Keyo 21 - Kafa Linguistics Project

Hibiree Guunoyich Tunemmi Doyoo

¹ Doono Yeeri Muusich daakkiꞌi ishichiye: “Israꞌeeleenaꞌoyich ne dojjemmi doyoo ebine:

² “Hibiree yaroo tuneti guunon ne kemegaata, shiritte naton neech maddebe; shabaattinnee natooba, amoonolla qocaanoon baad gawukkaa hambe.

³ Bi ikkeeton baach ne kemeto bi tunegaata, bi ikkeeto gawukkaa hambe. Bi mecheena tookkaa ne kemeto bi tunegaata, areyoo tookki hambuye.

⁴ Uroochi doono mecheen biich shaakkiito bi tunegaata, anaami bushiishoon woyee maache bushiishoon shiyeti bi tunegaatoo, ureenaa bi bushiishoona uroochi doonochinaꞌo tunebeete. Uroo bi ikkeeto gawukkaa hambe.

⁵ “Tunebaani hini are guuno, ‘Ta doonon, ta mecheenaa ta bushiishoonon shunnaabeeto taane; ebich hamaache’ bi getigaata,

⁶ bi doono nallechinaꞌo waan daambe; aroochee kellee shaaqqooch woyee qoomooch tuggiichi, ikke bi waamon mutoona hottibe; ebina hini guuno bi qitimmi wottoon bi doonoyich guunon tunemmone.

Hibiree Gonneyich Tunemmi Doyoo

⁷ “Ikke asho bi busheen gonnee bi tunemmoyich bi kemigaata, guuninaꞌochoommon baad gawukkaa hammaayuye.

⁸ Mechee bi tunemmoyich qaawiti bi doono ureena emiraano bi tunegaata, biishoon deꞌiree wochi daachiibe; tun bedaani mooyon ure toommooch bi tuniitoyich, shiqqoyich kemon hakkaache.

⁹ Ikke asho gonneen bi bushoyich shaakkiya kemeto bi tunegaata, bi busheyich bi tunii beetoommon areyichoo tuniibe.

¹⁰ Ikke asho bare mecheen bi shaagigaata, bi qaabbe mecheyich maayoon, tahoonaa shaagee doyoonon shappayaaye.

¹¹ Ebi keejje mooyon biich ceechaachemmo bi tunegaata, amee mooyonona qochiyaanoon baad cikki gawukki daachiibe.

Gonde Asheenaꞌon Sheeroo

¹² “Ashoon yexxii wuximmo qitibe.

¹³ Tunetaa ariyaanoon diqqoona wuxito bi tunegaata, murici hamiree bi wodemmoyich ta ittoshich kaaccemmi xaaꞌooch hamiree wodibe.

¹⁴ Tunebaani ikke asho gabii kuxxiꞌi bare ashoon bi wuxigaata, ta deejjee gudee xaaꞌooch aasheto bi tunetaanoona, geechi kichi daamaa qitibe.

¹⁵ “Bi nihoon woyee bi indeen yexxiibeeto qitibe.

¹⁶ “Ikke asho ashoon giidoona yechii bi kemigaata woyee bi waan kotiibee bi yechegaata, ebin tuniiti asho qitibe.

¹⁷ “Bi nihoo woyee bi indee toommooch qallayee yibbaatoon yibbaateebeeto qitibe.

¹⁸ “Gutte asheenaꞌo kaareꞌi, ikkoo baroon xaqqoona bi yexaa woyee bi tuketaa, yexxeti uro qitaano bi tunegaata, tunebaani qaakkeꞌi tokketeechii,

¹⁹ aroochee tiyii gumboon tugeꞌi hammiibeeto bi tunegaata, shuuneyaanoon bi beshiiti aaboyich gijjoon nummoonaa uro wodimmi wottoon, gufonoyee besh yexxiti uro sheereyaaye.

²⁰ “Ikke asho bi guunon woyee bi gonneen gumboona bi yexaa, bekkech bi qitigaata, bi doono sheereebe.

²¹ Tunebaani ikke woyee gutte qemi daggooch ebi guuno woyee gonnee qitoo qayigaata, boonoshi doonochi hajjeenaꞌo boonoshi tunetoyich, uro sheereyaaye.

²² “Asheenaꞌo boonoshinaa boonoshina kaareꞌi xifechi ureen boonoshi yexaa, bushoo shiijjee qiccegaata, tunebaani ure toommooch qaaꞌi iritoon deebaano bi tunegaata, ure toommooch ebin tuniiti uro ureechi keno echetonaa nallechinaꞌo nallitonon nummebe.

²³ Tunebaani ure toommooch qaaꞌi mooyon shakkiito bi tunegaata, ichemmi sheeroo ebine: Wuxito bi tunegaata, qitibe;

²⁴ aafoon dookkito bi tunegaata, bi aafo dooge; gashoon tiichito bi tunegaata, bi gasho tiishebe; kishoon tiichito bi tunegaata, bi kishoo tiishebe; baatoon tiichito bi tunegaata, bi baatoo tiishebe;

²⁵ qaaqqoona michito bi tunegaata, qaaqqoona mice; yexxii mayiito bi tunegaata, yexaa mayebe; arengoona xoobbito bi tunegaata, arengoona xooppebe.

²⁶ “Ikke asho bi guuno woyee bi gonnee aafoon yexxii bi dookkigaata, ebi aafee nummoon baad cikki gawukki daachiibe.

²⁷ Guunochi woyee gonneechi gashoon bi tiishigaata, ebi tiisheti gashee nummoon baad cikki gawukki daachiibe.

Gijjoo Koyigaata Tunemmi Sheeroo

²⁸ “Gattoo ashoon kochii bi wuxigaata, xaqqoona yexaa qitibe; bi meenoo manjeyaaye. Gattoochi doono echeyaachemmone.

²⁹ Tunebaani bi gattoo kochecho bi tunoon getaa ariibee, tifaanoon bi qayaa, ashoon kochii bi wuxigaata, gattoo xaqqoona yexaa qitibe; bi doonoo qitibe.

³⁰ Tunetaa uro nummoon bi nummemmoyich echee gaata, echeeto bullin qociree bi kashoon biishebe.

³¹ Gattoo ashi bushoon woyee busheen bi koyigaata, ebi sheeroommon bi toommooch nalleebe.

³² Gattoo guunon woyee gonneen bi koyigaata, gattoochi doono shaashe sheqeelee birewoon are guunochi woyee gonneechi doonoyich qoce; gattoo xaqqoona yexaa qitibe.

³³ “Ikke asho oppoon aaho bi qayaa woyee oppoon iijjiichii hicaanoon bi dufaa, gattoo woyee kuro arooch bi giyigaata,

³⁴ oppoon iijjiti uro gijjee doonoyich qoce; qititi meeshoo biicho tunebe.

³⁵ “Ikke ashi gattoo bare ashi gattoon kochii bi wuxigaata, kashoona beeti gattoon kemiree qititi gattoochi meeshoona tookki tatoon qoodeebeete.

³⁶ Tunetaa gattoo kochecho bi tuno arichee beetaa, bi doono tifaano bi tunegaata, qititi gattoochi qoodoon kashoona beeton bi doonoyich qoce; qititi meeshoo biicho tunebe.