa, barahoochee Efiraaxisi aacooch beddaahaa tuniyemmo taane; ebi showooch beeti asheenaꞌon ne kishooch beshiiree immemmo taane; newoo ne aafoochee yoohiree kichemmo neene.

³² Boonoshina tookki tuneba boonoshi goyinneebeeti nuggisheenaꞌona tookki wogoon giyaahine.

³³ Ne showooch boonoshi beeyemmoyich daaggiyaahine. Ebin ne tuniigaata, taan ne xuqqemmoyich tuniyemminaꞌone; boonoshi goyinneebeeti nuggisheenaꞌoyich ne goyinnaa maddigaata, neech olloon tunemminaꞌone” iye.